ទីក្រុងដាម៉ាស់៖ បន្ទាប់ពីវាយប្រហារទល់នឹងពួកហាម៉ាស់, ហ៊ូទី និងហេស្បូឡាមិនទាន់អស់ចិត្ត ឥឡូវនេះ អ៊ីស្រាអែលវាយរាលដាលទៅដល់ប្រទេសស៊ីរីថែមទៀត។ ថ្មីៗនេះ ការវាយប្រហាររបស់អ៊ីស្រាអែលមួយប្រាវទៅលើទីតាំងមួយចំនួនរបស់យុទ្ធជនដែលប្រឆាំងនឹងអ៊ីស្រាអែលនៅស៊ីរីបានផ្ដាច់ផ្ដិលជីវិតមនុស្សយ៉ាងតិច១៦នាក់។ នេះបើយោងតាមការផ្សាយរបស់សារព័ត៌មានរដ្ឋស៊ីរី។ ទោះជាយ៉ាងណាក្ដី…
ទីក្រុងដាម៉ាស់៖ បន្ទាប់ពីវាយប្រហារទល់នឹងពួកហាម៉ាស់, ហ៊ូទី និងហេស្បូឡាមិនទាន់អស់ចិត្ត ឥឡូវនេះ អ៊ីស្រាអែលវាយរាលដាលទៅដល់ប្រទេសស៊ីរីថែមទៀត។ ថ្មីៗនេះ ការវាយប្រហាររបស់អ៊ីស្រាអែលមួយប្រាវទៅលើទីតាំងមួយចំនួនរបស់យុទ្ធជនដែលប្រឆាំងនឹងអ៊ីស្រាអែលនៅស៊ីរីបានផ្ដាច់ផ្ដិលជីវិតមនុស្សយ៉ាងតិច១៦នាក់។ នេះបើយោងតាមការផ្សាយរបស់សារព័ត៌មានរដ្ឋស៊ីរី។ ទោះជាយ៉ាងណាក្ដី អ៊ីស្រាអែលមិនបានប្រកាសទទួលស្គាល់ថានេះជាស្នាដៃរបស់ខ្លួនទេ។
ស៊ីរីចាត់ទុកថានេះជាការវាយប្រហារដែលសម្លាប់មនុស្សច្រើនមិនធ្លាប់មានចាប់តាំងពីការវាយប្រហារមួយប្រាវរបស់អ៊ីស្រាអែលកាលពីខែមេសាទៅលើស្ថានកុងស៊ុលអ៊ីរ៉ង់ប្រចាំនៅទីក្រុងដាម៉ាស់ ប្រទេសស៊ីរី បណ្ដាលឱ្យស្លាប់មនុស្សជាច្រើន។ ប្រព័ន្ធផ្សព្វផ្សាយបានដកស្រង់សម្ដីរបស់មន្ត្រីយោធាស៊ីរីមកចុះផ្សាយថាអ៊ីស្រាអែលបាញ់ជាច្រើនគ្រាប់ចូលទឹកដីស៊ីរីនៅម៉ោង១១:២០យប់មិញ។ ពួកគេបាញ់សំដៅទីតាំងយោធានៅភាគកណ្ដាល។ ប៉ុន្តែប្រភពនោះមិនបានបរិយាយលម្អិតទេ។
ប្រភពនេះប្រាប់ថាប្រព័ន្ធការពារដែនអាកាសរបស់ស៊ីរីអាចបាញ់ទម្លាក់មីស៊ីលរបស់អ៊ីស្រាអែលបានជាច្រើនគ្រាប់។ ប្រព័ន្ធផ្សព្វផ្សាយសាណា (SANA) របស់ស៊ីរីបានដកស្រង់សម្ដីរបស់មន្ត្រីសុខាភិបាលមកចុះផ្សាយថាមនុស្ស៣៦នាក់រងរបួសដោយសារគ្រាប់មីស៊ីលរបស់អ៊ីស្រាអែល។ នៅក្នុងចំណោមនោះ ៦នាក់រងរបួសធ្ងន់កំពុងស្ថិតនៅក្នុងបន្ទប់សង្គ្រោះបន្ទាន់។
