ខេត្តព្រះសីហនុ ៖ នាវាកងទ័ពជើងទឹកអូស្ត្រាលី១គ្រឿងបានចូលចតដល់កំពង់ផែស្វយ័តអន្តរជាតិ ក្រុងព្រះសីហនុ ដោយសុវត្ថិភាពនៅព្រឹកថ្ងៃទី២ ខែកញ្ញា ឆ្នាំ២០២៤ ក្នុងដំណើរទស្សនកិច្ចរយៈពេល៣ថ្ងៃ។ នាឱកាសនៃការចូលចតនាវាកងទព័ជើងទឹកអូស្ត្រាលី លោកវរនាវីឯក…
ខេត្តព្រះសីហនុ ៖ នាវាកងទ័ពជើងទឹកអូស្ត្រាលី១គ្រឿងបានចូលចតដល់កំពង់ផែស្វយ័តអន្តរជាតិ ក្រុងព្រះសីហនុ ដោយសុវត្ថិភាពនៅព្រឹកថ្ងៃទី២ ខែកញ្ញា ឆ្នាំ២០២៤ ក្នុងដំណើរទស្សនកិច្ចរយៈពេល៣ថ្ងៃ។
នាឱកាសនៃការចូលចតនាវាកងទព័ជើងទឹកអូស្ត្រាលី លោកវរនាវីឯក មាន សាវឿន នាយសេនាធិការរងមូលដ្ឋានសមុទ្ររាម បានដឹកនាំ នាយនាវី អញ្ជើញទទួលស្វាគមន៍ប្រតិភូនាវាកងទ័ពជើងទឹកអូស្ត្រាលី ដោយក្តីសោមនស្សនិងកក់ក្តៅក្រៃលែង។នាវាដឹកនាំដោយលោកវរនាវីទោ Ben Dalton ជាមេបញ្ជាការនាវា យោងតាមរបាយការណ៍អគ្គស្ថានទូតប្រទេសអូស្ត្រាលីប្រចាំព្រះរាជាណាចក្រកម្ពុជា បានឲ្យដឹងថាគោលបំណងនៃការចូលចតដេីម្បីបំពេញទស្សនកិច្ចនៅព្រះរាជាណាចក្រកម្ពុជា រយៈពេល៣ថ្ងៃ ចាប់ពីថ្ងៃទី០២-០៤ ខែកញ្ញា ឆ្នាំ២០២៤ ក្នុងគោលបំណងពង្រឹង ពង្រីកកិច្ចសហប្រតិបត្តិការល្អ បង្កើនទំនាក់ទំនង និងរឹតចំណងមិត្តភាព សាមគ្គីភាព រវាងប្រទេសទាំងពីរ (កម្ពុជា-អូស្ត្រាលី) ឱ្យកាន់តែល្អប្រសើរឡើងបន្ថែមទៀត។
ក្នុងឱកាសទទួលស្វាគមន៍នាវាជើងទឹកអូស្ត្រាលីនាឱកាសនោះលោកវរនាវីឯក មាន សាវឿន នាយសេនាធិការរងមូលដ្ឋានសមុទ្ររាម បានសម្ដែងស្វាគមន៍រាក់ទាក់យ៉ាងកក់ក្តៅ ចំពោះនាវាកងទ័ពជើងទឹកប្រទេសអូស្ត្រាលី ដែលបានមកចូលចតដល់កំពង់ផែដោយសុវត្ថិភាព និងសូមឲ្យដំណើរទស្សនកិច្ចរបស់គណៈប្រតិភូនាវាកងទ័ពជើងទឹកអូស្ត្រាលី នៅក្នុងព្រះរាជាណាចក្រកម្ពុជា រយៈពេល៣ថ្ងៃនេះ ទទួលបានលទ្ធផលជាផ្លែផ្កានិងសុខសុវត្ថិភាព។
នាវាបាននាំមកនូវយោធិនសរុបចំនួន ១៩៣នាក់ក្នុងនោះ នាយនាវី ៣២រូប នាវិក ១៥៨រូប និងយានិក០៣នាក់ (អ្នកបើកបរឧទ្ធម្ភាគចក្រ)លក្ខណៈបច្ចេកទេសនាវា។ នាវាមានឈ្មោះ HMASPerth-FFH157(Anzac Class FFH) មាបណ្ដោយ ១១៨ម៉ែត្រ, ទទឹង១៤,៨ម៉ែត្រ, កម្ពស់៣២,៤៧ម៉ែត្រ, ជម្រៅទឹក ៦,៤ម៉ែត្រ, ទម្ងន់ផ្ទុក៣៩០០តោន, ល្បឿន៣២kts និងឧទ្ធម្ភាគចក្រចំនួន១គ្រឿង ប្រភេទMH60-R Seahawk។
ក្នុងដំណើរទស្សនកិច្ចនេះ ភាគីអូស្ត្រាលី នឹងមានពិធីជប់លៀងផ្លូវការ នៅល្ងាចថ្ងៃទី០២ ខែកញ្ញា ឆ្នាំ២០២៤។គណៈប្រតិភូនាវា នឹងចូលជួបសំដែងការគួរសមជាមួយថ្នាក់ដឹកនាំខេត្ត ជាមួយមេបញ្ជាការមូលដ្ឋានសមុទ្ររាម ។
ក្នុងសកម្មភាពរបស់ប្រតិភូនាវានៅថ្ងៃទី៣ខែកញ្ញាឆ្នាំ ២០២៤ រួមមានដំណើរទេសចរណ៍ និងការបង្ហាញអំពីប្រតិបត្តិការ ទូកតូចបច្ចេកទេសពន្លត់អគ្គីភ័យនិងអាហារថ្ងៃត្រង់នៅលើទូកជូនដល់នាយនាវី នារី នៃកងទ័ពជើងទឹកកម្ពុជាចំនួន ៨រូប និងមានការប្រកួតបាល់ទះ មិត្តភាពរវាងនាយនាវី កងទ័ពជើងទឹកកម្ពុជា និងនាវិកនាវា Perth នៅថ្ងៃទី០៣ ខែកញ្ញា ឆ្នាំ២០២៤៕
ចែករំលែកព័តមាននេះ