ទឹកជំនន់ គឺជាគ្រោះមហន្តរាយធម្មជាតិមួយ ក្នុងចំណោមគ្រោះមហន្តរាយធម្មជាតិទូទៅបំផុតដែលជារឿយៗវាបានកើតឡើងដោយមានការព្រមានតិចតួច ។ ប៉ុន្តែទោះបីជាយ៉ាងណាសម្រាប់កម្ពុជា ដែលទើបតែបានឃើញគ្រោះមហន្តរាយនៅប្រទេសជិតខាង គឺនៅកម្រិតថ្នាក់ជាតិយើងបានឃើញពីការត្រៀមរួចរាល់ហើយដែរ គ្រាន់តែគ្រោះធម្មជាតិនេះវាពិបាកនឹងប៉ាន់ស្មានស្ថានភាព និងភាពគ្រោះថ្នាក់ ដូច្នេះមានតែការប្រុងប្រយ័ត្នខ្លួនឯងបន្ថែមទើបប្រសើរ…
ទឹកជំនន់ គឺជាគ្រោះមហន្តរាយធម្មជាតិមួយ ក្នុងចំណោមគ្រោះមហន្តរាយធម្មជាតិទូទៅបំផុតដែលជារឿយៗវាបានកើតឡើងដោយមានការព្រមានតិចតួច ។ ប៉ុន្តែទោះបីជាយ៉ាងណាសម្រាប់កម្ពុជា ដែលទើបតែបានឃើញគ្រោះមហន្តរាយនៅប្រទេសជិតខាង គឺនៅកម្រិតថ្នាក់ជាតិយើងបានឃើញពីការត្រៀមរួចរាល់ហើយដែរ គ្រាន់តែគ្រោះធម្មជាតិនេះវាពិបាកនឹងប៉ាន់ស្មានស្ថានភាព និងភាពគ្រោះថ្នាក់ ដូច្នេះមានតែការប្រុងប្រយ័ត្នខ្លួនឯងបន្ថែមទើបប្រសើរ ។
នៅពេលដែលកម្ពស់ទឹកកើនឡើង វាអាចនាំមកនូវភាពចលាចល និងគ្រោះថ្នាក់ដែលប៉ះពាល់ដល់ផ្ទះហេដ្ឋារចនាសម្ព័ន្ធ និងអាយុជីវិតរស់នៅយើងគ្រប់គ្នា ដូច្នេះការដឹងពីរបៀបឆ្លើយតបអាចធ្វើឱ្យមានភាពខុសគ្នារវាងជីវិត និងសេចក្តីស្លា.ប់ ។ នេះ គឺជាជំហានសុវត្ថិភាពសំខាន់ៗមួយចំនួនដែលត្រូវអនុវត្តតាមអំឡុងពេលទឹកជំនន់ ។
១. រក្សាការតាមដានព័ត៌មាន
សូមបន្តតាមដានព័ត៌មានក្នុងស្រុកតាមរយៈវិទ្យុ ទូរទស្សន៍ ឬប្រភពអនឡាញដែលអាចទុកចិត្តបានពីព្រោះ ការជូនដំណឹងអំពីអាកាសធាតុ និងការជូនដំណឹងអំពីការជម្លៀសនឹងណែនាំអ្នកអំពីថា តើវាមានសុវត្ថិភាពក្នុងការនៅនឹងកន្លែង ឬប្រសិនបើអ្នកគួរចាកចេញ។
២. ជម្លៀសខ្លួននៅពេលចាំបាច់
បើអាជ្ញាធរណែនាំឲ្យជម្លៀសចេញកុំពន្យារពេល គឺត្រូវតែចាកចេញ ដូច្នេះនៅក្នុងស្ថានភាពបែបនេះ សម្រាប់អ្នកដែលរស់នៅតាមតំបន់ដែលងាយនឹងប្រឈមនឹងបញ្ហា សូមរៀបចំវេចខ្ចប់សម្ភារៈ និងឧបករណ៍សង្គ្រោះបន្ទាន់ជាមួយសម្ភារសំខាន់ៗ និងចាំបាច់ជាពិសេស គឺគួរមានទឹកដបសម្រាប់ម្នាក់ៗ អាហារក្រៀមៗ អាហារកំប៉ុង ថ្នាំ ឯកសារសំខាន់ៗ និងសម្ភារៈសង្គ្រោះបឋម ។ សូមចាំថា សុវត្ថិភាពរបស់អ្នក គឺសំខាន់ជាងទ្រព្យសម្បត្តិសម្ភារៈផ្សេងៗទៅទៀត។
៣. ជៀសវាងការដើរ ឬបើកបរឆ្លងកាត់ទឹកជំនន់
សូមកុំភ្លេចជម្រៅ និងចរន្តនៃទឹកជំនន់អាចបញ្ឆោតបានពីព្រោះកម្លាំងទឹកហូរពេលខ្លះយើងពិបាកមើលដោយភ្នែកទទេ ប៉ុន្តែចលនានៃទឹក គឺអាចមានកម្លាំងនឹងអូសទាញយើងឲ្យមានគ្រោះថ្នាក់បាន ។ ប្រសិនបើអ្នកនៅក្នុងរថយន្ត ហើយទឹកចាប់ផ្តើមឡើងលឿនប្លែកធម្មតា សូមបោះបង់ចោលយានជំនិះនោះ ហើយប្រញាប់ផ្លាស់ទីទៅណាហើយកុំព្យាយាមបើកបរឆ្លងកាត់ផ្លូវលិចទឹក ។
៥. បិទឧបករណ៍ប្រើប្រាស់នៅក្នុងផ្ទះជាពិសេស គឺអគ្គិសនី
