សហរដ្ឋអាមេរិក ៖ បណ្តាក្រុមហ៊ុនកូរ៉េខាងត្បូង កំពុងវិនិយោគលើដើមទុនយ៉ាងច្រើនទៅក្នុងសេដ្ឋកិច្ចរបស់សហរដ្ឋអាមេរិក ដែលជាកិច្ចខិតខំប្រឹងប្រែងរបស់រដ្ឋបាលលោកប្រធានាធិបតី ចូ បាយដិន (Joe Biden) ដើម្បីរុញប្រទេសចិនចេញពីខ្សែសង្វាក់ផ្គត់ផ្គង់…
សហរដ្ឋអាមេរិក ៖ បណ្តាក្រុមហ៊ុនកូរ៉េខាងត្បូង កំពុងវិនិយោគលើដើមទុនយ៉ាងច្រើនទៅក្នុងសេដ្ឋកិច្ចរបស់សហរដ្ឋអាមេរិក ដែលជាកិច្ចខិតខំប្រឹងប្រែងរបស់រដ្ឋបាលលោកប្រធានាធិបតី ចូ បាយដិន (Joe Biden) ដើម្បីរុញប្រទេសចិនចេញពីខ្សែសង្វាក់ផ្គត់ផ្គង់ និងភាពជាដៃគូធំបំផុតរបស់ខ្លួន។ ស្របពេលភាពរីកចម្រើនរបស់បណ្តាក្រុមហ៊ុនផលិតបច្ចេកវិជ្ជាទំនើបៗបានជំរុញឱ្យមានការកើនឡើងនូវការប្តេជ្ញាចិត្តចំពោះគម្រោងពីទីក្រុងសេអ៊ូលជាច្រើន។ នេះបើតាមប្រភពពីកាសែត Financial Times របស់ចក្រភពអង់គ្លេសចេញផ្សាយកាលពីថ្ងៃទី១៨ ខែកញ្ញា ឆ្នាំ២០២៤។
ទិន្នន័យពីសន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍន៍ ដែលបានវិភាគដោយកាសែត Financial Times បានឱ្យដឹងថា ការប្តេជ្ញាចិត្តលើគម្រោងវិនិយោគរបស់សហរដ្ឋអាមេរិកពីក្រុមហ៊ុនរបស់កូរ៉េខាងត្បូងមានតម្លៃសរុបដល់ ២១.៥ពាន់លានដុល្លារអាមេរិក កាលពីឆ្នាំមុន ពោលច្រើនជាងប្រទេសផ្សេងទៀត និងវ៉ាដាច់តៃវ៉ាន់ ដែលជាអ្នកវិនិយោគធំជាងគេកាលពីឆ្នាំ ២០២២ ។
ជាលើកដំបូង និងយ៉ាងហោចណាស់១ទសវត្សរ៍ ដែលប្រទេសកូរ៉េខាងត្បូងទទួលបានតំណែងកំពូលសម្រាប់គម្រោងវិនិយោគជាមួយអាមេរិក ខណៈតំណែងជារបស់ប្រទេសចិនមួយនេះបានធ្លាក់ចុះជាលំដាប់ ព្រោះសង្គ្រាមពាណិជ្ជកម្មរវាងប្រទេសមហាអំណាចកំពូលទាំងពីររបស់ពិភពលោក។ ប្រទេសចិន គឺជាអ្នកវិនិយោគកំពូលនៅអាមេរិកក្នុងឆ្នាំ ២០១៤ ប៉ុន្តែបានធ្លាក់មកចំណាត់ថ្នាក់ទី៨ កាលពីឆ្នាំមុន បន្ទាប់ពីការវិនិយោគបានធ្លាក់ចុះមួយភាគបី។ គម្រោងវិនិយោគកាលពីឆ្នាំមុនពីកូរ៉េខាងត្បូងមានចំនួន ១១% ទាបជាងឆ្នាំ ២០២២ ទិន្នន័យសរុបមានចំនួន ៩០ គម្រោងពីក្រុមហ៊ុនកូរ៉េខាងត្បូង កាលពីឆ្នាំ ២០២៣ ដែលជាចំនួនកំណត់ត្រាខ្ពស់បំផុត និងកើនឡើង ៥០% បើធៀបនឹងឆ្នាំ ២០២២។
