ខេត្តពោធិ៍សាត់ ៖ ចាប់ពីថ្ងៃទី១៥ ដល់២៣ ខែសីហា ឆ្នាំ២០២៤ នៅខេត្តពោធិ៍សាត់ បានធ្វើពិធីផ្លាស់ប្ដូរ និងប្រកាសតែងតាំងមុខតំណែង អភិបាលរងខេត្ត…
ខេត្តពោធិ៍សាត់ ៖ ចាប់ពីថ្ងៃទី១៥ ដល់២៣ ខែសីហា ឆ្នាំ២០២៤ នៅខេត្តពោធិ៍សាត់ បានធ្វើពិធីផ្លាស់ប្ដូរ និងប្រកាសតែងតាំងមុខតំណែង អភិបាលរងខេត្ត ០១រូប និងអភិបាលក្រុង ស្រុក ចំនួន០៤រូប ក្រោមអធិបតីភាពឯកឧត្តម ប្រាក់ សំអឿន រដ្ឋលេខាធិការក្រសួងមហាផ្ទៃ, លោក ម៉ក់ រ៉ា ប្រធានក្រុមប្រឹក្សាខេត្ត និងលោក ខូយ រីដា អភិបាល នៃគណៈអភិបាលខេត្ត ។
យោងអនុក្រឹត្យ ស្ដីពីការផ្ទេរភារកិច្ច និងតែងតាំងមន្ត្រីរាជការរបស់រាជរដ្ឋាភិបាល លេខ៨០៨ និង៨០៩ អនក្រ.តត ចុះថ្ងៃទី៧ ខែសីហា ឆ្នាំ២០២៤ បានសម្រេចតែងតាំងលោក ហេង សុភាណា ឋានន្តរស័ក្កិ វរៈមន្ត្រីថ្នាក់លេខ១ ពីអភិបាលស្រុកភ្នំក្រវាញ មកជាអភិបាលរង នៃគណៈអភិបាលខេត្តពោធិ៍សាត់ ជំនួសលោក ចេង ឡៃ ដែលត្រូវចូលនិវត្តន៍។ ផ្ទេរភារកិច្ចលោក ឆាយ គឹមម៉ុង ពីអភិបាល នៃគណៈអភិបាលស្រុកកណ្ដៀង មកកាន់ជាអភិបាល នៃគណៈអភិបាលស្រុកបាកាន។ លោក ផាយ ឡេង ពីអភិបាល នៃគណៈអភិបាលស្រុកបាកាន មកកាន់ជាអភិបាល នៃគណៈអភិបាលក្រុងពោធិ៍សាត់ ជំនួសលោក ចាប នាង ដែលត្រូវដល់ពេលចូលនិវត្តន៍។ លោក ណារ៉ា ចំរើន ពីនាយករដ្ឋបាលសាលាខេត្ត មកកាន់តំណែងជាអភិបាល នៃគណៈអភិបាលស្រុកកណ្ដៀង និងលោក ធាម សុផាត ពីអភិបាលរង នៃគណៈអភិបាលក្រុងពោធិ៍សាត់ ទៅកាន់តំណែងជាអភិបាល នៃគណៈអភិបាលស្រុកភ្នំក្រវាញ។ លោក ឌឹម ទូច ពីនាយករដ្ឋបាលស្រុកបាកាន ទៅកាន់ជាអភិបាលរង នៃគណៈអភិបាលស្រុកកណ្ដៀង ។
ឯកឧត្តម ប្រាក់ សំអឿន សូមអបអរសាទរចំពោះលោកអភិបាលរងខេត្ត និងលោកអភិបាល នៃគណៈអភិបាល ក្រុង ស្រុកទាំង០៤រូប ដែលត្រូវបានថ្នាក់ដឹកនាំផ្ដល់សេចក្ដីទុកចិត្ត ផ្លាស់ប្ដូរ និងតែងតាំងមុខតំណែងជូននាពេលនេះ ដើម្បីចូលរួមចំណែកដឹកនាំរដ្ឋបាលខេត្ត និងរដ្ឋបាលក្រុងស្រុក ឲ្យកាន់តែមានការអភិវឌ្ឍថែមទៀត ស្របតាមគោលការណ៍ច្បាប់ និងលិខិតបទដ្ឋានគតិយុត្តិជាធរមាន ។
ឯកឧត្តមបានផ្ដាំផ្ញើ សូមឲ្យអស់លោកទាំងអស់ យកចិត្តទុកដាក់ អនុវត្តតាមតួនាទីភារកិច្ច ដែលថ្នាក់ដឹកនាំប្រគល់ជូន ប្រកបដោយមនសិការ វិជ្ជាជីវៈ មានការទទួលខុសត្រូវខ្ពស់ ដើម្បីធានា នូវអភិបាលកិច្ចល្អ យុត្តិធម៌សង្គម និងការអភិវឌ្ឍ។ ពង្រឹងការផ្ដល់សេវាសាធារណៈជូនប្រជាពលរដ្ឋ ប្រកបដោយប្រសិទ្ធភាព ភាពស្អាតស្អំ និងឆ្លើយតបឲ្យបានទាន់ពេលវេលា ទៅនឹងតម្រូវការរបស់ប្រជាពលរដ្ឋនៅក្នុងមូលដ្ឋាន។ ត្រូវពង្រឹងកិច្ចការងារ ថែរក្សាសន្តិសុខសណ្ដាប់ធ្នាប់សង្គម ពិសេសការញុះញង់ក្នុងគោលបំណងផ្ដួលរំលំរាជរដ្ឋាភិបាល យកកម្ពុជាទៅប្រៀបធៀបជាមួយប្រទេសបង់ក្លាដេស របស់ក្រុមជ្រុលនិយមមួយក្ដាប់តូចជាដើម ៕
ចែករំលែកព័តមាននេះ