មុនពេលទឹកជំនន់មកដល់ផ្ទះរបស់អ្នក សូមបិទអគ្គិសនី ឬ ហ្គាស ។ នេះអាចជួយការពារភ្លើង ចរន្តអគ្គិសនី ឬការលេចធ្លាយឧស្ម័ន ។ ប្រសិនបើអ្នកស្ថិតនៅក្នុងទឹករួចទៅហើយ សូមកុំព្យាយាមដោះ ឬប្រមូល ឧបករណ៍អគ្គិសនី ដែលលិចព្រោះវានៅបង្កហានិភ័យនៃការឆក់មានកម្រិតខ្ពស់ ។
៥. ផ្លាស់ទីទៅទីតាំងខ្ពស់
ប្រសិនបើអ្នកនៅផ្ទះ ហើយទឹកជំនន់ចាប់ផ្តើមឡើង ចូរស្វែងរកទីតាំងដែលខ្ពស់ជាបន្ទាន់ ហើយកុំភ្លេចសំឡឹងមើលវត្ថុអណ្តែតទឹកទុកជិតខ្លួនអោយហើយ ។ វត្ថុអណែ្តតទឹកទាំងនោះមានដូចជា ប៊ីដុង ធុងទឹកកកធំៗ… ដើម្បីងាយស្រួលតោងនៅក្នុងករណីទឹកជំនន់ពន្លិចផ្ទះរបស់អ្នក ។
៦. នៅឱ្យឆ្ងាយពីទឹកកខ្វក់
សម្រាប់នៅទីវាលមិនសូវចោទទេ តែនៅទីក្រុង កាលណាទឹកលិចជាញឹកញាប់មានទឹកស្អុយ សារធាតុគីមី និងសារធាតុគ្រោះថ្នាក់ផ្សេងទៀត ដូច្នេះប្រសិនបើអាចគួរជៀសវាងការដើរឆ្លងកាត់កន្លែងដែលលិច ។ ហើយបន្ទាប់ពីទឹកជំនន់បានស្រកហើយ យកចិត្តទុកដាក់បោសសំអាតលាងរាលវត្ថុនានាដែលលិចមុនពេលប្រើប្រាស់ ។
៧. ជួយអ្នកដទៃប្រសិនបើអាចធ្វើទៅបាន
ប្រសិនបើអ្នកអាចមានសមត្ថភាព ជួយអ្នកដទៃ សូមជួយពួកគេ ប៉ុន្តែត្រូវធានាសុវត្ថិភាពរបស់អ្នកជាមុនសិន ។ អ្នកជិតខាងដែលមានវ័យចំណាស់ បុគ្គលពិការ និងសត្វចិញ្ចឹមអាចត្រូវការជំនួយក្នុងការជម្លៀសចេញ ។ ទោះយ៉ាងណាក៏ដោយកុំធ្វើឱ្យខ្លួនឯងមានគ្រោះថ្នាក់ ។ ទាក់ទងទៅសេវាសង្គ្រោះបន្ទាន់ ប្រសិនបើនរណាម្នាក់ត្រូវការការសង្គ្រោះ ។
៨. ប្រយ័ត្នសត្វអសិរពិសរសាត់តាមទឹក
ពេលគ្រោះអាសន្នកើតមានកុំថា ឡើយតែយើងសត្វនានាក៏ត្រូវការស្វែងរកកន្លែងសុវត្ថិភាពដែរ ដូច្នេះពួកវាដូចជាពពួកសត្វអសិរពិស គឺអាចព្យាយាមរកទីទួលសុវត្ថិភាពដែរយើងត្រូវប្រុងប្រយ័ត្នខ្ពស់ ។
៩. កញ្ចប់សុវត្ថិភាពដែលត្រូវរៀប
កញ្ចប់សុវត្ថិភាពដែលត្រូវត្រៀម គឺមានអាហារក្រៀមៗ អាហារកំប៉ុងងាយៗ ទឹកស្អាត ថ្នាំសង្កូវដូចជា ពពួកថ្នាំបញ្ចុះកម្តៅ និងថ្នាំរាគ ពិល ឬឧបករណ៍បំភ្លឺតូចៗដែលមិនត្រូវការអគ្គិសនី សម្លៀកបំពាក់ ឯកសារសំខាន់ៗ ឧបករណ៍ការពារខ្លួន និងចាំបាច់ខ្លះៗដូចជា កូនកាំបិតជាដើម ។ កញ្ចប់នេះគួរមានកញ្ចប់ធំ និងកញ្ចប់តូច ដោយនៅក្នុងករណីមានពេលមានវេលាគ្រប់គ្រាន់យើងអាចយកកញ្ចប់ធំ ប៉ុន្តែបើពេលបន្ទាន់គឺគួរ ឆក់កញ្ចប់តូច ដែលគ្រប់គ្រាន់សម្រាប់សមាជិកម្នាក់ៗនៅក្នុងគ្រួសារអាចយកតាមខ្លួន និងចល័តងាយស្រួល ។
សរុបមកទឹកជំនន់មានគ្រោះថ្នាក់ ហើយអាចវាយប្រហារភ្លាមៗ ប៉ុន្តែជាមួយនឹងការរៀបចំត្រឹមត្រូវ និងសកម្មភាពរហ័សភាពរឹងប៉ឹង អ្នកអាចកាត់បន្ថយហានិភ័យចំពោះខ្លួនអ្នក និងក្រុមគ្រួសាររបស់អ្នក ។ គ្រោះធម្មជាតិឥឡូវសាហាវមិនអាចទាយត្រូវទាំងស្រុងទេ ហើយវាក៏ប្រែប្រួលរហួសដែរ ។ សូមលើកកម្ពស់ការប្រុងប្រយ័ត្ន ៕
ចែករំលែកព័តមាននេះ