មន្ត្រីស៊ើបការណ៍សម្ងាត់២រូបប្រចាំតំបន់កើតហេតុខាងលើបង្ហើបឱ្យដឹងថាមជ្ឈមណ្ឌលស្រាវជ្រាវអាវុធគីមីដ៏សំខាន់មួយរបស់យោធាដែលស្ថិតនៅក្បែរតំបន់ម៉ាស៊ីយ៉ាស់ (Masyaf) នៃខេត្តហាម៉ា (Hama) រងការបាញ់ប្រហារជាច្រើនគ្រាប់។ គេជឿជាក់ថាទីនេះជាកន្លែងជ្រកកោននៃក្រុមអ្នកជំនាញយោធារបស់អ៊ីរ៉ង់ដែលកំពុងសិក្សាស្រាវជ្រាវអំពីការផលិតអាវុធ។
ប៉ុន្តែមន្ត្រីជាន់ខ្ពស់យោធាប្រចាំតំបន់នោះដែលគាំទ្ររដ្ឋាភិបាលស៊ីរី និងអ៊ីរ៉ង់ថ្លែងថានោះមិនមែនជាទីតាំងស្រាវជ្រាវអាវុធគីមីទេ។ ក្រសួងការបរទេសស៊ីរីប្រកាសថ្កោលទោសការវាយប្រហារនេះ និងចាត់ទុកថានេះជាអំពើឈ្លានពានដ៏គឃ្លើន។ ក្រៅពីអ្នកស្លាប់១៦នាក់ និងរបួស៣៦នាក់នោះ គ្រាប់មីស៊ីលក៏បានបំផ្លិចបំផ្លាញអគារ ឬផ្ទះរបស់អ្នកស្រុកអស់១ចំនួនផងដែរ។
អ្នកនាំពាក្យក្រសួងការបរទេសអ៊ីរ៉ង់ថ្លែងថារដ្ឋាភិបាលរបស់ខ្លួនសូមថ្កោលទោសយ៉ាងខ្លាំងក្លាចំពោះការវាយប្រហារនេះ។ ក្រសួងចាត់ទុកថានេះជាអំពើឧក្រិដ្ឋកម្មទៅលើប្រទេសស៊ីរី។ ប្រព័ន្ធផ្សព្វផ្សាយរបស់ស៊ីរីឱ្យដឹងថាការវាយប្រហារនោះក៏បង្កជាអគ្គិភ័យឆាបឆេះអគារ២កន្លែងផងដែរ។
គួរកត់សម្គាល់ថាជាច្រើនខែឆ្នាំមកហើយ អ៊ីស្រាអែលតែងតែសម្រួចមាត់វាយប្រហារទីតាំងមួយចំនួននៅប្រទេសស៊ីរីដែលខ្លួនចាត់ទុកថាជាកន្លែងលាក់បំពួនពួកអ៊ីរ៉ង់ ឬពួកចលនាប្រដាប់អាវុធដែលគាំទ្រដោយអ៊ីរ៉ង់។ ពួកគេជាអ្នកជួយជ្រោមជ្រែងរបបដឹកនាំរបស់លោកអាល់អាសាតនៅប្រទេសស៊ីរីកាលពីអំឡុងពេលផ្ទុះសង្គ្រាមស៊ីវិល។ ក្រោយព្រឹត្តិការណ៍វាយប្រហារថ្ងៃទី៧ ខែតុលា ឆ្នាំ២០២៣ អ៊ីស្រាអែលរឹតតែបង្កើនការវាយប្រហារទៅលើទីតាំងនានានៅប្រទេសស៊ីរីថែមទៀត៕
ចែករំលែកព័តមាននេះ