ខេត្តកំពត ៖ ភ្នំល្ងៀងដែលជាសម្បត្តិរបស់រដ្ឋ ត្រូវរលាយនៅពេលឆាប់ៗខាងមុខនេះ ដោយស្នាដៃលោក នាក់ ឌឹម អធិការនគរបាលស្រុកបន្ទាយមាស ប្រសិនបើអាជ្ញាធរពាក់ពន្ធ័គ្មានវិធានការទប់ស្កាត់អោយទាន់ពេលវេលា ។…
ខេត្តកំពត ៖ ភ្នំល្ងៀងដែលជាសម្បត្តិរបស់រដ្ឋ ត្រូវរលាយនៅពេលឆាប់ៗខាងមុខនេះ ដោយស្នាដៃលោក នាក់ ឌឹម អធិការនគរបាលស្រុកបន្ទាយមាស ប្រសិនបើអាជ្ញាធរពាក់ពន្ធ័គ្មានវិធានការទប់ស្កាត់អោយទាន់ពេលវេលា ។
យោងតាមប្រភពពីសំណាក់ប្រជាពលរដ្ឋរស់នៅក្បែរៗភ្នំល្ងៀងភូមិស្ដេចគង់ ឃុំស្ដេចគង់ស្រុកបន្ទាយមាស ខេត្តកំពត បានអោយដឹងថា គ្រឿងចក្ររបស់លោក នាក់ ឌឹម អធិការស្រុកបន្ទាយមាស បានកាយយកថ្មគ្រួសក្រហមជាច្រើនឆ្នាំមកហើយ មិនឃើញមានអ្នកណាមកហាមឃាត់នោះទេ ទំនងក្រុមមន្ត្រីពាក់ពន្ធ័ទាំងនោះសង្ស័យត្រូវដងត្រូវផ្លែគ្នាផងក៏ថាបាន។
ប្រភពច្បាស់ការចេញពីមន្ត្រីនៃសាលាស្រុកបន្ទាយមាសសុំមិនបញ្ចេញឈ្មោះបញ្ជាក់ថាលោកអធិការខាងលើ មិនមែនត្រឹមតែកាយភ្នំល្ងៀងនោះទេ ថែមប្រពន្ធរបស់លោកមានក្រុមហ៊ុនដេញផ្លូវគំរោងមូនិធិឃុំសង្កាត់ ឈ្មោះក្រុមហ៊ុនអាន់ លីណា ដើរដេញថ្លៃពេញខេត្តកំពត ខេត្តតាកែវ និងខេត្តកំពង់ស្ពឺ ជារៀងរាល់ឆ្នាំ ។
ប្រភពដដែលបានបន្តទៀតថា រាល់ដេញថ្លៃគំរោងតាមឃុំសង្កាត់ម្តងៗ គេតែងតែឃើញលោកអធិការូបនេះ ជិះរថយន្តអង្គភាពជូនប្រពន្ធរបស់គាត់ទៅដេញថ្លៃ ចំណែករថយន្តអង្គភាពតែងតែយកទៅចតតាមប៉ុស្ដិ៍រដ្ឋបាលដែលនៅក្បែរៗសាលាឃុំ។
ក្រុមមន្ត្រីដដែលបានអោយដឹងទៀតថា បើក្រុមហ៊ុនប្រពន្ធលោកអធិការខាងលើ ដេញថ្លៃបានធ្វើផ្លូវនៅខេត្តកំពតវិញ គឺចំណេញកប់ក្ដោង ព្រោះវត្ថុធាតុដើមជាដីក្រហម ជាក្រួសក្រហម ជាថ្មក្រហម របស់លោកអធិការមានស្រាប់នៅលើភ្នំល្ងៀងនេះតែម្ដង មិនចាំបាច់ចំណាយលុយទៅទិញពីការដ្ឋានផ្សេងៗដែលគេមានអាជ្ញាបណ្ណ័ត្រឹមត្រូវនោះឡើយ នេះហើយរបៀបធ្វើនំអត់ប្រើម្សៅ គឺកាយភ្នំរដ្ឋយកទៅធ្វើផ្លូវរដ្ឋ ហើយបើកលុយពីរដ្ឋរឿងអីមិនចេះរកស៊ី…ហេ! ហេ!
ពាក់ព័ន្ធករណីខាងលើ លោកនាក់ ឌឹម អធិការស្រុកបន្ទាយមាស បានអោយកោះសន្តិភាពដឹងថា គ្រឿងចក្ររបស់លោកមិនបានកាយភ្នំល្ងៀងទេ គឺកាយដីមានប្លង់ព្រោះប្រជាពលរដ្ឋលក់អោយ (តែនៅពេលកោះសន្តិភាពសួថាចុះគ្រឿងចក្រកំពុងកាយនៅលើភ្នំល្ងៀង នឹងមានប្លង់ឬទេ បែរជាលោកឆ្លើយថាដីភ្នំ និងមិនមានប្លង់ទេ ហើយលោកក៏បង្វែរឿងទៅជាថា គ្រឿងចក្រនិងជារបស់ប្អូនគាត់ទៅវិញ ។
ចំណែកលោកសោម វិចិត្រ ប្រធានមន្ទីររ៉ែ និងថាមពល ក្រោយទទួលទូរសព្ទ័ដឹងថា កោះសន្តិភាពក៏និយាយថា លោកកំពុងជាប់ប្រជុំដោយមិនបានបកស្រាយតាមសំណួរដែលកោះសន្តិភាពសួរទៅលោកឡើយ ។
ទាំងពលរដ្ឋ និងមន្ត្រីរាជការក្នុងស្រុកបន្ទាយមាសសុទ្ធតែបានដឹងទាំងអស់ថា លោកអធិការដែលមានប្រពន្ធជាថៅកែដេញថ្លៃប្រព្រឹត្តអំពើកេងប្រវ័ញ្ចយកផលក្នុងស្រុកតាមអំពើចិត្ត ហាក់ដូចជាមានអំណាចណាស់ ។
ព័ត៌មានបន្ថែមមានផ្សាយជូននៅលើកាសែតកោះសន្តិភាព។
ចែករំលែកព័តមាននេះ