ទីក្រុងបេរូត៖ ថ្ងៃនេះ អាជ្ញាធរលីបង់ហាមអ្នកដំណើរយកឧបករណ៍បញ្ជូសារ និងវិទ្យុទាក់ទងដាក់តាមខ្លួនដើម្បីធ្វើដំណើរចេញពីអាកាសយានដ្ឋានទីក្រុងបេរូតទេ។ ចំណាត់ការនេះធ្វើឡើងបន្ទាប់ពីមានហេតុការណ៍ផ្ទុះឧបករណ៍ផ្ញើសារចល័តកាលពីថ្ងៃអង្គារស្លាប់យ៉ាងតិច១២នាក់ និងរបួស២៨០០នាក់។ មួយថ្ងៃក្រោយមកមានហេតុការណ៍ផ្ទុះវិទ្យុទាក់ទងវិញម្ដងស្លាប់២០នាក់ និងរបួស៤៥០នាក់។
អាកាសចរណ៍ស៊ីវិលលីបង់អំពាវនាវឱ្យក្រុមហ៊ុនអាកាសចរណ៍ដែលត្រូវហោះចេញពីទីក្រុងបេរូតសូមជម្រាបប្រាប់អ្នកដំណើររបស់ខ្លួនថាហាមយកវិទ្យុទាក់ទង និងឧបករណ៍ផ្ញើសារចល័តចេញជាដាច់ខាត។ ត្រូវរង់ចាំរហូតដល់មានការជូនដំណឹងជាថ្មី។ ឧបករណ៍ទាំងនេះក៏ត្រូវហាមឃាត់មិនឱ្យដឹកចេញតាមយន្តហោះផងដែរ។ នេះបើយោងតាមការផ្សាយរបស់ទីភ្នាក់ងារព័ត៌មានលីបង់។
រហូតមកដល់ពេលនេះ មនុស្សយ៉ាងតិច៣៧នាក់ស្លាប់ និងជាងបីពាន់នាក់រងរបួសដោយសារហេតុការណ៍ផ្ទុះទាំង២លើក។ អ្នករងគ្រោះភាគច្រើនជាយុទ្ធជន និងមន្ត្រីគ្រប់លំដាប់ថ្នាក់របស់ក្រុមហេស្បូឡា។ រដ្ឋាភិបាលលីបង់ និងក្រុមហេស្បូឡាចោទប្រកាន់ថានេះជាស្នាដៃរបស់អ៊ីស្រាអែល។ ប៉ុន្តែអ៊ីស្រាអែលមិនបានបញ្ចេញប្រតិកម្មតបតដោយពាក្យសម្ដីទេ។
កងទ័ពលីបង់ថ្លែងថាខ្លួនបានចុចបំផ្ទុះឧបករណ៍ផ្ញើសារចល័ត និងឧបករណ៍ទូរគមនាគមន៍ទាំងឡាយណាដែលគួរឱ្យសង្ស័យថាមានបង្កប់គ្រឿងផ្ទុះនៅក្នុងនោះ។ ពួកគេក៏បានអំពាវនាវឱ្យជនស៊ីវិលរាយការណ៍ប្រាប់ទៅថ្នាក់លើបើសិនសង្ស័យថាឧបករណ៍ណាមួយគួរឱ្យសង្ស័យថាមានបង្កប់គ្រឿងផ្ទុះ។ ការចោទប្រកាន់របស់ហេស្បូឡាចំពោះអ៊ីស្រាអែលមិនមែនឥតហេតុផលទេ។ ភាគីទាំង២ជាគូបដិបក្ខនឹងគ្នា ហើយបានប៉ះទង្គិចគ្នាប្រដាប់អាវុធនៅតាមព្រំដែនជិតមួយឆ្នាំហើយ៕
ចែករំលែកព័តមាននេះ