ខេត្តបាត់ដំបង ៖ ជនសង្ស័យ០២នាក់បងប្អូនត្រូវបានកម្លាំងសមត្ថកិច្ចចាប់វាយខ្នោះភ្លាមៗ ក្រោយពីណាត់ឲ្យយុវជនម្នាក់ជាបុគ្គលិកធនាគារទៅជួបដល់ផ្ទះ រួចព្រួតគ្នាចាប់អារ.ក និងចាក់ជាច្រើនកាំបិតបណ្ដាលជនរងគ្រោះរងរបួសជាទម្ងន់ កាលពីវេលាម៉ោង៩និង៤៥នាទីយប់ថ្ងៃទី២៣ សីហា នៅចំណុចភូមិបឹងរាំង ឃុំបឹងរាំង…
ខេត្តបាត់ដំបង ៖ ជនសង្ស័យ០២នាក់បងប្អូនត្រូវបានកម្លាំងសមត្ថកិច្ចចាប់វាយខ្នោះភ្លាមៗ ក្រោយពីណាត់ឲ្យយុវជនម្នាក់ជាបុគ្គលិកធនាគារទៅជួបដល់ផ្ទះ រួចព្រួតគ្នាចាប់អារ.ក និងចាក់ជាច្រើនកាំបិតបណ្ដាលជនរងគ្រោះរងរបួសជាទម្ងន់ កាលពីវេលាម៉ោង៩និង៤៥នាទីយប់ថ្ងៃទី២៣ សីហា នៅចំណុចភូមិបឹងរាំង ឃុំបឹងរាំង ស្រុកកំរៀង ដែលគេអះអាងថា នេះជាករណី«ប៉ុនប៉ងមនុស្សឃាត» ដែលផ្ដើមចេញពីគំនុំ«ស្នេហាត្រីកោណ»។
យោងតាមរបាយការណ៍សមត្ថកិច្ចបានឲ្យដឹងថា ជនសង្ស័យទាំង០២នាក់បងប្អូនដែលត្រូវសមត្ថកិច្ចចាប់វាយខ្នោះភ្លាមៗនេះ ម្នាក់ឈ្មោះ សោ ផារ៉ាដន អាយុ១៩ឆ្នាំ (បង) ជាតួឯកក្នុងរឿងស្នេហាត្រីកោណ និងជាអ្នកដៃដល់ និងម្នាក់ទៀតឈ្មោះ សោ សារ៉ាវុធ អាយុ១៧ឆ្នាំ (ប្អូន) ជាអ្នកចូលរួមជួយចាប់ជនរងគ្រោះឲ្យបងប្រុសអាករនិងចាក់ ដោយប្រើប្រាសកូនកាំបិត។
ដោយឡែក ជនរងគ្រោះឈ្មោះ ឈឿន ឆាយ ភេទប្រុស អាយុ២២ឆ្នាំ រស់នៅភូមិដីសថ្មី ឃុំស្ទឹងត្រង់ ស្រុកសាលាក្រៅ ខេត្តប៉ៃលិន តែជាបុគ្គលិកធនាគារមួយ នៅស្រុកកំរៀង។ នេះបើតាមរបាយការណ៏ខាងលើ ។
ជនរងគ្រោះ ត្រូវជនដៃដល់០២នាក់បងប្អូនខាងលើ ចាប់អារ.កនិងចាក់ជាច្រើនកាំបិត ហើយថែមទាំងចាក់ធ្លាយមាត់ពីម្ខាងទៅម្ខាងទៀតផង បណ្ដាលឲ្យរងរបួសយ៉ាងធ្ងន់ធ្ងរ។ អធិការស្រុកកំរៀង លោក វ៉េ គឹមចត់ បានថ្លែងប្រាប់តាមទូរស័ព្ទថា សំណុំរឿងខាងលើនេះ ជាករណី«ប៉ុនប៉ងឃាតកម្ម» ដែលជនដៃដល់០២នាក់បងប្អូន បានរៀបចំទុកជាមុន ក្នុងគោលបំណងសម្លាប់ជនរងគ្រោះ តែសំណាងល្អជនរងគ្រោះមិនស្លាប់ គ្រាន់តែរបួសធ្ងន់។
ត្រង់ចំណុចនេះ លោកអធិការបាននិយាយថា បើតាមចម្លើយសារភាពរបស់ជនសង្ស័យ និង តាមការបំភ្លឺពីសាក្សីនានាផង យើងអាចធ្វើការសន្និដ្ឋានបឋមថា ករណីនេះអាចផ្ដើមចេញពីគំនុំក្នុងរឿង«ស្នេហាត្រីកោណ»។ ហើយរឿង «ស្នេហាត្រីកោណ»នេះ គឺ តួរអង្គប្រុសឈ្មោះ សោ ផារ៉ាដន (ជនដៃដល់) ជាអ្នកដណ្ដើមយកតួឯកស្រីពីបេះដូងតួឯកប្រុសឈ្មោះ ឈឿន ឆាយ (ជនរងគ្រោះ)។
