រាជធានីភ្នំពេញ ៖ អតីតតារាសម្តែងជើងចាស់ លោក ចាន់រិទ្ធ មេធានី បានលើកដៃអំពាវនាវដល់ម្ចាស់ផលិតកម្មនានាជួយហៅលោកឲ្យបានថតជាថ្មីឡើងវិញផង ដើម្បីលោកមានប្រាក់ជួយដោះស្រាយជីវភាពដែលកំពុងជួបការលំបាកខ្លាំងនាពេលបច្ចុប្បន្ន ។ ដ្បិតកំពុងរស់នៅតែម្នាក់ឯងនៅក្នុងបន្ទប់ជួលមួយកន្លែងនៅរាជធានីភ្នំពេញ…
រាជធានីភ្នំពេញ ៖ អតីតតារាសម្តែងជើងចាស់ លោក ចាន់រិទ្ធ មេធានី បានលើកដៃអំពាវនាវដល់ម្ចាស់ផលិតកម្មនានាជួយហៅលោកឲ្យបានថតជាថ្មីឡើងវិញផង ដើម្បីលោកមានប្រាក់ជួយដោះស្រាយជីវភាពដែលកំពុងជួបការលំបាកខ្លាំងនាពេលបច្ចុប្បន្ន ។
ដ្បិតកំពុងរស់នៅតែម្នាក់ឯងនៅក្នុងបន្ទប់ជួលមួយកន្លែងនៅរាជធានីភ្នំពេញ លោក ចាន់រិទ្ធិ មេធានី កំពុងផ្ញើវាសនារកប្រាក់តាមរយៈការរត់កង់បីដ៏ចាស់មួយគ្រឿង តែមិនសូវកាក់កប និងរកព្រឹកខ្វះល្ងាច ស្ទើរដាច់បាយម្តងៗ ។
ស្ថិតក្នុងស្ថានភាពដ៏លំបាកនាពេលនេះ តារាសម្តែងជើងចាស់បានស្នើសុំដល់ម្ចាស់ផលិតកម្មនានាមេត្តាជួយហៅលោកថតផង ទោះថតដាក់បណ្តាញសង្គម រឿងខ្លី ហើយសម្តែងជាតួអ្វីក៏ដោយ ដើម្បីលោកអាចមានលទ្ធភាពដោះស្រាយជីវភាពប្រចាំថ្ងៃ ។
លោក ចាន់រិទ្ធិ មេធានី បានអះអាងថា បច្ចុប្បន្ន លោកមានតែរបររត់កង់បីដែលជាមុខរបរខ្នាតតូចសម្រាប់រកទទួលទាន សម្រាប់អាហារបីពេល និងដោះស្រាយទិញថ្នាំព្យាបាលជំងឺប្រចាំកាយ ។
លោកថា ទោះកំពុងមានជំងឺទឹកផ្អែម និងជំងឺមួយចំនួនទៀត ប៉ុន្តែលោកនៅតែខិតខំដោយខ្លួនឯងទាំងឈឺទាំងជា ដើម្បីដោះស្រាយជីវភាព ដ្បិតបច្ចុប្បន្ន លោករស់នៅតែម្នាក់ឯងគត់នៅក្នុងបន្ទប់ជួលមួយកន្លែង ។
លោកបញ្ជាក់ថា រយៈពេល២ទៅ៣ថ្ងៃនេះ លោកមិនបានរត់កង់បីឡើយ ដោយសារកង់បីខូចទាមទារការជួសជុលអស់លុយច្រើន ទើបប៉ុន្មានថ្ងៃនេះលោកមិនអាចរកថវិកាបានសម្រាប់អាហារបីពេលនោះឡើយ ។
លោកបន្តថា ដោយសារគាត់លុយនេះហើយ ពេលខ្លះ ឃ្លានពេកលោកបានសុំជឿនំបញ្ចុកដែលអ្នកលក់ស្គាល់គ្នាហូបសិន ហើយពេលយប់រៀងហេវ ហើយគ្មានអង្ករក្នុងបន្ទប់នោះ លោកក៏ដាច់ចិត្តទៅជឿមីគេមួយកញ្ចប់ ក្បែរបន្ទប់ជាមួយគ្នាយកមកបរិភោគ ដើម្បីព្រឹកចាំរកដំណោះស្រាយបន្តទៀត ។
លោកបន្ថែម បច្ចុប្បន្ន លោករកមួយជំហានគិតមួយជំហានប៉ុណ្ណោះ ហើយបើទោះបីជាលោកមានមាឌធំក៏ពិតមែន ប៉ុន្តែលោកមិនមានកម្លាំងកំហែងឡើយ ខណៈពេលដែលអ្នកដែលមានជំងឺទឹកនោមផ្អែមដូចជាលោកប្រាកដជាដឹងពីអាការះមួយនេះ។
យ៉ាងណា សម្រាប់ប្រិយមិត្តសប្បុរសជនដែលមានបំណងចង់ជួយដល់អតីតតារាសម្តែងលោក ចាន់រិទ្ធ មេធានី ដែលកំពុងតែមានជីវភាពក្រលំបាក និងកំពុងហ៊ុមព័ន្ធដោយជំងឺប្រចាំកាយផងនោះ អាចទាក់ទងមកលេខលោកដោយផ្ទាល់គឺ០១២ ៥៦៧ ៥៣៣ ។
គួរបញ្ជាក់ថា លោក ចាន់រិទ្ធ មេធានី គឺជាអតីតតារាសម្ដែងដ៏ល្បីល្បាញមួយរូប ក្នុងចំណោមកំពូលតារាជើងខ្លាំងដែលមានដូចជា លោកទេព រិនដារ៉ូ , លោកខៃ ប្រសិទ្ធ, លោកយស បូវណ្ណៈ, លោកឧត្ដមបូទី ។ ល។ កាលពីអំឡុងទសវត្សឆ្នាំ ៨០-៩០ ។
បើនិយាយពីរូបសម្បត្តិរបស់លោក ចាន់រិទ្ធ មេធានី គឺជាតារាប្រុសដែលមានរូបរាងសង្ហាមិនចាញ់តារាប្រុសរួមជំនាន់នោះឡើយ ហើយទស្សនិកជនភាគច្រើន តែងតែចាត់ទុករូបលោកមានមុខមាត់ដូចទៅនឹងតារាបូលីវូតឥណ្ឌា ៕
ចែករំលែកព័តមាននេះ