បច្ចុប្បន្នស្ថានភាពទីផ្សារការលក់ដូរទំនិញគ្រប់ប្រភេទនៅកម្ពុជាក៏ដូចជា នៅក្នុងតំបន់មានសភាពស្ងប់ស្ងាត់ បន្ទាប់ពីមានការជៀតចូលនូវទំនិញថោកៗពីប្រទេសចិន ។ លោក ហៀម ចិត្រា ជាអ្នកទិញទំនិញពីប្រទេសចិនម្នាក់បានចែករំលែកបទពិសោធន៍នៃការទិញទំនិញពីប្រទេសចិនថា ការបញ្ជាទិញទំនិញពីចិន ដោយផ្ទាល់ទោះបីជាត្រូវរង់ចាំយូរបន្តិចក៏ដោយ…
បច្ចុប្បន្នស្ថានភាពទីផ្សារការលក់ដូរទំនិញគ្រប់ប្រភេទនៅកម្ពុជាក៏ដូចជា នៅក្នុងតំបន់មានសភាពស្ងប់ស្ងាត់ បន្ទាប់ពីមានការជៀតចូលនូវទំនិញថោកៗពីប្រទេសចិន ។
លោក ហៀម ចិត្រា ជាអ្នកទិញទំនិញពីប្រទេសចិនម្នាក់បានចែករំលែកបទពិសោធន៍នៃការទិញទំនិញពីប្រទេសចិនថា ការបញ្ជាទិញទំនិញពីចិន ដោយផ្ទាល់ទោះបីជាត្រូវរង់ចាំយូរបន្តិចក៏ដោយ ប៉ុន្តែវាមានភាពងាយស្រួល តម្លៃថោកជាងទំនិញក្នុងស្រុក ។ លោក ហៀម ចិត្រា បន្តថា ការទិញទំនិញពីប្រទេសចិន វាអាចមានហានិភ័យដែរ ប្រសិនបើយើងមិនស្គាល់ប្រភពនៃទំនិញច្បាស់លាស់ និងមិនដឹងអំពីនិតិវិធីនៃការបញ្ជាទិញមុនពេលសម្រេចចិត្តបង់លុយលើថ្លៃទំនិញទាំងនោះ តែគុណភាព និងរូបរាងអាចទទួលយកបាននូវប្រភេទទំនិញដែលខ្លួនពេញចិត្តទិញ ។
ពាក់ព័ន្ធនឹងការបញ្ជាទិញដោយផ្ទាល់ពីទីផ្សារចិន តាមរយៈការបញ្ជាទិញអនឡាញ អ្នកទទួលលក់ទំនិញបន្តពីប្រទេសចិនមកក្នុងស្រុកម្នាក់ដែលប្រាប់ត្រឹមតែឈ្មោះថា រីណូ (Rhino) បានអោយដឹងថា ការទិញទំនិញពីប្រទេសចិនយកលក់បន្តក្នុងប្រទេសកម្ពុជា មានភាពងាយស្រួល គុណភាពទំនិញអាចទទួលយកបាន ជាហេតុធ្វើអោយទំនិញចិនទាំងនោះអាចទាក់ទាញចិត្តអតិថិជនងាកមកប្រើប្រាស់ និងទិញទំនិញទាំងនោះ ជាងទំនិញមកពីប្រទេសផ្សេងៗ ។
អ្នកលក់អនឡាញ ទំនិញចិនរូបនេះបន្តថា រាល់ទំនិញពីប្រទេសចិនរូបលោកស្រី ត្រូវបញ្ជាទិញចំនួនច្រើន ហើយមកដល់មានក្នុងស្តុកស្រាប់ ទើបផុសលក់លើបណ្តាញសង្គមផ្សេងៗអោយអតិថិជនជាពលរដ្ឋក្នុងស្រុកបានឃើញពេញចិត្ត និងធ្វើការបញ្ជាទិញបន្តយកទៅប្រើប្រាស់ ។
នៅក្នុងស្ថានភាពនេះ ស្ត្រីអាជីវករលក់សម្លៀកបំពាក់នៅផ្សារកណ្តាលឈ្មោះ អ៊ីវ ស៊ីវន បាននិយាយថា ឥឡូវលក់ដូរមិនសូវដាច់ទេ ។ ក្នុងផ្សារមានតែអ្នកលក់ប៉ុន្តែមិនសូវមានអ្នកទិញទេ ។ ស្ត្រីអាជីវកររូបនេះលើកឡើងថា «ចាប់តាំងពីបើកផ្សារឡើងវិញនៅក្រោយកូវីដ១៩ មកការលក់ដូរមិនសូវដាច់ទេ តែមិនដឹងរកអី យើងមានតូបខ្លួនឯងក៏ចេះតែមកលក់ដូរទៅ គ្រាន់បានផ្សែផ្សំគ្នាជាមួយប្រាក់ខែប្តី ដើម្បីចិញ្ចឹមកូន» ។ អ្នកស្រី ពិសិដ្ឋ លីនដា ជាអាជីវករលក់ស្បែកជើង នៅផ្សារច្បារអំពៅ ក៏បានត្អូញត្អែរដូចគ្នាដែរថា ការលក់ដូរកាន់តែពិបាកទៅៗមិនដឹងថា ពេលណាទើបមានមនុស្សដើរផ្សារច្រើនវិញនោះទេ បើម្នាក់ៗឮតែត្អូញពីការបាត់បង់ប្រាក់ចំណូល ។ អ្នកស្រី ពិសិដ្ឋ លីនដា បានត្អូញត្អែរថា «លក់មិនដាច់ទេបងអើយ។ គ្មានមនុស្សដើរផ្សារទេ ចង់ដាច់បាយហើយ ។ សព្វថ្ងៃទ្រាំលើសពីទ្រាំមិនដឹងប្រាប់អ្នកណា» ។
