ទីក្រុងកាត់ត្មាន់ឌូ៖ រថយន្ត១គ្រឿងដឹកអ្នកទេសចរជនជាតិឥណ្ឌា៤៣នាក់កំពុងបើកបរនៅលើដងផ្លូវសុខៗស្រាប់តែហោះបោះពួយធ្លាក់ចូលទៅក្នុងទឹកស្ទឹងដែលពេញប្រៀបដោយទឹកឡើងខែវស្សា បណ្ដាលឱ្យស្លាប់មនុស្សយ៉ាងហោចណាស់ក៏ពាក់កណ្ដាលដែរ។ ហេតុការណ៍នេះកើតឡើងនៅប្រទសណេប៉ាល់។ គេដឹងថាមនុស្ស២៧បានស្លាប់ហើយ ខណៈដែល១៦នាក់ទៀតរងរបួសនៅក្នុងឧបទ្ទវហេតុនោះ។
អ្នកដំណើរ៤១នាក់ រួមជាមួយតៃកុងឡាន និងព្រូឡាន២នាក់សុទ្ធតែជនជាតិឥណ្ឌា។ គោលដៅរបស់ពួកគេគឺចាកចេញដំណើរពីទីក្រុងទេសចរណ៍ភោកខារ៉ា (Pokhara) សំដៅទីរដ្ឋធានីកាត់ត្មាន់ឌូរបស់ប្រទេសណេប៉ាល់។ ស្ថានភាពភូមិសាស្ត្រនៅប្រទេសណេប៉ាល់ពោរពេញដោយភាពស្រស់ស្អាតណាស់ដូចនៅលើខ្នងភ្នំហិមាល័យ។
ប៉ុន្តែស្ថានភាពផ្លូវប្រភេទនេះក៏គ្រោះថ្នាក់សម្បើមណាស់ដែរ។ បើកឡានស្រួលៗបោះពួយធ្លាក់ទៅជម្រាលភ្នំក៏មាន។ ដូចករណីខាងលើនេះអីចឹង។ ដងផ្លូវពោរពេញដោយភាពតូចចង្អៀត បត់បែនឆ្វេងស្ដាំ និងឡើងចុះ ពត់ពេនដូចអន្ទង់អាំង។ សម្រាប់រថយន្តខ្នាតធំដូចជារថយន្តបឺសដែលដឹកអ្នកទេសចរខាងលើនេះពិតជាពិបាកណាស់នៅក្នុងស្ថានភាពផ្លូវបែបនេះ។
ក្រោយហេតុការណ៍នោះ អាជ្ញាធរបានចាត់កម្លាំងចុះហែលទឹកដើម្បីស្វែងរកអ្នកបាត់ខ្លួន។ មិនយូរប៉ុន្មាន គេស្រង់បានជនរងគ្រោះ២២នាក់ចេញទឹកស្ទឹងម៉ាស់ស៊ីយ៉ាងឌី (Marsyangdi) ស្ថិតនៅក្នុងស្រុកថាណាហាន់ (Tanahun) ចម្ងាយ១១៨គីឡូម៉ែត្រពីរដ្ឋធានីកាត់ត្មាន់ឌូ។ នៅក្នុងចំណោមនោះ ១២នាក់រងរបួសធ្ងន់ធ្ងរ។ ដូច្នេះ គេត្រូវដឹកតាមឧទ្ធម្ភាគចក្រទៅកាត់ត្មាន់ឌូដើម្បីសង្គ្រោះបន្ទាន់។
អ្នកនាំពាក្យណេប៉ាល់ប្រាប់ថានៅក្នុងចំណោមអ្នកទាំង១២នាក់នោះ យ៉ាងហោចណាស់៦នាក់បានផុតដង្ហើមហើយបន្ទាប់ពីបញ្ជូនទៅដល់មន្ទីរពេទ្យ។ នៅក្នុងបេសកកម្មជួយសង្គ្រោះលើកនេះ ទាហាន និងនគរបាលត្រូវដាក់ជណ្ដើរពីលើជ្រលងភ្នំដើម្បីសម្រូតខ្លួនចុះទៅក្នុងទឹកស្ទឹង។ ក្រោយមកនៅពេលរកឃើញជនរងគ្រោះរួចហើយ គេត្រូវចងដងខ្លួនរបស់អ្នកនៅរស់ និងអ្នកស្លាប់ដើម្បីទាញតាមខ្សែពួរឡើងទៅលើ។
តាមរយៈវីឌីអូឃ្លីបដែលគេបង្ហោះតគ្នា គេឃើញថាស្ត្រី និងកូនតូចៗរបស់ពួកគេដែលអាការៈហេវហត់យ៉ាងខ្លាំង។ ទៅមុខលែងរួចតទៅទៀតហើយ។ មានតែដេកសំដិលខ្លួននៅលើកម្ទេចកម្ទីបាក់បែកដែលនៅរាយប៉ាយតាមមាត់ស្ទឹងដ៏ល្ហល្ហាចក្រោមឥទ្ធិពលនៃការហក់ឡើងយ៉ាងគំហុកនៃទឹកជំនន់ខែវស្សា។ អាជ្ញាធរនៅខេត្តអ៊ុតតាប្រាដេស (ឬឧត្ដរប្រទេស) ត្រៀមចាត់មន្ត្រីផ្លូវការរបស់ខ្លួនដើម្បីធ្វើជាអ្នកសម្របសម្រួលនៅក្នុងការជួយសង្គ្រោះនេះព្រោះរដ្ឋនេះជាទីកន្លែងចេញដំណើរនៃរថយន្តដឹកភ្ញៀវទេសចរណ៍ដែលរងគ្រោះ។ នេះបើតាមការផ្សាយរបស់ទូរទស្សន៍ឥណ្ឌាអេអឹនអាយ (ANI)៕
ចែករំលែកព័តមាននេះ