- ភ្នំពេញ
សេចក្តីណែនាំនាពេលថ្មីៗនេះរបស់អគ្គនាយកដ្ឋាន សម្ភារៈបច្ចេកទេសនៃក្រសួងការពារជាតិ ពាក់ព័ន្ធនឹង រថយន្តដែលពាក់ស្លាកលេខ ខ.ម គឺហាក់ដូចជា ដំបៅចាស់រ៉ាំរ៉ៃ ដែលដាក់ថ្នាំមិនចេះត្រូវ ។ ដូច្នេះស្ថាប័ននេះ…
សេចក្តីណែនាំនាពេលថ្មីៗនេះរបស់អគ្គនាយកដ្ឋាន សម្ភារៈបច្ចេកទេសនៃក្រសួងការពារជាតិ ពាក់ព័ន្ធនឹង រថយន្តដែលពាក់ស្លាកលេខ ខ.ម គឺហាក់ដូចជា ដំបៅចាស់រ៉ាំរ៉ៃ ដែលដាក់ថ្នាំមិនចេះត្រូវ ។ ដូច្នេះស្ថាប័ននេះ ជាពិសេសក្រសួងការពារជាតិ គួរតែដល់ពេល ដែលត្រូវវះកាត់ចេញហើយកុំអោយចេះតែបន្តកើតមាន នៅក្នុងសង្គមដដែលតទៅទៀត ។
សេចក្តីជូនដំណឹងដែលបានប្រកាសជាសាធារណៈបានសង្កត់ធ្ងន់ លើការប្រកាន់ខ្ជាប់យ៉ាងម៉ឺងម៉ាត់ ចំពោះបទប្បញ្ញត្តិ នៅក្នុងក្រសួងការពារជាតិ ជាការពង្រឹងយ៉ាងសំខាន់នូវពិធីសារសន្តិសុខជាតិ ។ សេចក្តីជូនដំណឹងនេះ បើសិនជាយើងមិនដែលបានឭពីមុនមកឃើញថា គឺពិតជាឯកសាគតិយុទ្ធមួយ ដែលគេដាក់ចេញនូវគោលការណ៍ណែនាំច្បាស់លាស់សម្រាប់រក្សាគុណវុឌ្ឍិរបស់មន្ត្រី លើការប្រើប្រាស់យានយន្តដែលមានស្លាកលេខ ខ.ម ។
សេចក្តីជូនដំណឹងនេះ គឺជាសារនៃការពញាក់ការប្រុងប្រយ័ត្ន និងការអនុលោម ពង្រឹងគោលការណ៍វិន័យ សន្តិសុខ និងគណនេយ្យភាព ក្នុងវិស័យការពារជាតិរបស់កងកម្លាំងប្រដាប់ អាវុធ ប៉ុន្តែធាតុពិតទៅនេះមិនមែនជាលើកទី១ឡើយ ។
ចំណុចស្នូលនៃសេចក្តីជូនដំណឹងនេះ គឺការទទូចឲ្យកងកម្លាំងទាំងអស់ ដែលពាក់ព័ន្ធនឹងតួនាទីការពារជាតិ ត្រូវតែគោរពច្បាប់ និងបទបញ្ជាពាក់ព័ន្ធនឹងការប្រើប្រាស់រថយន្តដែលពាក់ស្លាកលេខ ខ.ម ឲ្យម៉ឺងម៉ាត់ ខណៈដែលកន្លងមកអ្នកប្រើប្រាស់ស្លាកលេខរថយន្ត ខ.ម មួយចំនួនមានលេចចេញនូវបាតុភាពអសកម្មមួយចំនួន ដែលធ្វើឱ្យប៉ះពាល់ដល់សង្គមសាធារណៈដូចជា បញ្ហាគ្រោះថ្នាក់ចរាចរណ៍ ភាពក្រអឺតក្រទម និងរហូតដល់មានជនបរទេសប្រើប្រាស់វា បង្កបញ្ហាសណ្តាប់ធ្នាប់ក៏មាន ។ រូបភាពអសកម្មជាហូរហែរបែបនេះហើយ ទើបចេះតែទទួលការរិះគន់ពីសាធារណជន ជាពិសេសប៉ះពាល់ដល់កិត្តិយសនៃកងយោធពលខេមរភូមិន្ទទាំងមូល ។
