ខេត្តមណ្ឌលគិរី ៖ ខេត្តមណ្ឌលគិរី ស្ថិតនៅភាគឦសាននៃប្រទេសកម្ពុជា ដោយយកឈ្មោះស្របតាមភូមិសាស្ត្រដែលពោរពេញទៅដោយភ្នំ និងព្រៃឈើយ៉ាងធំធេង ខេត្តមួយនេះ ត្រូវបានបង្កើតឡើងក្នុងឆ្នាំ១៩៦១ ដោយព្រះករុណា ព្រះបាទសម្ដេច…
ខេត្តមណ្ឌលគិរី ៖ ខេត្តមណ្ឌលគិរី ស្ថិតនៅភាគឦសាននៃប្រទេសកម្ពុជា ដោយយកឈ្មោះស្របតាមភូមិសាស្ត្រដែលពោរពេញទៅដោយភ្នំ និងព្រៃឈើយ៉ាងធំធេង ខេត្តមួយនេះ ត្រូវបានបង្កើតឡើងក្នុងឆ្នាំ១៩៦១ ដោយព្រះករុណា ព្រះបាទសម្ដេច ព្រះនរោត្តម សីហនុ ព្រះមហាវរក្សត្រ ព្រះ
វររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមតរនកោដ្ឋ។
បច្ចុប្បន្ន ទោះបីមិនទាន់មានឯកសារផ្លូវការណាមួយបញ្ជាក់អំពីចំនួនភ្នំ ដែលមាននៅទូទាំងខេត្តមណ្ឌលគិរី មានចំនួនប៉ុន្មាន? ទំហំនិងកម្ពស់ប៉ុន្មាន? ឬមានឈ្មោះអ្វីខ្លះ? ក៏ពិតមែន ប៉ុន្តែភ្នំជាច្រើនក្នុងទឹកដីនៅខេត្តមណ្ឌលគិរី ទទួលបានការចាប់អារម្មណ៍ ដោយមានអ្នកទេសចរជាតិ និងអន្តរជាតិទៅលេងកម្សាន្ត។ ភ្នំខ្លះ ត្រូវបានអ្នកមូលដ្ឋានគោរពបូជា ភ្នំខ្លះ ត្រូវបានរៀបចំជារមណីយដ្ឋាន ហើយមួយចំនួនធំត្រូវបានកែច្នៃទៅជា សណ្ឋាគារ ឬរមណីដ្ឋានកែច្នៃ ដើម្បីបម្រើវិស័យទេសចរណ៍ ។
ដោយសារខេត្តមណ្ឌលគិរី មានភ្នំច្រើនមិនអាចគណនាអស់ កោះសន្តិភាពសូមលើកយកភ្នំដែលមានឈ្មោះល្បី និងការចាប់អារម្មណ៍ពីមហាជនមួយចំនួន ដើម្បីបង្ហាញពីសក្តារនុពល ក្នុងនោះក្រុងសែនមនោរម្យ ដែលជាមជ្ឈមណ្ឌលកណ្តាលរបស់ខេត្តមណ្ឌលគិរី មានភ្នំ ០១-ភ្នំដោះក្រមុំ ដែលភាសារបស់បងប្អូនជានជាតិដើមភាគតិចហៅថា ភ្នំតាស្រុះយាយភ្លំ ដែលជាបូជនីយ៍ដ្ឋានដ៏ល្បីល្បាញប្រចាំខេត្ត មានចម្ងាយប្រមាណត្រឹមពីរពាន់ម៉ែត្រពីរង្វង់មូលគោព្រៃ ។
នៅពេលលោកអ្នកអញ្ជើញទៅដល់កំពូលភ្នំ ដែលមានកម្ពស់ជាង១០០ម៉ែត្រ តាមរយៈជណ្តើរឬមធ្យោបាយរថយន្តម៉ូតូ ភ្លាមៗ អ្នកនិងទទួលបានអារម្មណ៍ព្រឺសម្បុរតិចៗ ព្រោះតែអាកាសធាតុ
ត្រជាក់ ជាមួយគ្នានោះ លោកអ្នកអាចបន់ស្រន់សុំសេចក្តីសុខពីលោកតាភ្នំដោះក្រមុំ និងគយគន់ ទេសភាពក្រុងសែនមនោរម្យទាំងមូលពីលើកំពូលភ្នំយ៉ាងស្រស់ស្អាត ។
