ខេត្តកំពង់ស្ពឺ ៖ ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ បានណែនាំដល់កងកម្លាំងទាំង០៣ប្រភេទ និងអភិបាលក្រុង-ស្រុកទាំង៩ ឱ្យបង្កើនការយកចិត្តទុកដាក់ តាមដានការវិវត្តន៍ថ្មីនៃការប្រែប្រួលអាកាសធាតុ…
ខេត្តកំពង់ស្ពឺ ៖ ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ បានណែនាំដល់កងកម្លាំងទាំង០៣ប្រភេទ និងអភិបាលក្រុង-ស្រុកទាំង៩ ឱ្យបង្កើនការយកចិត្តទុកដាក់ តាមដានការវិវត្តន៍ថ្មីនៃការប្រែប្រួលអាកាសធាតុ និងត្រៀមលក្ខណៈឱ្យបានស្រេចនូវកម្លាំងសរុប មធ្យោបាយសរុប ដើម្បីបង្ការ សង្គ្រោះ និងអន្តរាគមន៍ឱ្យបានទាន់ពេលវេលាចំពោះប្រជាពលរដ្ឋដែលទទួលរងគ្រោះពីជំនន់ទឹកភ្លៀងកើតឡើងពីការបម្រែបម្រួលអាកាសធាតុ។
អភិបាលខេត្តកំពង់ស្ពឺ ឯកឧត្តម ជាម ច័ន្ទសោភ័ណ បានលើកឡើងបែបនេះកាលពីល្ងាចថ្ងៃទី១៨ ខែកញ្ញា ឆ្នាំ២០២៤ថា ដោយសារតែបម្រែបម្រួលអាកាសធាតុ បានធ្វើឱ្យប្រទេសជិតខាងកម្ពុជា ទទួលរងនូវគ្រោះទឹកជំនន់ និងខ្យល់កន្ត្រាក់ធ្ងន់ធ្ងរ ដោយបានធ្វើឱ្យហេដ្ឋារចនាសម្ព័ន្ធនានារងការខូចខាត និងបានសម្លាប់អាយុជីវិតមនុស្សជាច្រើននាក់ផងដែរ។ការបម្រែបម្រួលនេះ ក៏បានជះឥទ្ធិពលអាក្រក់មកលើប្រទេសកម្ពុជាផងដែរ ដែលក្រសួងជំនាញប្រកាសទៅអាជ្ញាធររាជធានី ខេត្ត ឱ្យមានការប្រុងប្រយ័ត្នខ្ពស់ពិសេសខេត្តដែលជាប់តាមទន្លេមេគង្គ។
ឯកឧត្តម ជាម ចន្ទ័សោភ័ណ បានបញ្ជាក់ថា ត្បិតខេត្តកំពង់ស្ពឺមិនស្ថិតនៅជាប់តាមដងទន្លេមេគង្គ តែជារៀងរាល់ឆ្នាំខេត្តនេះតែងតែកើតមានជំនន់ទឹកភ្លៀងនៅតាមបណ្តាក្រុង ស្រុក ដែលនេះគឺផ្តើមឡើងពីស្ថានភាពនៃផ្ទៃរងទឹកភ្លៀងធំ ធ្វើឱ្យទឹកត្រូវហូរចាក់ទៅតាមទីទំនាបនានាបង្កជាជំនន់លិចលង់លំនៅដ្ឋាន ស្រែចម្ការ ច្បារដំណាំរបស់ប្រជាពលរដ្ឋ។ ដើម្បីបង្ការ ទប់ស្កាត់ពីគ្រោះទឹកជំនន់ដែលកើតឡើងជាយថាហេតុនេះ អាជ្ញាធរក្រុង ស្រុក ត្រូវតែត្រៀមឱ្យបានស្រេចនូវទីទួលសុវត្ថិភាពសម្រាប់ការស្នាក់នៅបណ្តោះអាសន្នរបស់ប្រជាពលរដ្ឋក្នុងគ្រោះទឹកជំនន់ ហើយទន្ទឹមនឹងនេះក៏ត្រូវត្រៀមនូវស្បៀងបម្រុងសម្រាប់ផ្គត់ផ្គង់ក្នុងដំណាក់កាលនេះផងដែរ។
ជាមួយនឹងការប្រកាសឱ្យអាជ្ញាធរក្រុងស្រុកទាំង៩ត្រៀមបង្ការ បង្កើនការយកចិត្តទុកដាក់ អភិបាលខេត្តកំពង់ស្ពឺក៏បានដាក់បទបញ្ជាយ៉ាងតឹងរឹងទៅដល់កងកម្លាំងប្រដាប់អាវុធហត្ថទាំងបីប្រភេទឱ្យត្រៀមជាស្រេចកម្លាំងសរុប មធ្យោបាយសរុប ដើម្បីចូលរួមឱ្យទាន់ពេលវេលា ហើយជាងនេះមន្ទីរសុខាភិបាលខេត្តក៏ត្រូវចាត់ចែងត្រៀមបម្រុងនូវថ្នាំសង្កូវសម្រាប់បង្ការសង្គ្រោះប្រជាពលរដ្ឋដែលមានជំងឺដង្កាត់ផ្សេងៗ ពិសេសថ្នាំសត្វអសិរពិសទិច ឬខាំ។
ម្យ៉ាងវិញទៀតចំពោះប្រជាពលរដ្ឋរស់នៅតាមមូលដ្ឋានងាយរងគ្រោះ ត្រូបង្កើនការប្រុងប្រយ័ត្នឱ្យបានខ្ពស់ចំពោះកូនចៅ មនុស្សចាស់ ពេលដែលទឹកជំនន់មកដល់ ហើយត្រូវរាយការណ៍ឱ្យបានទាន់ពេលវេលាដល់អាជ្ញាធរមូលដ្ឋាននៅពេលដែលទទួលរងគ្រោះដោយប្រការណាមួយ ដើម្បីឱ្យកម្លាំងបង្ការ សង្គ្រោះអាចជួយអន្តរាគមន៍ទាន់ពេលវេលាផងដែរ ៕
ចែករំលែកព័តមាននេះ