អ្នកវិទ្យាសាស្ត្រក្សេតសាស្ត្រកម្ពុជា ជាពិសេស គឺអ្នកដែលបម្រើការនៅវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជានៃក្រសួងកសិកម្ម រុក្ខាប្រមាញ់ និងនេសាទ បានផលិត និងបន្សុទ្ធពូជស្រូវនៅក្នុងស្រុកជាច្រើន ប៉ុន្តែមកដល់ពេលនេះ កសិករកម្ពុជាភាគច្រើននៅពុំទាន់បានប្រើប្រាស់…
អ្នកវិទ្យាសាស្ត្រក្សេតសាស្ត្រកម្ពុជា ជាពិសេស គឺអ្នកដែលបម្រើការនៅវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជានៃក្រសួងកសិកម្ម រុក្ខាប្រមាញ់ និងនេសាទ បានផលិត និងបន្សុទ្ធពូជស្រូវនៅក្នុងស្រុកជាច្រើន ប៉ុន្តែមកដល់ពេលនេះ កសិករកម្ពុជាភាគច្រើននៅពុំទាន់បានប្រើប្រាស់ និងដាំដុះនូវពូជស្រូវទាំងនោះទេ ដោយប្រើប្រាស់តែពូជស្រូវនាំចូល ។
ពូជស្រូវដែលបន្សុទ្ធឡើង វិទ្យាស្ថានមានច្រើនហើយថ្មីៗនេះពូជសុទ្ធ តែមានលក្ខណៈពិសេស ដូចជា ក្លិនក្រអូប គុណភាពអង្ករល្អ វែងរលូន និងបាយទន់ឆ្ងាញ់ពិសា គឺពូជចំប៉ីស៧០ និងពូជស្រូវសែនក្រអូប០១ជាដើម ។ ពូជស្រូវទាំងពីរនេះត្រូវបានក្រសួងលើកទឹកចិត្តប្រជាកសិករអោយធ្វើការដាំដុះជាបន្តបន្ទាប់ ប៉ុន្តែទោះបីជាយ៉ាងណាក៏ដោយកសិករដែលកំពុងតែដាំដុះ គឺអាចមិនច្រើននោះទេ ។
លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានអោយកម្មវិធីលុយនៃសារព័ត៌មានកោះសន្តិភាពដឹងថា ក្រសួងមិនមានតួរលេខច្បាស់លាស់លើចំនួនប្រជាកសិករ និងទំហំដីកសិកម្ម ដែលធ្វើការដាំដុះដោយពូជស្រូវ នៅក្នុងស្រុកនៅឡើយទេ ។ លោកបានប្រាប់តាមបណ្តាញសង្គមតេឡេក្រាមដោយខ្លីថា «យើងមិនមានតួលេខទេ ដោយកន្លងមកកសិករភាគច្រើនដាំពូជស្រូវនាំចូល» ។
លោក ទី និត ជាកសិករប្រជាពលរដ្ឋម្នាក់ឃុំពពេល ស្រុកត្រាំកក់ ខេត្តតាកែវ បានឲ្យដឹងថា លោកធ្លាប់ឭពូជស្រូវផ្សេងៗដូជជា ចំប៉ីសរ៧០ និងពូជស្រូវមួយចំនួនទៀត ប៉ុន្តែមិនដែលដឹងថា តើពូជនឹងគេទៅយកពីណាមក។ លោកបានបន្តថា តាមបទពិសោធន៍កន្លងមក ពូជស្រូវ ដែលបង្កបង្កើនផល គឺលោករក្សាទុកពីទិន្នផលដែលប្រមូលកន្លងមក ហើយនៅពេលខ្វះខាត គឺទៅទិញតាមផ្សារ ។
លោកបានបន្តថា «ពេលឭគេផ្សព្វផ្សាយចង់សាក ចង់បានស្រូវពូជល្អយកមកព្រួសនឹងគេដែរ ប៉ុន្តែមិនដឹងទៅរកឯណា ។ ចឹងមានស្អីធ្វើនឹង បើមិនចឹងទេ ខែច្រូតច្បាស់ជាច្រូតស្មៅហើយ »។
ថ្មីៗនេះ ដូចជា ពូជសែនក្រអូប០១ គឺជាពូជស្រូវស្រាល មិនប្រកាន់រដូវដែលបន្សុទ្ធ និងបញ្ចេញដោយវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ។ ពូជនេះផ្ដល់ទិន្នផលខ្ពស់ និងជាពិសេស វាមានតម្លៃខ្ពស់នៅលើទីផ្សារជាតិ និងអន្តរជាតិ ។ ពូជស្រូវសែនក្រអូប០១ ជាពូជស្រូវស្រាលមិនប្រកាន់រដូវដែលធ្វើឱ្យពូជនេះ អាចចេញផ្កាបានគ្រប់ពេលវេលានៅពេលដែលលក្ខខណ្ឌដាំដុះអំណោយផល ។ ហេតុនេះហើយ ពូជស្រូវនេះអាចដាំដុះបានទាំងនៅដើមរដូវវស្សាក្នុងរដូវស្សា ចុងរដូវវស្សា ស្រូវប្រដេញទឹក និងលក្ខខណ្ឌប្រាំងស្រោចស្រពក៏បាន ។
យោងតាមរបាយការណ៍របស់សហព័ន្ធស្រូវអង្ករកម្ពុជាបានអោយដឹងថា ក្នុងរយៈពេល៨ខែដំបូងឆ្នាំនេះ កម្ពុជាបាននាំចេញអង្ករទៅក្រៅប្រទេសប្រមាណជា៤១២.០២៣ តោន និងរកប្រាក់ចំនូលបានប្រមាណជា៣០៥លានដុល្លារអាមេរិក ។
ប្រភពដដែលបន្តថា ក្រុមហ៊ុនចំនួន៥៣ បានធ្វើការនាំចេញអង្ករទៅកាន់ប្រទេសចំនួន ៦៤ ក្នុងនោះប្រទេសចិន ជាទីផ្សារអង្ករធំជាងគេ មានរហូតដល់ ៧៧.៧៩២តោន និងទទួលបានចំណូលជាង៤៨លានដុល្លារអាមេរិក តាមពីក្រោយដោយសហគមន៍អឺរ៉ុបចំនួន២០៨.២០៧តោន និងប្រទេសក្នុងតំបន់អាស៊ានចំនួន៨៣.០៩៥តោន ។
ប្រភពបន្តថា ការនាំចេញរបស់កម្ពុជាលើអង្កដូចជា អង្កប្រណិត អង្កស និងអង្កសរីរាង្គ ដោយឡែករយៈពេល៨ខែនេះក៏បានការនាំចេញស្រូវទៅកាន់ប្រទេសជិតខាងកម្ពុជា ចំនួនជាង ៣,៣លានតោន និងរកចំណូលបាន៩១៨លានដុល្លារអាមេរិក៕
ចែករំលែកព័តមាននេះ