លោក Chihwan Kim នាយកប្រតិបត្តិនៃក្រុមហ៊ុន Samkee ដែលជាក្រុមហ៊ុនផ្គត់ផ្គង់រថយន្តកូរ៉េខាងត្បូងបានប្រាប់ Financial Times យ៉ាងដូច្នេះថា «សហរដ្ឋអាមេរិកលែងចង់មានប្រភពវិនិយោគពីចិនតទៅទៀតហើយ ដែលនេះកំពុងផ្តល់ឱ្យក្រុមហ៊ុនកូរ៉េខាងត្បូងនូវឱកាសមួយ ដើម្បីក្លាយជាអ្នកផ្គត់ផ្គង់ និងដៃគូដ៏ធំរបស់សហរដ្ឋអាមេរិក»។ កាលពីឆ្នាំមុន Samkee បានបណ្តាក់ទុនលើទឹកប្រាក់ ១២៨លានដុល្លារ ដើម្បីបើករោងចក្រដំបូងនៅសហរដ្ឋអាមេរិក ស្ថិតនៅទីក្រុង Tuskegee រដ្ឋ Alabama ដើម្បីផលិតគ្រឿងបន្លាស់រថយន្ត។
ការកើនឡើងសម្រាប់ការវិនិយោគរបស់កូរ៉េខាងត្បូងកើតឡើង បន្ទាប់ពីការអនុម័តច្បាប់របស់រដ្ឋបាលលោក បៃដិន ស្តីពីការផិលិតបន្ទះឈីប និងវិទ្យាសាស្ត្រ ក៏ដូចជាច្បាប់កាត់បន្ថយអតិផរណាក្នុងឆ្នាំ ២០២២ ដោយផ្តល់នូវឥណទានពន្ធ ប្រាក់កម្ចី និងប្រាក់ឧបត្ថម្ភរាប់រយពាន់លាន ដើម្បីចាប់ផ្តើមការផលិតធាតុផ្សំសំខាន់សម្រាប់បន្ទះឈីប និងបច្ចេកវិទ្យាស្អាតរបស់អាមេរិក រួមទាំងថាមពលពន្លឺព្រះអាទិត្យ ពិសេសបន្ទះឈីប និងរថយន្តអគ្គិសនី ដើម្បីកាត់បន្ថយការពឹងផ្អែកលើប្រទេសចិន ដែលជាអ្នកផលិតដ៏លេចធ្លោ។
ភាពតានតឹងភូមិសាស្ត្រនយោបាយរវាងអាមេរិក និងចិន ក៏បានដាក់សម្ពាធលើក្រុមហ៊ុនកូរ៉េខាងត្បូងឱ្យកំណត់ប្រតិបត្តិការពួកគេនៅប្រទេសចិន ដើម្បីបន្តពង្រីកការវិនិយោគរបស់សហរដ្ឋអាមេរិក។ ជាងពាក់កណ្តាលនៃការវិនិយោគក្រៅប្រទេសរបស់កូរ៉េខាងត្បូងបានហូរចូលទៅអាមេរិកកាលពីឆ្នាំមុន កើនឡើងពី ១៨ ធៀបនឹងឆ្នាំ ២០១៩។
ទន្ទឹមនឹងនោះ ប្រទេសចិនបានទទួលផលតិចជាង ១% នៃការវិនិយោគរបស់កូរ៉េខាងត្បូង កាលពីឆ្នាំមុន ពោលធ្លាក់ចុះ ១១% ធៀបនឹងឆ្នាំ ២០១៩៕ (ប្រភព ៖ Financial Times រូបភាព ៖ Reuters)
ចែករំលែកព័តមាននេះ