(វៀតណាម)៖ គិតត្រឹមម៉ោង១០ព្រឹកថ្ងៃទី១០ ខែកញ្ញា ២០២៤ ពលរដ្ឋវៀតណាមច្រើនជាង១០០នាក់បានជួបរឿងអកុសលដោយសារគ្រោះមហន្តរាយធម្មជាតិ ដែលមានសភាពធ្ងន់ធ្ងរជាងគ្រោះទឹកជំនន់កាលពីឆ្នាំ១៩៦៨ និងឆ្នាំ២០០៨ទៅទៀត ។ ឈានមកដល់ថ្ងៃត្រង់ថ្ងៃទី១០ ខែកញ្ញា…
(វៀតណាម)៖ គិតត្រឹមម៉ោង១០ព្រឹកថ្ងៃទី១០ ខែកញ្ញា ២០២៤ ពលរដ្ឋវៀតណាមច្រើនជាង១០០នាក់បានជួបរឿងអកុសលដោយសារគ្រោះមហន្តរាយធម្មជាតិ ដែលមានសភាពធ្ងន់ធ្ងរជាងគ្រោះទឹកជំនន់កាលពីឆ្នាំ១៩៦៨ និងឆ្នាំ២០០៨ទៅទៀត ។
ឈានមកដល់ថ្ងៃត្រង់ថ្ងៃទី១០ ខែកញ្ញា ឆ្នាំ២០២៤ ប្រភពពីសារព័ត៌មានវៀតណាមធំៗ ដូចជា VN express,VTC News និង Hanoi News ជាដើម បានចេញផ្សាយព្រមៗគ្នាថា ទឹកជំនន់នៅភាគខាងជើងប្រទេសវៀតណាម បានឈានដល់សភាពធ្ងន់ធ្ងរបំផុត ដោយសារតែទឹកជំនន់ដែលហូរចេញពីបណ្តាទន្លេធំៗ ជាពិសេស គឺកម្ពស់ទឹកនៃទន្លេក្រហមបានហក់ខ្ពស់ជាង៨៧ម៉ែត្រ បំបែកកំណត់ត្រាកំពូល៥៣ឆ្នាំចុងក្រោយ ខណៈដែលកម្ពស់ទឹកទន្លេកូវ បានឡើងដល់២៩ម៉ែត្រ បំបែកកំណត់ត្រាកំពូល៦៥ឆ្នាំ ។
អ្វីដែលគួរឱ្យកត់សម្គាល់ ក្រៅពីបណ្តាខេត្តភាគខាងជើងដូចជា ខេត្ត Lao Cai, Yen Bai, Thai Nguyen, Son La, Ha Giang, Cao Bang ដែលកំពុងត្រូវលេបត្របាក់ដោយទឹកជំនន់នោះ គឺទឹកជំនន់ទន្លេក្រហម ដែលហៀបនឹងដល់កម្រិតកំពូលមិនធ្លាប់មានក្នុងប្រវត្តិសាស្ត្ររបស់វៀតណាមនោះ ជំរុញរដ្ឋធានីហាណូយទាំងមូល ត្រូវព្រមានពីហានិភ័យ នៃការលិចលង់នៅក្រោមទឹក ។
របាយការណ៍បច្ចុប្បន្នភាព គិតត្រឹមម៉ោង១០ព្រឹក ថ្ងៃអង្គារ ទី១០ ខែកញ្ញា ពលរដ្ឋវៀតណាមច្រើនជាង ១០៤នាក់ បានជួបរឿងអកុសល ដោយក្នុងអ្នកស្លាប់៦៥ ខណៈដែល៣៩នាក់ទៀតបន្តបាត់ខ្លួន ហើយអ្នកបាត់ខ្លួនភាគច្រើន គឺស្ថិតក្នុងឧបទ្ទហេតុបាក់ស្ពានធ្លាក់ចូលទន្លេ ទឹកជំនន់ និង បំណាក់ដី។
គ្រោះមហន្តរាយដែលបង្ករឡើងពីព្យុះទីហ្វុង Yagi ជំរុញឱ្យនាយករដ្ឋមន្ត្រី Pham Minh Chinh កាលពីថ្ងៃទី០៩ ខែកញ្ញា បានចេញសេចក្តីសម្រេចស្តីពីការបែងចែកថវិកាចំនួន ១០០ពាន់លានដុង ឬប្រហែល៤លានដុល្លារ ពីទុនបម្រុងថវិកាជាតិឆ្នាំ២០២៤ ដើម្បីគាំទ្រដល់ខេត្តចំនួន ៥ ដែលរងផលប៉ះពាល់ ។
