ទីក្រុងរ៉ង់ហ្គូន៖ ចំនួនអ្នកស្លាប់ដោយសារគ្រោះទឹកជំនន់ និងការបាក់ដីនៅប្រទេសមីយ៉ាន់ម៉ា ឬភូមាកើនឡើងដល់៧៤នាក់ហើយ ហើយមនុស្ស៨៩នាក់ទៀតនៅបាត់ខ្លួន។ មិនដឹងថាពួកគេមានសុខទុក្ខយ៉ាងណានៅឡើយទេ។ ខាងលើនេះជាការផ្សាយរបស់ទូរទស្សន៍ភូមាកាលពីយប់ថ្ងៃសៅរ៍។ កាសែតញូយ៉កថាម (New York…
ទីក្រុងរ៉ង់ហ្គូន៖ ចំនួនអ្នកស្លាប់ដោយសារគ្រោះទឹកជំនន់ និងការបាក់ដីនៅប្រទេសមីយ៉ាន់ម៉ា ឬភូមាកើនឡើងដល់៧៤នាក់ហើយ ហើយមនុស្ស៨៩នាក់ទៀតនៅបាត់ខ្លួន។ មិនដឹងថាពួកគេមានសុខទុក្ខយ៉ាងណានៅឡើយទេ។ ខាងលើនេះជាការផ្សាយរបស់ទូរទស្សន៍ភូមាកាលពីយប់ថ្ងៃសៅរ៍។ កាសែតញូយ៉កថាម (New York Times) ដកស្រង់ប្រភពពីអ្នកស្រុកមកផ្សាយថាចំនួនអ្នកស្លាប់សរុបគឺ១១០នាក់។ ប៉ុន្តែភាគច្រើនគេច្រើនទទួលស្គាល់តួលេខជាផ្លូវការរបស់ទូរទស្សន៍រដ្ឋភូមាច្រើនជាង។
នៅពេលនេះ ដោយសារប្រព័ន្ធទំនាក់ទំនងត្រូវកាត់ផ្ដាច់នៅតំបន់ដាច់ស្រយាល ដូច្នេះការប្រមូលទិន្នន័យអំពីចំនួនអ្នកស្លាប់ពិតជាពិបាក។ សាក្សីជាច្រើននិយាយអំពីការរកឃើញសាកសពមនុស្សរសាត់ទៅតាមខ្សែទឹកហូរយ៉ាងរដូករណែល។ ដូច្នេះ យូរឬឆាប់ តួលេខអ្នកស្លាប់នឹងហក់ឡើងខ្ពស់ជាបន្តទៀត។ គិតទៅត្រឹមតែ១ថ្ងៃប៉ុណ្ណោះ តួលេខអ្នកស្លាប់កើនឡើងលើសមុនជាង២ដង។ ពោលគឺថាកាលពីថ្ងៃសុក្រ អាជ្ញាធរថ្លែងថាអ្នកស្លាប់៣៣នាក់។ ឥឡូវនេះ អ្នកស្លាប់កើនឡើងដល់៧៤នាក់។
ខ្យល់ព្យុះយ៉ាជីវាយប្រហារប្រទេសវៀតណាមមុនគេនៅអាស៊ីអាគ្នេយ៍។ បន្ទាប់មកវាយប្រហារប្រទេសថៃភាគខាងជើងបង្កជាទឹកជំនន់ និងការបាក់ដីនៅខេត្តឆៀងម៉ៃ និងឆៀងរ៉ៃដែលស្ថិតនៅកៀកនឹងប្រទេសភូមា។ ក្រោយមក ខ្យល់ព្យុះវាយប្រហារប្រទេសឡាវ និងភូមាថែមទៀត។ ចំនួនអ្នកស្លាប់សរុបនៅក្នុងប្រទេសទាំងនេះកើនឡើងលើសពី២៦០នាក់។ នេះមិនទាន់គិតទៅដល់ទំហំនៃការខូចខាតទ្រព្យសម្បត្តិ និងការលិចលង់ដីស្រែ-ចម្ការរបស់កសិករ មិនដឹងថាខាតប៉ុន្មានលានដុល្លារនោះទេ។
ការប្រកាសចំនួនអ្នកស្លាប់តាមទូរទស្សន៍របស់រដ្ឋភូមាធ្វើឡើងបន្ទាប់ពីប្រមុខដឹកនាំយោធា លោកមីនអុងឡាំង បានអំពាវនាវឱ្យប្រទេសនានាទូទាំងពិភពលោកផ្ដល់ជំនួយទៅតាមលទ្ធភាពដែលមានដើម្បីជួយសម្រាលទុក្ខលំបាករបស់ប្រជាជនរាប់លាននាក់ដែលប្រឈមនឹងបញ្ហា។ គ្រាន់តែប្រជាជនដែលត្រូវជម្លៀសខ្លួនចេញពីផ្ទះមានចំនួនជាង២៣៥០០០នាក់។
តាំងពីមុនពេលមានគ្រោះទឹកជំនន់នេះទៅទៀត មនុស្ស៣,៤លាននាក់បានចាកចោលផ្ទះសម្បែង និងគ្មានអ្វីបរិភោគឱ្យបានគ្រប់គ្រាន់ទេដោយសារសង្គ្រាម និងអស្ថិរភាពនយោបាយ និងសង្គម។ នៅពេលមានគ្រោះធម្មជាតិនេះទៀត ពួកគេរស់នៅរឹតតែលំបាក។ នេះបើយោងតាមការប្រមើលមើលរបស់ទីភ្នាក់របស់អង្គការសហប្រជាជាតិទទួលបន្ទុកខាងជនភៀសខ្លួន។
តំបន់ទំនាបកណ្ដាលដូចជានៅទីក្រុងម៉ាន់ដាឡេ (Mandalay), បាហ្គោ (Bago), រដ្ឋសានដែលជាប់នឹងព្រំដែនប្រទេសចិន និងរដ្ឋធានីណៃពិដោរដែលជាបេះដូងរបស់ប្រទេសភូមាមានទឹកជន់លិចយ៉ាងល្ហល្ហាចតាំងពីថ្ងៃពុធរហូតមកដល់ពេលនេះមិនទាន់ស្រកទៅវិញនៅឡើយទេ។ លោកមីនអុងឡាំងបានចុះពិនិត្យមើលស្ថានការណ៍ទឹកជំនន់ដល់ទីកន្លែង និងណែនាំឱ្យមន្ត្រីក្រោមឱវាទព្យាយាមទាក់ទងទៅប្រទេសដទៃដើម្បីសុំជំនួយ។ ពួកគេត្រូវប្រសប់ធ្វើនយោបាយការទូតដូចប្រទេសធ្លាប់ធ្វើ។
កាលពីយប់ថ្ងៃសៅរ៍ ទូរទស្សន៍របស់រដ្ឋមីយ៉ាន់ម៉ាផ្សាយថាគ្រាន់តែបូកសរុបការខូចខាតត្រួសៗ ទឹកជំនន់នេះបង្កការខូចខាតស្ពានធំៗ២៤កន្លែង, សាលារៀន៣៧៥ខ្នង, ពុទ្ធមណ្ឌលមួយកន្លែង, វត្តអារាម៤កន្លែង, ទំនប់ទឹក៥កន្លែង, ស្ថានីយអគ្គិសនី១៤កន្លែង, បង្គោលភ្លើងបំភ្លឺផ្លូវ៤៥៦បង្គោល និងផ្ទះរបស់អ្នកស្រុកជាង៦៥០០០ខ្នងនៅភាគកណ្ដាល និងភាគខាងកើត៕
ចែករំលែកព័តមាននេះ