ពាក់ព័ន្ធនឹងបញ្ហានេះ លោកបណ្ឌិត ហុង វណ្ណៈ អ្នកវិភាគសេដ្ឋកិច្ចនៃរាជ្យបណ្ឌិតសភាកម្ពុជា បានអោយកម្មវិធីលុយនៃសារព័ត៌មានកោះសន្តិភាព ដឹងថា «ប្រទេសចិនជាប្រទេសអ្នកផលិតសម្រាប់ពិភពលោក ផលិតកម្មខ្ពស់ ហើយប្រភេទទំនិញ និងផលិតផលទាំងនោះឯង ប្រទេសចិនបានកាត់ជាជំរៀកតូចៗ មានន័យថា អ្នកដែលមានជីវភាពក្រោមមធ្យម និងលើមធ្យមប្រើបានតាមកម្រិតតាមការចង់បាន» ។
លោកបណ្ឌិត ហុង វណ្ណៈ បន្ថែមថា ប្រទេសចិនផលិតស្ទើរតែគ្រប់ប្រភេទនៃផលិតផលទាំងនេះឯង ឥទ្ធិពលទាំងនោះបានចូលទៅវា.យលុកប្រទេសមួយចំនួន ដែលមានឧស្សាហកម្ម ធុនតូចក៏ដូចជាឧស្សាហកម្មធន់មធ្យម ឬក៏ក្រោមមធ្យម ធ្វើអោយមានការពិបាកក្នុងការផលិត ដោយសារតែថ្លៃដើមខ្ពស់ ។
អ្នកវិភាគសេដ្ឋកិច្ច រូបនេះបន្តថា «ប្រទេសចិនមានថ្លៃដើមទាប ហើយអ្នកប្រើប្រាស់រត់ទៅរកផលិតផល ឬក៏ទំនិញដែលមានថ្លៃដើម ឬក៏មានថ្លៃទាបហ្នឹងហើយប្រើការបាន ។ នៅពេលនេះ ប្រទេសចិនកំពុងបំពេញនូវតម្រូវការទាំងនោះបានដូចប្រទេសចិនធ្វើទៅតាមបណ្តាប្រទេសដទៃទៀត ។ បើនិយាយពីសកលភាវូបនីយកម្ម តំបន់ពិភពលោកយើងមិនអាចហាមឃាត់ចរន្ត ឬលំហូរនៃទំនិញទាំងអស់នោះបានទេ អាហ្នឹងបើយើងនិយាយអោយស្មើសិទ្ធិស្មើមុខវាផ្អែកលើតម្រូវការអ្នកប្រើប្រាស់ អ្នកដែលមានតម្រូវការផលិតផលទាំងអស់នោះ គឺលំហូរទំនិញទាំងអស់នោះចេះតែទៅហើយ» ។
មកដល់ពេលនេះ ក្រៅពីប្រទេសកម្ពុជា ដែលរងផលប៉ះពាល់ដោយសារតែទំនិញតម្លៃថោកពីចិន និងទីផ្សារអនឡាញមានកំណើននោះនៅក្នុងតំបន់ដូចជាប្រទេសថៃជាដើម គឺបានប្រឈមមុខនឹងជួបបញ្ហាធ្ងន់ជាងកម្ពុជាផង ។
តាមសារព័ត៌មាន The Straits Time បានឲ្យដឹងថា ដោយសារតែការហូរចូលដូចជា ទឹកប្រាក់ទំនប់នៃទំនិញពីចិនចូលទីផ្សារនៅអាស៊ាន រោងចក្រធុនតូចនិងមធ្យមនៅថៃ ប្រមាណជាជិត២០០០ បានបិទទ្វារ កាលពីឆ្នាំ២០២៣ ដោយសារតែមិនអាចប្រកួតប្រជែងជាមួយនឹងទំនិញតម្លៃថោក ហើយគុណភាពប្រសើររបស់ចិនបាន ។
ក្រៅពីប្រទេសថៃ និងកម្ពុជា ស្ថានភាពនៃអាជីវកម្មនៅផ្សារទំនើបនៅក្នុងប្រទេសម៉ាឡេស៊ី ក៏កំពុងតែប្រឈមមុខនឹងការពិបាកប្រកួតប្រជែងជាមួយនឹងទីផ្សារអនឡាញ និងទំនិញតម្លៃថោកពីចិន ។ មកដល់ពេលនេះមានសេចក្តីរាយការណ៍ថា អាជីករនៅតាមផ្សារទំនើបនានានៅម៉ាឡេស៊ី សុទ្ធតែត្អូញត្អែរអំពី បញ្ហានេះ ៕
ចែករំលែកព័តមាននេះ