តើពិធីបុណ្យសែនក្បាលទឹករបស់ប្រជាជនចិន គឺជាអ្វី?
ប្រទេសចិន ៖ ពិធីបុណ្យសែនក្បាលទឹក ដែលភាសាចិនហៅថា 中元节 ឬ Zhong Yuan Jie គឺជាពិធីបុណ្យប្រពៃណីជនជាតិចិន…
ប្រទេសចិន ៖ ពិធីបុណ្យសែនក្បាលទឹក ដែលភាសាចិនហៅថា 中元节 ឬ Zhong Yuan Jie គឺជាពិធីបុណ្យប្រពៃណីជនជាតិចិន ដែលមានសេចក្តីថា ពិធីបុណ្យខ្មោច ឬ ពិធីបុណ្យខ្មោចអត់ឃ្លាន ដែលស្រដៀងនឹងពិធីបុណ្យភ្ជុំបិណ្ឌខ្មែរយើងដែរ ដោយប្រារព្ធឡើងជារៀងរាល់ឆ្នាំ និងត្រូវបានចាត់ទុកជាពិធីបុណ្យដ៏ធំ និងសំខាន់មួយរបស់ប្រទេសចិន។
បុណ្យសែនក្បានទឹក តែងប្រារព្ធឡើងនៅថ្ងៃទី ១៥កើត នៃខែទី ៧ នៅក្នុងប្រតិទិនច័ន្ទគតិ ដែលជាធម្មតាក្នុងខែសីហា នៅក្នុងប្រតិទិនសុរិយគតិ ហើយនៅឆ្នាំនេះ ត្រូវប្រារព្ធធ្វើឡើងនៅថ្ងៃអាទិត្យ ទី១៨ ខែសីហា។ ដើមកំណើតនៃពិធីបុណ្យសែនក្បាលទឹក បានចាក់ឫសតាមប្រពៃណីព្រះពុទ្ធសាសនា និងសាសនាតាវ ដែលដើរតួដ៏សំខាន់ គឺជាពេលវេលារំលឹក និងសែនឧទ្ទិសកុសលផលបុណ្យឱ្យវិញ្ញាណក្ខន្ធអ្នកដែលចែកឋាន ព្រោះថា ព្រលឹងអ្នកស្លាប់ត្រូវបានគោរព និងយកចិត្តទុកដាក់ក្នុងពិធីបុណ្យរយៈពេញមួយខែពេញ។ ហើយតាមជំនឿគេជឿថា គឺជាវេលាដែលឋាននរកបើកទ្វារ ដោះលែងខ្មោចមិនទាន់ចាប់ជាតិឱ្យមកទទួលសំណែន និងកុសលផលបុណ្យ ដែលសាច់ញាតិនៅរស់បានឧទ្ទិសជូន។
ដោយឡែក មនុស្សមួយចំនួនក៏ជឿថា ទ្វារឋានសួគ៌ក៏បើកអំឡុងពេលនេះ ដែលអនុញ្ញាតឱ្យពួកគេថ្វាយបង្គំបុព្វបុរសរបស់ខ្លួននៅឋានសួគ៌។ ចំណែកប្រពៃណីមួយទៀត ក៏ទាក់ទងទៅនឹងស្តេចយ៉ាម៉ា ឬស្តេចយមរាជដែលបើកទ្វារឱ្យខ្មោចរីករាយជាមួយនឹងដង្វាយ និងការបូជា។ ហើយទ្វារឋាននរកនឹងបិទនៅថ្ងៃចុងក្រោយនៃខែខ្មោច ដើម្បីបញ្ជូនខ្មោចអត់ឃ្លានត្រឡប់ទៅឋាននរកវិញ រហូតដល់ឆ្នាំក្រោយ។
ពិធីបុណ្យសែនក្បាលទឹក ត្រូវបានប្រារព្ធឡើងនៅតាមតំបន់ និងប្រទេសនានាដែលមានសហគមន៍ចិនធំៗ ក៏ដូចជាប្រទេសចិនដីគោកផងដែរ។ ពិធីបុណ្យនេះក៏ត្រូវប្រារព្ធយ៉ាងទូលំទូលាយនៅក្នុងប្រទេសសិង្ហបុរី ហុងកុង តៃវ៉ាន់ ម៉ាឡេស៊ី ថៃ ឥណ្ឌូនេស៊ី វៀតណាម និងកម្ពុជាផងដែរ។