លោកអធិការបានបញ្ជាក់ថា មិនត្រឹមតែដណ្ដើមយកកំណាន់បេះដូងពីគេទេ ជនដៃដល់ថែមទាំងព្យាយាមរករឿងភាគីរងគ្រោះមិនឈប់ឈរ ក្នុងគោលបំណងគំរាមកំហែងឲ្យជនរងគ្រោះឈប់ទាន់ទងតួឯកស្រី ដែលខ្លួនដណ្ដើមពីបេះដូងគេ រហូតណាត់ឲ្យជនរងគ្រោះទៅជួបដល់ផ្ទះខ្លួនហើយ ចាត់ការជនរងគ្រោះតែម្ដង។
គេមិនទាន់ដឹងពីប្រវត្តិ នៃរឿងរ៉ាវស្នេហារវាងជនរងគ្រោះជាមួយស្រីស្នេហ៍ដែលត្រូវទី៣ដណ្ដើមយកទៅនោះទេ។ ប៉ុន្តែគេបានដឹងនិងបានឃើញមានរូបភាពខ្លះនៅក្នុងទូរស័ព្ទដៃរបស់ជនរងគ្រោះ ដែលបានបង្ហាញសមត្ថកិច្ចនូវរូបថតអានុស្សាវរីយ រវាងគូរស្នេហ៍នេះ មុនពេលត្រូវជនទី៣ (ជនដៃដល់) យកទៅ។
នៅក្នុងរឿងនេះ បើតាមលោក វ៉េ គឹមចត់ អធិការស្រុកកំរៀង បានប្រាប់ថា នៅយប់កើតហេតុ ជនសង្ស័យឈ្មោះ សោ ផារ៉ាដន បានហៅឲ្យជនរងគ្រោះទៅជួបដល់ផ្ទះខ្លួន ដើម្បីដោះស្រាយរឿង
«ស្នេហាត្រីកោណ»នេះ។ ជនរងគ្រោះក៏បានទៅជួបជនសង្ស័យដល់ផ្ទះ តាមការណាត់របស់ជនសង្ស័យ។ លោកបាននិយាយថា ពេលជនរងគ្រោះទៅដល់ ភាគីទាំង០២នាក់សួរនាំគ្នាផង និង តំឡើងសរសៃកដាក់គ្នាផង ពីរឿងដណ្ដើមគ្នាគ្រប់គ្រង«តួរឯកស្រី»។ (នេះជាសម្រង់ចម្លើយសង្ខេបពីជនដៃដល់) លោក វ៉េ គឹមចត់ បានស្រង់ចម្លើយទៀតថា ពេលកំពុងជជែកគ្នាបែកផ្សែងនោះ ភាគីរងគ្រោះ បានបង្ហាញរូបថតអនុស្សាវរីយ៍មួយចំនួន ដែលខ្លួនបានថតជាមួយនាងកន្លងមក ក្នុងគោលបំណងចង់ប្រាប់ភាគីដៃដល់ថា «ខ្លួននិងនាងតួឯកស្រីនោះ ស្រលាញ់គ្នាយូរហើយ ថែមទាំងបានថតរូបអនុស្សាវរីយ៍ជាមួយគ្នាយ៉ាងស្និទ្ធិស្នាលទៀតផង»។
ប៉ុន្តែការលាតត្រដាងបង្ហាញរូបថតអនុស្សាវរីយ៍របស់ជនរងគ្រោះនេះ ហាក់មិនបានធ្វើឲ្យជនដៃដល់ដែលដណ្ដើមស្រីកំណាន់ចិត្តគេនេះស្ងប់ចិត្តទេ។ ផ្ទុយទៅវិញ ជននេះរឹតតែផ្ទុះកំហឹង ដោយចោទជនរងគ្រោះថា ជាអ្នកលួចដណ្ដើមស្រីស្នេហ៍ពីខ្លួនទៅវិញ រហូតផ្ទុះហិង្សាភ្លាមមួយរំពេចតែម្ដង។
ត្រង់ចំណុចនេះ បើតាមលោក វ៉េ គឹមចត់ បានបញ្ជាក់ថា ពេលនោះជនដៃដល់ឈ្មោះ សោ ផារ៉ា
ដន (បង) បានទាញកូនកាំបិតមកចាក់ជនរងគ្រោះ រីឯជនរួមគំនិតឈ្មោះ សោ សារ៉ាវុធ (ប្អូន) បានស្ទុះទៅជួយចាប់ជនរងគ្រោះឲ្យបងប្រុសខ្លួន ចាក់ផង អារ.កផង គ្មានប្រណីដៃ តែសំណាងល្អជនរងគ្រោះគ្រាន់តែរងរបួសធ្ងន់ធ្ងរ ហើយត្រូវបានគេជួយអន្តរាគមន៍ទាន់ រីឯសមត្ថកិច្ចក៏បានចុះទៅឃាត់ខ្លួនជនដៃដល់០២នាក់បងប្អូននេះភ្លាមៗដេរ។
លោកថា ពេលនេះជនសង្ស័យទាំង០២នាក់បងប្អូន ត្រូវបានមន្ត្រីជំនាញ ឃាត់ខ្លួន និង កំពុងសួរនាំ ដើម្បីចាត់ការតាមនីតិវិធីហើយ ខណៈជនរងគ្រោះកំពុងសង្គ្រោះនៅមន្ទីរពេទ្យ៕
ចែករំលែកព័តមាននេះ