រាជធានីភ្នំពេញ ៖ ផ្ទះលក់គ្រឿងបន្លាស់រថយន្តនិងគ្រឿងជ័រផ្សេងៗនៅខាងលិចផ្សារដេប៉ូត្រូវបានអគ្គីភ័យឆាបឆេះផ្សែងហុយខ្មួលខ្មាញ់បង្កឲ្យមានការភ្ញាក់ផ្អើលដល់រថយន្តពន្លត់អគ្គិភ័យជាច្រើនគ្រឿងទៅអន្តរាគមន៍បាញ់ពន្លត់។
ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១និង១០នាទីរសៀលថ្ងៃទី១៥ ខែកញ្ញាឆ្នាំ ២០២៤ នៅចំណុចផ្ទះលេខ 38c ផ្លូវលេខ ១៦២ សង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ។
តាមសាក្សីបានឱ្យដឹងថា នៅមុនពេលកើតហេតុគេឃើញភ្លើងបានឆាប់ឆេះចេញពីកន្លែងស្តុក គ្រឿងបន្លាស់រថយន្តនៅជាន់ទី១ នៃផ្ទះលក់គ្រឿងបន្លាស់រថយន្តផ្សែងហុយទ្រលោមបង្កឲ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចមូលដ្ឋានទាក់ទងហៅរថយន្តពន្លត់អគ្គីភ័យជាច្រើនគ្រឿងទៅអន្តរាគមន៍បាញ់ពន្លត។
តាមនគរបាលការិយាល័យបង្ការ ពន្លត់អគ្គីភ័យនិងសង្គ្រោះនៃស្នងការនគរបាលរាជធានីភ្នំពេញបានឲ្យដឹងថា នៅក្នុងហេតុការណ៍នេះរថយន្តពន្លត់អគ្គីភ័យចំនួន ១៣ គ្រឿងបានចេញទៅអន្តរាគមន៍បាញ់ពន្លត់ហើយភ្លើងបានរលត់ទៅវិញពុំបណ្ដាឲ្យឆេះរាលដាលទៅដល់ផ្ទះអ្នកជិតខាងឡើយ។
តាមនគរបាលបានឲ្យដឹងទៀតថា សម្ភារៈគ្រឿងបន្លាស់រថយន្ត គ្រឿងជ័រនិងសម្ភារៈមួយចំនួនទៀតត្រូវបានភ្លើងឆេះរងការខូចខាតតែពុំបណ្ដាឲ្យមនុស្សរងគ្រោះថ្នាក់ឡើយ។
ទាក់ទិននឹងការកើតមានគ្រោះអគ្គីភ័យនេះគេពុំដឹងពីមូលហេតុពិតប្រាកដឡើយសមត្ថកិច្ចកំពុងតែធ្វើការស្រាវជ្រាវ។ទោះបីជាយ៉ាងណាបើតាមម្ចាស់ផ្ទះមានការសង្ស័យថាអគ្គីភ័យនេះបណ្ដាលមកពីឆ្លងចរន្តអគ្គិសនី៕
ចែករំលែកព័តមាននេះ