ទីក្រុងកៀវ៖ នៅទីបំផុត រដ្ឋមន្ត្រីការបរទេសអ៊ុយក្រែន លោកឌីមីត្រូ ឃូឡេបា (Dmytro Kuleba) បានប្រគល់លិខិតលាលែងពីតំណែងជូនទៅរដ្ឋសភា និងស្ថាប័នពាក់ព័ន្ធដទៃទៀតនៅល្ងាចថ្ងៃពុធដើម្បីជាផ្នែកមួយនៃផែនការរុះរើគណៈរដ្ឋមន្ត្រីដ៏ធំមួយរបស់លោកហ្សេឡិនស្គី។ ខាងលើនេះជាការអះអាងរបស់អ្នកនាំពាក្យរដ្ឋសភា។
លោកឃូឡេបាធ្លាប់កាន់តំណែងជារដ្ឋមន្ត្រីការបរទេសអ៊ុយក្រែនចាប់តាំងពីឆ្នាំ២០០០រហូតមកដល់ថ្ងៃលាលែងពីតំណែង។ លោកជាកម្លាំងចលករដ៏សំខាន់ដែលជួយឱ្យអ៊ុយក្រែនទទួលបានអាវុធពីក្រុមសម្ព័ន្ធមិត្ត និងក៏ជាអ្នកខិតខំបញ្ចុះបញ្ចូលឱ្យក្រុមប្រទេសជាដៃគូបន្ធូរបន្ថយលក្ខខណ្ឌនៃការប្រើប្រាស់អាវុធជំនួយទាំងនោះដើម្បីឱ្យអ៊ុយក្រែនអាចបាញ់ចូលទឹកដីរុស្ស៊ី។
កាលពីរដូវផ្ការីកឆ្នាំ២០២៣ លោកបានស្នើសុំឱ្យសម្ព័ន្ធមិត្តបញ្ជូនប្រព័ន្ធមីស៊ីលការពារដែនអាកាសម៉ាកប៉ាទ្រីយ៉ូត(Patriot)។ លោកថាបើពួកគេមិនផ្ដល់ជូនឱ្យបានឆាប់រហ័សទេ អ៊ុយក្រែននឹងជួបគ្រោះថ្នាក់ធំជាមិនខាន។ អ្នកនាំពាក្យរដ្ឋសភាបានបង្ហោះរូបថតលិខិតដែលសរសេរជាអក្សរដៃរបស់លោកឃូឡេបាចុះថ្ងៃទី៤ ខែកញ្ញានេះតែម្ដង។ នៅក្នុងលិខិតនោះ លោកឃូឡេបាស្នើសុំឱ្យក្រុមអ្នកតំណាងរាស្ត្រទទួលយកលិខិតរបស់លោកដែលលាលែងពីតំណែងរដ្ឋមន្ត្រីការបរទេសអ៊ុយក្រែន។
មួយថ្ងៃមុននេះ មន្ត្រីជាន់ខ្ពស់អ៊ុយក្រែនជាច្រើនរូបក៏បានប្រគល់លិខិតលាលែងពីតំណែងផងដែរ។ នៅក្នុងចំណោមនោះមានប្រធានគ្រប់គ្រងគ្រឿងសព្វាវុធអ៊ុយក្រែន លោកអូឡិចសាន់ដឺ កាមីស៊ីន (Oleksandr Kamyshin), រដ្ឋមន្ត្រីយុត្តិធម៌ និងឧបនាយករដ្ឋមន្ត្រីម្នាក់ដែលជួយបញ្ចុះបញ្ចូលឱ្យសហភាពអឺរ៉ុបទទួលយកអ៊ុយក្រែនជាសមាជិករបស់ខ្លួន។ អ្នកដែលលាលែងពីតំណែងនៅសប្ដាហ៍នេះនឹងទៅកាន់តួនាទីផ្សេងនៅក្នុងជួររដ្ឋាភិបាលនារយៈពេលប៉ុន្មានថ្ងៃខាងមុខនេះ។
ប្រធានាធិបតីអ៊ុយក្រែន លោកហ្សេឡិនស្គី គូសបញ្ជាក់ត្រង់ចំណុចនេះថាមូលហេតុដែលលោករុះរើគណៈរដ្ឋមន្ត្រីដើម្បីពង្រឹងការដឹកនាំ និងសម្រេចលទ្ធផលទៅតាមការចង់បានរបស់ប្រទេសជាតិ។ លោកថ្លែងបន្តទៀតថាអ៊ុយក្រែនត្រូវតែធ្វើការឲ្យបានស៊ីសង្វាក់គ្នារវាងរដ្ឋាភិបាលថ្នាក់ជាតិ និងមន្ត្រីថ្នាក់មូលដ្ឋាន។ អ៊ុយក្រែនកំពុងត្រៀមខ្លួនទប់ទល់នឹងលទ្ធភាពនៃការវាយប្រហាររបស់រុស្ស៊ីនៅរដូវរងាឆ្នាំនេះ និងដើមឆ្នាំក្រោយ។ ដូច្នេះ អ៊ុយក្រែនចាំបាច់ត្រូវតែរុះរើគណៈរដ្ឋមន្ត្រី៕
ចែករំលែកព័តមាននេះ