ប្រទេសវៀតណាម ៖ គិតត្រឹមពាក់កណ្តាលឆ្នាំនេះ ប្រទេសវៀតណាម បានកើបចំណូលរហូតដល់១.២ពាន់លានដុល្លារអាមេរិក តាមរយៈការនាំចេញអង្ករទៅប្រទេសហ្វីលីពីន ពោលគឺកើនឡើងរហូតដល់ ៤១% បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមប្រភពពីសារព័ត៌មាន…
ប្រទេសវៀតណាម ៖ គិតត្រឹមពាក់កណ្តាលឆ្នាំនេះ ប្រទេសវៀតណាម បានកើបចំណូលរហូតដល់១.២ពាន់លានដុល្លារអាមេរិក តាមរយៈការនាំចេញអង្ករទៅប្រទេសហ្វីលីពីន ពោលគឺកើនឡើងរហូតដល់ ៤១% បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមប្រភពពីសារព័ត៌មាន VnExpress ចេញផ្សាយកាលពីថ្ងៃទី១១ ខែសីហា ឆ្នាំ២០២៤ កន្លងទៅ។
ដោយផ្អែកលើទិន្នន័យពីការិយាល័យពាណិជ្ជកម្មវៀតណាមប្រចាំហ្វីលីពីន បានឱ្យដឹងថា អង្ករវៀតណាមបានឈានមុខគេលើទីផ្សារនៅក្នុងប្រទេសហ្វីលីពីន ដែលជាដៃគូនាំចេញអង្ករដ៏ធំបំផុតអស់រយៈពេលជាច្រើនឆ្នាំមកហើយ។ តួយ៉ាង កាលពីខែមិថុនាកន្លងទៅ ប្រទេសហ្វីលីពីនបានកាត់បន្ថយពន្ធនាំចូលអង្ករពី ៣៥% មកនៅត្រឹម ១៥% ជាមួយនឹងសុពលភាពរហូតដល់ឆ្នាំ ២០២៨។ ដូច្នេះការនាំចូលត្រូវបានរំពឹងថានឹងបង្កើនបរិមាណពី ៤ លានទៅ ៤,៥លានតោន។ ហើយនេះក៏ត្រូវបានចាត់ទុកថាជាឱកាសមាសសម្រាប់នាំចេញអង្កររបស់វៀតណាមទៅហ្វីលីពីន នៅក្នុងឆមាសទី២ នៃឆ្នាំនេះ។
បើទោះបីជាឱកាសមាស សម្រាប់ការពង្រីកកានាំនាំចេញអង្ករវៀតណាមក៏ពិតមែន ប៉ុន្តែអាជីវកម្មជាច្រើននៅតែមានការប្រុងប្រយ័ត្ន ពាក់ព័ន្ធនឹងតម្លៃអង្ករខ្ពស់ ក៏ដូចជាឥទ្ធិពលព្យុះ ដែលអាចកាត់បន្ថយការផ្គត់ផ្គង់ស្រូវនៅចុងឆ្នាំនេះ។ ទន្ទឹមនឹងនោះ ក្រសួងឧស្សាហកម្ម និងពាណិជ្ជកម្ម ស្ថានទូត និងការិយាល័យពាណិជ្ជកម្មវៀតណាម ក៏នឹងប្រកាសគាំទ្រដល់សកម្មភាពជំរុញពាណិជ្ជកម្ម ការផ្សព្វផ្សាយ និងការកែលម្អគុណភាពផលិតផលអង្ករ ដើម្បីបង្កើនតម្លៃនាំចេញ។
កាលពីឆ្នាំមុន វៀតណាមបាននាំចេញអង្ករជាង ៣លានតោនទៅប្រទេសហ្វីលីពីន ដែលជាចំនួនធ្លាក់ចុះ ៣% បើធៀបនឹងឆ្នាំ ២០២២។ ទោះជាយ៉ាងណាក៏ដោយ ដោយសារតែការកើនឡើងនៃតម្លៃអង្ករ ដូច្នេះការនាំចេញបានឈានរហូតដល់ ១.៧៥ពាន់លានដុល្លារអាមេរិក ពោលគឺកើនឡើង ១៧.៦% បើធៀបនឹងឆ្នាំ ២០២២៕
ចែករំលែកព័តមាននេះ