រាជធានីភ្នំពេញ ៖ ក្រសួងព្រះបរមរាជវាំង សូមអំពាវនាវស្នើដល់ស្ថាប័ន និងអាជ្ញាធរមានសមត្ថកិច្ចចាត់វិធានការជាបន្ទាន់ ឱ្យបានម៉ឺងម៉ាត់បំផុតចំពោះបុគ្គលជាម្ចាស់គណនី Tik Tok មានឈ្មោះថា នរោត្តម…
រាជធានីភ្នំពេញ ៖ ក្រសួងព្រះបរមរាជវាំង សូមអំពាវនាវស្នើដល់ស្ថាប័ន និងអាជ្ញាធរមានសមត្ថកិច្ចចាត់វិធានការជាបន្ទាន់ ឱ្យបានម៉ឺងម៉ាត់បំផុតចំពោះបុគ្គលជាម្ចាស់គណនី Tik Tok មានឈ្មោះថា នរោត្តម សូរិយាវង្ស និងស៊ីសុវត្ថិ សីណាក់វង្ស ដែលបានបង្ហោះចែកចាយក្នុងប្រព័ន្ធបណ្តាញទំនាក់ទំនងសង្គម ហើយប្រកាសអះអាងខ្លួនជាអនុជរបស់ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុតនោះ ។
យោងតាមសេចក្តីថ្លែងការណ៍របស់ក្រសួងព្រះបរមរាជវាំង ចេញផ្សាយថ្ងៃទី២១ ខែសីហា ឆ្នាំ២០២៤ បានប្រកាសបដិសេធចំពោះបុគ្គលជាម្ចាស់គណនី Tik Tok មានឈ្មោះថា នរោត្តម សូរិយាវង្ស និងស៊ីសុវត្ថិ សីណាក់វង្ស ដែលបានបង្ហោះចែកចាយក្នុងប្រព័ន្ធបណ្តាញទំនាក់ទំនងសង្គម ហើយប្រកាសអះអាងខ្លួនជាអនុជរបស់ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ។
បុគ្គលខាងលើ មិនមែនជាសែស្រឡាយព្រះរាជវង្សានុវង្សដែលទទួលស្គាល់ ដោយព្រះបរមរាជវាំងឡើយ ។ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គមានព្រះអនុជ បង្កើតតែមួយព្រះអង្គគត់ គឺសម្តេចនរោត្តម នរិន្ទ្រពង្ស ដែលបានយាងចូលព្រះទិវង្គត តាំងពីឆ្នាំ២០០៣ មកម្ល៉េះ ។ សេចក្តីថ្លែងការណ៍បានបញ្ជាក់ទៀតថា ក្រសួងព្រះបរមរាជវាំង មានកិត្តិយសសូមជម្រាបជូនសាធារណជនមេត្តាជ្រាបថា មានតែវេបសាយ(website)ចំនួន ២ប៉ុណ្ណោះ ដែលបានប្រើប្រាស់ជាផ្លូវការ ១- www.norodomsihamoni.org/ របស់ព្រះករុណាជាអម្ចាស់ជីវិតលើត្បូង ជាទីគោរព សក្ការៈដ៏ខ្ពង់ខ្ពស់បំផុត។ ២-www.norodomsihanouk.info/ របស់ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ។
ក្រៅពីវេបសាយ(website) ទាំង២ខាងលើនេះ ពុំមានប្រព័ន្ធបណ្តាញទំនាក់ទំនងសង្គមជាផ្លូវការរបស់ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត និងរបស់ក្រសួងព្រះបរមរាជវាំងឡើយ ។
ក្រសួងព្រះបរមរាជវាំង សូមអំពាវនាវដល់ស្ថាប័ន និងអាជ្ញាធរមានសមត្ថកិច្ចទាំងអស់ចាត់វិធានការជាបន្ទាន់ឱ្យបានម៉ឺងម៉ាត់បំផុត តាមរដ្ឋធម្មនុញ្ញ និងច្បាប់ជាធរមាននៃព្រះរាជាណាចក្រកម្ពុជា៕
ចែករំលែកព័តមាននេះ