រណ្តាប់ការសែន អាចធ្វើតាមទំលៀមទំលាប់ ក៏ដូចជាំលទ្ធភាពដែលធ្វើទៅបានដូចជា ការថ្វាយម្ហូបអាហារ និងភេសជ្ជៈ ការដុតធូប ការដុតក្រដាសសែន ការបណ្តែតគោម ការតុបតែងលំអ ក៏ដូចជាការចារនិមិត្តសញ្ញាផ្សេងៗ ពិធីសាសនាផ្សេងៗ ការថ្វាយបង្គំដូនតា ពិធីបុណ្យសហគមន៍តាមរយៈការរៀបចំនៅតាមដងផ្លូវ ដោយមានទាំងការសម្តែងល្ខោនហ៊ីចិន ដើម្បីអបអរពិធីបុណ្យសែនក្បាលទឹក ជាដើម។
ម្យ៉ាងវិញទៀត ក៏ជាថ្ងៃល្អដែលបងប្អូន សាច់ញាតិមិត្តជិតឆ្ងាយបានជួបជុំសែនព្រេន និងសប្បាយរីករាយ បន្ទាប់ពីបែកគ្នារយៈពេលយូរ ដើម្បីចេញប្រកបរបររកស៊ីរៀងៗខ្លួន។ ហើយបន្ទាប់ពីការសែនព្រេនបញ្ចប់ និងធូបរលត់អស់ សំណែនពីម៉ែឪ កុងម៉ា នឹងក្លាយជាម្ហូបអាហារ និងគ្រឿងក្លែមសម្រាប់សាច់ញាតិទទួលទាន។
រឿងដែលមិនគួរធ្វើ អំឡុងពេលពិធីបុណ្យសែនក្បាលទឹករួមមាន ៖
ការទុក ឬហាលសម្លៀកបំពាក់នៅក្រៅផ្ទះពេលយប់
ការជិះឡានក្រុង ឬរថភ្លើងខ្សែចុងក្រោយត្រឡប់ទៅផ្ទះ
ការឈរជិតជញ្ជាំងខ្លាំងពេក
ការថតរូបនៅពេលយប់
ការដាក់ស្បែកជើងចង្អុលទៅគ្រែគេង
ការដាក់ដៃអ្នកលើស្មារបស់នរណាម្នាក់
ការហួច ឬច្រៀងខ្លាំងៗនៅពេលយប់
ការបើកឆ័ត្រនៅក្នុងផ្ទះ
ការហែលទឹកនៅពេលយប់
ការចាប់ផ្តើមអាជីវកម្មថ្មី ឬរៀបការ
ការជួសជុលផ្ទះសម្បែង
ការទិញផ្ទះ
ការបើកហាងលក់ដូរ
ការពាក់ស្បែកជើងមានកែងខ្ពស់។
បំរាម អំឡុងពេលពិធីបុណ្យសែនក្បាលទឹក នៅមានច្រើនទៀត ដែលខុសប្លែកៗពីគ្នាទៅតាមតំបន់និមួយៗ ដោយក្នុងនោះក៏រួមមានទាំង ការប្រោះទឹកស្លឹកទទឹម និងដើររំលងភ្លើង នៅពេលអ្នកទើបត្រឡប់មកពីដំណើរឆ្ងាយ។
យ៉ាងណាមិញ ជំនឿតែងតែដើតស្របទៅនឹងវិទ្យាសាស្ត្រ ក៏ដូចជាជីវិតរស់នៅប្រចាំថ្ងៃ ដូច្នេះការជឿលើវិញមួយ ត្រូវតែឆ្លងកាត់ការគិតប្រកបដោយប្រាជ្ញា។ ហើយការជួបជុំទៀតសោត ជៀសមិនផុតអំពីការទទួលទានគ្រឿងស្រវឹងឡើង ដូច្នេះសូមមេត្តាទទួលទានដោយការទទួលខុសត្រូវខ្ពស់ ហើយបើស្រវឺងសូមមេត្តាកុំបើកបរ៕ (ប្រភព ៖ The Chairman Bao)
ចែករំលែកព័តមាននេះ