មន្ត្រីជាន់ខ្ពស់ក្រសួងកសិកម្មវៀតណាមបាននិយាយដោយភ្ញាក់ផ្អើលថា បរិមាណទឹកភ្លៀងដែលធ្លាក់ក្នុងរយៈពេលតែមួយថ្ងៃនៅតាមបណ្តាខេត្តភាគខាងជើង គឺច្រើនជាងមធ្យមភ្លៀងធ្លាក់ពេញមួយខែកញ្ញារៀងរាល់ឆ្នាំ ។ ភ្លៀងខ្លាំងបែបនេះ បង្កើតឱ្យមានទឹកជំនន់ភ្លាមៗ ការបាក់ដីជំនន់ទន្លេ និងការគំរាមកំហែងដល់ទំនប់វារីអគ្គិសនីធំៗ។
មជ្ឈមណ្ឌលជាតិ សម្រាប់ការព្យាករណ៍ជលសាស្ត្រឧតុនិយមបានពន្យល់ថា មូលហេតុនៃភ្លៀងធ្លាក់ខ្លាំងនៅភាគខាងជើងមិនត្រឹមតែឥទ្ធិពលនៃព្យុះYagi ប៉ុណ្ណោះទេ ប៉ុន្តែវាក៏ជាឥទ្ធិពលនៃសម្ពាធត្រូពិចដែលកំពុងឆ្លងកាត់តំបន់នេះ។ តាមការព្យាករណ៍ថា ឥទ្ធិពលទាំងពីរនេះនឹងបង្កឱ្យមានភ្លៀងធ្លាក់បន្តគ្រប់ដណ្តប់ប៉ែកខាងជើងវៀតណាមរហូតដល់ថ្ងៃទី១២ ខែកញ្ញា។
បន្ថែមពីលើទឹកជំំននន់ នាយកដ្ឋានឧតុនិយមក៏បានព្រមានអំពីហានិភ័យខ្ពស់នៃការរអិលបាក់ដីនៅក្នុងខេត្តចំនួន១៥ ខណៈដែលឧបទ្ទហេតុបាក់ដីបានកើតមានជាបន្តបន្ទាប់នៅតាមតំបន់លំនៅឋានដែលជាប់ជើងភ្នំ រួមទាំងតាមផ្លូវថ្នល់ បណ្តាលឱ្យមនុស្សស្លាប់ជាច្រើននាក់ ជាក់ស្តែងនៅខេត្តឡៅកៃ បំណាក់ដី ៣លើកបណ្តាលឱ្យមនុស្សស្លាប់១៩នាក់ និងបាត់ខ្លួន១១នាក់ ។ នៅខេត្ត Cao Bang បំណាក់ដីសម្លាប់មនុស្ស១៧នាក់ បាត់ខ្លួន១៦នាក់ និងរបួស ១៧នាក់; នៅខេត្ត Hoa Binh បំណាក់ដីសម្លាប់មនុស្ស ៤នាក់ ហើយនៅខេត្ត Yen Bai បំណាក់ដីសម្លាប់មនុស្ស ៣នាក់។
សរុបជារួមមកដល់ពេលនេះ ឥទ្ធិពលនៃព្យុះ Yagi ធ្វើឱ្យពលរដ្ឋវៀតណាមដែលស្លាប់ និងបាត់ខ្លួន មានចំនួនលើសពី ១០០នាក់ហើយ ខណៈមនុស្សប្រមាណ៧៥២ទៀតរងរបួស និងរាប់សែននាក់កំពុងជន្លៀសខ្លួនចេញពីទឹកជំនន់។ ទឹកជំនន់ដែលកំពុងជន់លិចបានបណ្តាលឱ្យខូចខាតស្រូវជាង១៤ម៉ឺនហិកតា, ដំណាំចម្រុះជិត៣ម៉ឺនហិកតា; ចម្អារផ្លែឈើជាង១ម៉ឺនហិកតា; កម្ទេចទ្រុងវារីវប្បកម្មចំនួនជាង១៥០០កន្លែង និងសម្លាប់សត្វចិញ្ចឹមជិត ១លានក្បាល។ ក្រៅពីនោះ ខ្យល់ព្យុះ ធ្វើឱ្យផ្ទះជិតកន្លះលានខ្នង អគារពាណិជ្ជកម្ម ហាងទំនិញ ការិយាល័យ សាលារៀន បង្គោលភ្លើង អង់តែនទូរស័ព្ទ រួមទាំងហេដ្ឋារចនាសម្ព័ន្ធជាច្រើនត្រូវបានបំផ្លិចបំផ្លាញ ដោយការសន្និដ្ឋានជាបឋម ទំហំនៃការខូចខាតរបស់វៀតណាមលើកនេះ បើគិតជាទឹកប្រាក់អាចឈានដល់ខ្ទង់រាប់ពាន់លានដុល្លារឯណោះ ៕
ចែករំលែកព័តមាននេះ