០២-ឃ្លាតពីភ្នំដោះក្រមុំទៅ ប្រមាណបីពាន់ម៉ែត្រ លោកអ្នកអាចទស្សនាសម្រស់ភ្នំសមុទ្រឈើ ដែលមានព្រៃឈើយ៉ាងក្រាស់ក្រែលដាច់កន្ទុយភ្នែក ខ្ពស់ទាបប្រៀបបានរលកសមុទ្រអ៉ីចឹង។ ០៣-ភ្នំសាងស្នេហ៍ដែលមានចម្ងាយប្រហែល៧គីឡូម៉ែត្រ ពីក្រុងសែនមនោរម្យ ដែលត្រូវបានកែច្នៃយ៉ាងល្អស្អាត មានផ្លូវបេតុងដូចអន្ទង់អាំងក៏ទាក់បានអ្នកទេសចរមិនតិចនាក់ទេក្នុងមួយឆ្នាំៗ។០៤-ភ្នំចំការស្រស់ស្តេច ក៏ស្ថិតនៅមិនឆ្ងាយពីក្រុងដែរ មានទេសភាពភ្នំយ៉ាងច្រើនរដូលរណែលខ្ពស់ទាប ដែលជាផ្ទាំងទស្សនីយភាពក៏ពិសេស សម្រាប់ការជួបជុំគ្រួសារពេលល្ងាច ។
ស្រុកអូររាំង គឺជាស្រុកដែលមានសីតុណ្ហភាពត្រជាក់ជាងគេក្នុងចំណោមប្រាំក្រុងស្រុកក្នុងខេត្តមណ្ឌលគិរី និងពោរពេញទៅដោយភ្នំ និងទឹកជ្រោះ ជាពិសេស គឺព្រៃដែនជម្រកសត្វកែវសីមាដែលមានវិសាលភាពផ្ទៃដីជាង៣០ម៉ឺនហិកតា ។ ភ្នំដែលទទួលបានភាពល្បីរន្ទឺជាងគេ គឺ ០១-ភ្នំអណ្តូងស្នេហ៍នៅជិតព្រំដែនកម្ពុជាវៀតណាម ក្នុងឃុំដាក់ដាំ ទីតាំងនេះ មិនទាន់មានការអភិវឌ្ឍន៍ឲ្យបានល្អស្អាតនោះទេ។
០២-ភ្នំស្រឡៅ នៅឃុំសែនមនោរម្យ ស្រុកកែវសីមា ក៏មានភ្នំមួយឈ្មោះកែវសីមា គឺជាភ្នំដែលត្រូវបានអ្នកស្រុកគោរពបូជា និងតែងប្រារព្ឋពិធីសែនព្រេនជារៀងរាល់ឆ្នាំ ។ ចំណែកភ្នំមួយទៀត មានឈ្មោះថា ភ្នំបេង ភ្នំទាំងពីរនេះ ស្ថិតនៅក្នុងឃុំស្រែព្រះ ។
ស្រុកពេជ្រាដា ០១-ភ្នំណាមលៀ ដែលជាភ្នំថ្មសុទ្ធមួយដុំមានផ្ទៃជាង៣០ហិកតា មានប្រជាប្រិយភាពយ៉ាងខ្លាំងទាក់ទាញភ្ញៀវទេសចរ ។ ០២-ភ្នំលុប្រាណ ក៏ជាភ្នំថ្មមួយដែរ តែមានកម្ពស់ទាបជាងភ្នំណាមលៀ និងមិនសូវមានអ្នកទៅលេងកម្សាន្តឡើយ ។ ០៣-ភ្នំយោគរ៉ាវ៉ៃ ជាភ្នំដែលខ្ពស់ជាងគេនៅខេត្តមណ្ឌលគិរី ពេលព្រះអាទិត្យរៀបលិចធ្វើឲ្យភ្នំនេះ រឹតតែមានសម្រស់មួយកំរិតទៀតហើយមានកំពស់ 1 063ម៉ែត្រ ចំណាយពេល6ម៉ោង ដោយថ្មើរជើងឡើងលើភ្នំនេះ នៅទីនោះមានសត្វចំនួន322ប្រភេទរស់នៅក្នុងព្រៃភ្នំនេះផងដែរ សម្រាប់ទីតាំងនៅក្បែរភ្នំណាមលៀរដែរ គឺនៅភូមិពូទឺត ឃុំប៊ូស្រា ស្រុកពេជ្រាដា ។ ស្រុកកោះញែក មានភ្នំបែបប្រពៃណីជំនឿមួយឈ្មោះ ភ្នំក្រោល ជាភ្នំវប្បធម៌ សម្រាប់ការគោរពរបស់អ្នកស្រុក ។
សូមបញ្ជាប់ថា ការរៀបរាប់ឈ្មោះភ្នំខាងលើទាំងអស់នេះ មិនមែនជាការចងក្រងឯកសារផ្លូវការនោះទេ តែជាការរៀបចំឡើងដោយអ្នកយកព័ត៌មានកោះសន្តិភាពប្រចាំខេត្តមណ្ឌលគិរីប៉ុណ្ណោះនិងដោយសង្ខេប ដ្បិតមិនទាន់មានឯកសារជាផ្លូវការអំពីចំនួនភ្នំក្នុងខេត្តមណ្ឌលគិរីពីខាងរដ្ឋបាល ឬជំនាញណាមួយនោះទេ ៕
ចែករំលែកព័តមាននេះ