ដោយសារតែបាតុភាពអសកម្មទាំងនេះ អគ្គនាយកដ្ឋានសម្ភារៈបច្ចេកទេស នៃក្រសួងការពារជាតិ និង ក្រសួងផ្ទាល់ គឺត្រូវតែគ្រប់គ្រងការប្រើប្រាស់ស្លាកលេខនេះ ឲ្យបានប្រុងប្រយ័ត្នមិនមែនអ្នកដែលមិនមែនជា កងកម្លាំង អ្នកដែលគ្មានបេសកម្ម និងគ្មានបទបញ្ជាចេះតែប្រើប្រាស់ផ្តេសផ្តាស់ហើយបើកបរបានឡើយ ពីព្រោះវាប៉ះពាល់ដល់កិត្យានុភាពជាតិ ។ ការពង្រឹកការគ្រប់គ្រងការប្រើប្រាស់ស្លាកលេខ កងកម្លាំងនេះ មិនគ្រាន់តែជាបញ្ហានៃបែបបទនីតិវិធីប៉ុណ្ណោះទេ ប៉ុន្តែជាមូលដ្ឋានគ្រឹះនៃការការពារជាតិ និងសេចក្តីថ្លៃថ្នូប្រកបដោយប្រសិទ្ធភាពរបស់កងកម្លាំង ។
អគ្គនាយកដ្ឋានជំនាញនេះ ក៏បានបញ្ជាក់ដោយសង្កត់ធ្ងន់ថា អ្នកប្រើប្រាស់ត្រូវតែជានាយទាហាន ដែលមានសិទ្ធពេញលេញ ហើយមិនអនុញ្ញាតឱ្យជនស៊ីវិល ឬជនបរទេសប្រើប្រាស់បានឡើយហើយការប្រើប្រាស់យានយន្តពាក់ផ្លាកលេខចរាចរខេមរភូមិន្ទ ត្រូវស្របតាមការកំណត់របស់ក្រសួងការពារជាតិ ចំពោះក្រុមហ៊ុនសហការវិនិយោគវិស័យការពារជាតិនានាក៏ត្រូវបានអនុវត្តដូចគ្នា ។ ក្នុងករណីដែលអនុវត្តការប្រើប្រាស់ផ្ទុយខុសពីខ្លឹមសារខាងលើអគ្គនាយកដា្ឋនសម្ភារៈបច្ចេកទេស ក្រសួងការពារជាតិនឹងចាត់វិធានការច្បាប់ជាធរមាន ។
ការគោរពតាមច្បាប់នេះ គឺពិតជាមានអត្ថន័យណាស់ ហើយពាក្យមួយឃ្លារនេះ គឺនឹងនាំអោយមន្ត្រីកងកម្លាំងមានគុណវុឌ្ឍ៍ ប្រសិនបើក្រោយពេលដែលជូនដំណឹងមន្ត្រីកងកម្លាំងទាំងអស់អាចអនុវត្តបានត្រឹមត្រូវ ។ ការអនុវត្តតាមសេចក្តីជូនដំណឹងនេះ វាគឺជាសារមួយដែលប្រាប់សាធារណជនថា ច្បាប់ត្រូវបានពង្រឹង ហើយរាល់លិខិតបទដ្ឋានមានការអនុវត្តពិតប្រាកដមិនមែនមានតែនៅលើក្រដាស ហើយរសាត់តាមខ្យល់ ខណៈដែលបញ្ហា គឺនៅតែជាបញ្ហា។
មកដល់ពេលនេះ បាតុភាពអសកម្មនានាដែលបង្កឡើង ពីអ្នកដែលប្រើប្រាស់រថយន្តពាក់ស្លាកលេខខ.មនេះ គឺពិតជាបានបង្កផលប៉ះពាល់សម្បើមណាស់ ដល់កិត្តិយស និងសេចក្តីថ្លៃថ្នូរបស់កងកម្លាំងប្រដាប់ អាវុធ ដែលជាជន្ទុលទ្រទ្រង់វិស័យការពារជាតិ ។ ករណីដូចជា ជនបរទេសប្រើប្រាស់រថយន្តខ.ម ហើយ បង្កបញ្ហាខុសច្បាប់ គឺរឹតជាបច្ច័យដ៏អវិជ្ជមានប៉ះពាល់ដល់សង្គម ។
