ខេត្តតាកែវ ៖ សង្គមមនុស្សបច្ចុប្បន្ន ពោរពេញទៅដោយការសម្តែង និងការកុហកបោកប្រាស់ ដើម្បីតែផលប្រយោជន៍បុគ្គល ឬក្រុមពេលខ្លះ សូម្បីតែសកម្មភាពសប្បុរសធម៌ ដែលទាក់ទៅនឹងរឿងរ៉ាវកម្សត់ទាក់ចិត្តមហាជននោះក៏ត្រូវបានជនឆ្លៀតឱកាសមួយចំនួន យកមកកាលៃ…
ខេត្តតាកែវ ៖ សង្គមមនុស្សបច្ចុប្បន្ន ពោរពេញទៅដោយការសម្តែង និងការកុហកបោកប្រាស់ ដើម្បីតែផលប្រយោជន៍បុគ្គល ឬក្រុមពេលខ្លះ សូម្បីតែសកម្មភាពសប្បុរសធម៌ ដែលទាក់ទៅនឹងរឿងរ៉ាវកម្សត់ទាក់ចិត្តមហាជននោះក៏ត្រូវបានជនឆ្លៀតឱកាសមួយចំនួន យកមកកាលៃ ធ្វើជាមុខរបររកស៊ីទាញយកផលចំណេញ និយាយឱ្យចំព្រោះតែលុយ មិនខ្លាចបុណ្យបាបសូម្បីសោះតែម្តង ។
ជាក់ស្តែងថ្មីៗរឿងរ៉ាវស្រដៀងគ្នានេះបានកើតឡើងទៅលើទីអារាមមួយកន្លែង នៅខេត្តតាកែវ ដែលមានឈ្មោះថាវត្តផ្ចឹកជ្រុំ ដោយសារព្រះវិហាររបស់វត្តមួយភាគធំ ត្រូវបានបំផ្លិញបំផ្លាញដោយអគ្គិភ័យ កាលពីយប់ថ្ងៃទី២៣ ខែសីហា ឆ្នាំ ២០២៤ នោះ លោកគ្រូចៅអធិការ ព្រះនាម ចយ ពៅ បានបង្ហោះសារអំពាវនាវរកជំនួយតាមហ្វេសប៊ុក ។
ការបង្ហោះរបស់ចៅអធិការវត្តផ្ចឹកជ្រុំ ត្រូវបានឆ្លើយតបជាវិជ្ជមានពីសប្បុរសជន និងពុទ្ធិបរិស័ទ្ធជិតឆ្ងាយដោយបាននាំគ្នាចូលរួមបរិច្ចាគជាថវិកាតាមសន្ធាជ្រះថ្លារៀងៗខ្លួនទាំងផ្ទាល់ និងភាគច្រើនបា.ញ់តាមQR Code ។
ដោយមើលឃើញថា សារបង្ហោះរបស់ព្រះចៅអធិការវត្តផ្ចឹកជ្រុំ ដែលមានភាពកម្សត់ចាក់ដោត និងអន្ទងចិត្តសប្បុរសជនមានសន្ទុះកាន់តែ ច្រើននោះ ស្រាប់តែក្រុមជនឆ្លៀតឱកាសបានចម្លងយកខ្លឹមសារ និងរូបភាពរបស់លោកគ្រូចៅអធិការ ទៅបង្កើតជាផេកក្លែងក្លាយ ហើយបង្ហោះសារដូចគ្នានេះ ដើម្បីប្រមូលជំនួយពីសប្បុរសជន ចូលទៅក្នុងហៅប៉ៅផ្ទាល់ខ្លួនតាមរយៈការបន្លំដាក់ QR Code របស់ពួកគេ ។
សកម្មទាំងនេះ ជនរងគ្រោះមិនមែនតែអ្នកដែលបានបា.ញ់លុយទៅអោយក្រុមឆ្លៀតឱកាសទាំងនោះប៉ុណ្ណោះទេ ប៉ុន្តែវា គឺជាការរងគ្រោះផ្ទួនៗសម្រាប់វត្តវត្តផ្ចឹកជ្រុំ ព្រោះចៅអធិការក៏បង្ហោះសុំជំនួយ ហើយក្រុមឆ្លៀតឱកាសក៏បង្ហោះសារបន្តនៅពេលដែលផេកក្លែងក្លាយត្រូវបានទម្លាយ មហាជនដែលដឹងលឺអាចនឹងខ្លាចរអារលែងហ៊ានធ្វើបុណ្យ ទាំងផេកពិត ទាំងផេកក្លែងក្លាយ ព្រោះតែពួកគាត់ខ្លាចរអា ដោយបែងចែកមិនដាច់មួយណាពិតមួយណាក្លែងក្លាយ ។ ដោយពុំអាចទ្រាំបាន នៅថ្ងៃនេះ លោកគ្រូចៅអធិការ ចយ ពៅ បានធ្វើការផ្សាយផ្ទាល់តាមហ្វេសប៊ុក និងបង្ហោះវីដេអូបកអាក្រាត ជនខិលខូច និងអំពាវនាវ សូមសប្បុរសជន មេត្តាកុំចា.ញ់បោក ជនខិលខូចទាំងនោះ ។
ក្រៅពីមានជនបោកប្រាក់តាមហ្វេសបុកហើយនោះ លោកគ្រូចៅអធិការក៏បានបញ្ជាក់ឱ្យដឹងថា មានជនបោកប្រាស់ម្នាក់នៅខាងក្រៅហ្វេសបុកបានស៊ីដាច់ថវិកាសប្បុរសជន ដែលបានចូលរួមជួសជុលព្រះវិហារចំនួន៦៥០ដុល្លារ និងលុយខ្មែរ២លានរៀល រត់គេចខ្លួនបាត់ស្រមោលថែមទៀតផង ។
សូមជម្រាបថា ព្រះវិហារនៅក្នុងវត្តផ្ចឹកជ្រុំ ឃុំសំរោង ស្រុកត្រាំកក់ ខេត្តតាកែវ ត្រូវបានរងការបំផ្លាញមួយភាគធំ ដោយអគ្គិភ័យឆាបឆេះ កាលពីយប់ថ្ងៃទី២៣ ខែសីហា ឆ្នាំ២០២៤ ហើយសម្រាប់សប្បុរសជន ដែលចង់ចូលរួមបរិច្ចាគអាចទំនាក់ទំនង ទៅកាន់លេខទូរស័ព្ទដៃរបស់លោកគ្រូចៅអធិកា ចយ ពៅ ដោយផ្ទាល់តាមលេខ 012 93 95 14 និង 090 93 95 14៕ ដោយ៖ អោម ចែតច័ន្ទណារ៉ា
ចែករំលែកព័តមាននេះ