ពាក់ព័ន្ធនឹងបញ្ហានេះដែរ គេនៅចាំបានថា កាលរង្វង់អំឡុងឆ្នាំ២០២១ គឺខាងគយបានអនុវត្តបានមួយប្រាវ ដោយបានបង្ខំឲ្យរថយន្តដែលមិនបានបង់ពន្ធហើយ ប្រើប្រាស់ស្លាកលេខខ.ម និងន.ប របស់ក្រសួង មហាផ្ទៃ បានរាប់សិបគ្រឿងដែរ ប៉ុន្តែពេលនេះក៏ហាក់កញ្ជ្រោកឡើងវិញដែលត្រូវតែចាត់វិធានការឲ្យម៉ឺង ម៉ាត់ ។
សរុបទៅ ក្រោយពេលដែលក្រសួងការពារជាតិ បានចេញសេចក្តីជូនដំណឹងនេះ រាល់បាតុភាពអសកម្ម ដែលបណ្តាលមកពីការប្រើប្រាស់រថយន្តដែលពាក់ស្លាកលេខខ.ម នេះ គឺត្រូវតែចាត់វិធានការច្បាប់ឲ្យម៉ឺងម៉ាត់ដោយមិនលើកលែង ។ បើមិនដូច្នេះទេ ទោះអគ្គនាយកដ្ឋានសម្ភារៈបច្ចេកទេស ឬក្រសួងការពារជាតិ ចេញសេចក្តីជូនដំណឹងនេះរាប់សិបលើកក៏ដោយ ក៏វានៅតែមិនមានប្រសិទ្ធភាពដដែល ហើយវានៅតែជា ជំងឺដ៏រ៉ាំរ៉ៃ ។
បញ្ហានៃការប្រើប្រាស់រថយន្តស្លាកលេខ ខ.ម នេះ គឺត្រូវតែវះកាត់ឲ្យដាច់ស្រេចយ៉ាងយូរត្រឹមអាណត្តិទី៧ នេះ បើមិនដូច្នេះទេ សង្គមនៅតែបន្តកើតមាន ហើយភាពរ៉ាំរ៉ៃនេះ គឺជារឿងអសោចនៃកេរ្តរិ៍មរតកជាតិ ។ សកម្មភាពផ្លូវច្បាប់ដើរតួជាអ្នករារាំងការប្រព្រឹត្តិខុស ដែលអាចកើតមាន និងជាយន្តការ ដើម្បីពង្រឹងវិន័យក្នុងជួរ និងក្នុងចំណោមអង្គភាពដែលពាក់ព័ន្ធនឹងកងកម្លាំង ។ ការពង្រឹងការគ្រប់គ្រងនេះបានសម្រេច គឺជាការបញ្ជាក់ឡើងវិញយ៉ាងច្បាស់អំពីការប្តេជ្ញាចិត្តរបស់ក្រសួងការពារជាតិចំពោះសន្តិសុខជាតិ ។ វាគឺជាសក្ខីភាពនៃការធានាថា គ្រប់ទិដ្ឋភាពនៃប្រតិបត្តិការការពារជាតិប្រកាន់ខ្ជាប់នូវគោលការណ៍ណែនាំប្រកបដោយគណនេយ្យភាព សុចរិតភាព និងវិជ្ជាជីវៈ ។
ចំណាត់ការផ្លូវច្បាប់ប្រឆាំងនឹងការរំលោ.ភបំពានណាមួយបន្ថែមទៀត គឺជាការពង្រឹងសារៈសំខាន់នៃបទប្បញ្ញត្តិទាំងនេះ ដោយគូសបញ្ជាក់ពីវិធីសាស្ត្រសកម្មក្នុងការការពារជាតិ ។ នៅក្នុងពិភពលោកដែលការគំរា.មកំហែ.ងផ្នែកសន្តិសុខកំពុងវិវឌ្ឍឥតឈប់ឈរ ភាពច្បាស់លាស់ និងភាពរឹងមាំនៅក្នុងគោលនយោបាយការពារជាតិមិនគ្រាន់តែជាការចាំបាច់ប៉ុណ្ណោះទេ ប៉ុន្តែកាន់តែសំខាន់ ៕
ចែករំលែកព័តមាននេះ