ទីក្រុងវ៉ាស៊ីនតោន៖ សម្រាប់ការបោះឆ្នោតប្រធានាធិបតីអាមេរិកនាចុងឆ្នាំនេះ លោកបៃដិនគ្មានជំនឿទុកចិត្តទាល់តែសោះថាការផ្ទេរអំណាចនឹងធ្វើឡើងដោយសន្តិវិធីបើលោកត្រាំចាញ់ឆ្នោត។ លោកបៃដិនថ្លែងថាគេត្រូវតែស្ដាប់ដោយយកចិត្តទុកដាក់នូវសម្ដីរបស់លោកត្រាំកាលពីខែមីនា។ កាលនោះលោកត្រាំនិយាយថា «បើលោកចាញ់ឆ្នោតនាខែវិច្ឆិកាខាងមុខនេះនឹងមានឈាមដាបធរណីជាមិនខានឡើយ»។
កាលនោះ សេតវិមានប្រកាសថាលោកត្រាំនិយាយបែបនេះមានន័យថាជាការញុះញង់ឱ្យមានអំពើហិង្សា។ ប៉ុន្តែលោកត្រាំបដិសេធថាគាត់មិនមែនចង់មានន័យដូច្នេះទេ។ លោកបៃដិនថ្លែងដូចខាងលើនេះនៅក្នុងបទសម្ភាសជាមួយទូរទស្សន៍ស៊ីប៊ីអែស (CBS)។ នៅពេលសួរថាតើលោកមានទំនុកចិត្តថាការផ្ទេរអំណាចលើកនេះអាចនឹងប្រព្រឹត្តទៅដោយសន្តិវិធីដែរឬទេ? លោកបៃដិនតបថាបើលោកត្រាំចាញ់ឆ្នោត គ្មានឡើយការផ្ទេរអំណាចដោយសន្តិវិធី។ លោកមានជំនឿបែបនេះ។
លោកបៃដិនថ្លែងបន្តទៀតថាបើលោកត្រាំនិយាយបែបណាគឺគាត់ធ្វើបែបហ្នឹងហើយ។ សព្វថ្ងៃនេះ យើងមិនសូវស្ដាប់ភាសាដែលគាត់និយាយដោយយកចិត្តទុកដាក់ទេ។ តាមពិត គាត់មិនមែននិយាយលេងសើចទេ។ ចំណុចសំខាន់នៅត្រង់ថា «បើគាត់ចាញ់ឆ្នោតនឹងមានឈាបដាប់ផ្ទៃធរណី»។ ដូច្នេះ មានតែការលួចបន្លំសន្លឹកឆ្នោតតែប៉ុណ្ណោះ។ មើលចុះ ពួកគេកំពុងតែធ្វើអ្វីនៅមណ្ឌលបោះឆ្នោតថ្នាក់មូលដ្ឋាន។ យើងមិនអាចស្នេហាជាតិ (តែមាត់ទទេ) បានទេ លុះត្រាតែយើងឈ្នះឆ្នោតសិន។
ខាងលើនេះជាការច្បិចយកចំណុចសំខាន់ៗនៃពាក្យសម្ដីរបស់លោកបៃដិនចេញពីបទសម្ភាសទាំងស្រុងតែប៉ុណ្ណោះ។ បទសម្ភាសដុលនឹងចាក់ផ្សាយនៅថ្ងៃអាទិត្យសប្ដាហ៍នេះ។ សូមរំលឹកថាកាលពីថ្ងៃទី៦ ខែមករា ឆ្នាំ២០២១ ពោលគឺបីអាទិត្យមុនពេលលោកបៃដិនស្បថចូលកាន់តំណែងជាផ្លូវការ លោកត្រាំបានថ្លែងទៅកាន់ក្រុមអ្នកគាំទ្រនៅទីក្រុងវ៉ាស៊ីនតោន។ លោកប្រកាសថាលោកមិនព្រមទទួលស្គាល់ថាការចាញ់ឆ្នោតនេះទេព្រោះមានគេលួចសន្លឹកឆ្នោតរបស់លោក។ លោកបានរិះគន់ប្រព័ន្ធផ្សព្វផ្សាយ និងបានស្នើសុំឱ្យអនុប្រធានាធិបតី លោកម៉ាយផឹន ប្រកាសមិនទទួលស្គាល់លទ្ធផលឆ្នោតនេះដែរ។
បន្ទាប់ពីស្ដាប់ឮសំឡេងអំពាវនាវនោះ ក្រុមអ្នកគាំទ្រក៏លើកគ្នាទាំងហ្វូងទៅវិមានរដ្ឋសភា។ ពួកគេសម្រុកចូលទៅខាងក្នុងអគារដោយឡើងតាមជញ្ជាំង និងប៉ះទង្គិចគ្នាជាមួយសមត្ថកិច្ច។ គោលបំណងរបស់ពួកគេគឺរារាំងការកោះប្រជុំរបស់សភាទាំងពីរមិនឱ្យបូកសរុបតួលេខ និងប្រកាសទទួលស្គាល់ជាផ្លូវការថាលោកបៃដិនបានឈ្នះឆ្នោតលើកនេះយ៉ាងពិតប្រាកដ។
ជាលទ្ធផលនៃអំពើបះបោររយៈពេល៣៦ម៉ោងនោះ មនុស្ស៥នាក់បានស្លាប់។ នៅក្នុងចំណោមនោះ ជនរងគ្រោះម្នាក់ត្រូវបានបាញ់ស្លាប់ដោយសមត្ថកិច្ចការពារសន្តិសុខនៅវិមានរដ្ឋសភា, ម្នាក់ស្លាប់ដោយសារការធ្វើទុក្ខនៃថ្នាំញៀនដែលប្រើប្រាស់ហួសកម្រិត, និងបីនាក់ទៀតស្លាប់ដោយសារបញ្ហាសុខភាព។ នគរបាលម្នាក់ក៏បានស្លាប់នៅក្នុងចំណោមអ្នកទាំងប្រាំនោះផងដែរ។ ក្រៅពីនេះ មនុស្សជាច្រើនទៀតរងរបួស។ នគរបាល១៧៤នាក់ក៏បានរងរបួសនៅក្នុងពេលនោះផងដែរ។
ភ្នាក់ងារអែហ្វប៊ីអាយថ្លែងថាគិតចាប់ពីពេលនេះរាប់ថយក្រោយទៅរកព្រឹត្តិការណ៍នៅវិមានរដ្ឋសភានោះមានរយៈពេល៤២ខែមកហើយ។ មនុស្សសរុប១៤៧០នាក់ត្រូវបានចោទប្រកាន់ និងនាំខ្លួនឡើងតុលាការសឹងតែគ្រប់រដ្ឋទាំងអស់នៃរដ្ឋទាំង៥០របស់សហរដ្ឋអាមេរិក។ បទល្មើសដែលពួកគេរងការចោទប្រកាន់គឺការរំលោភសិទ្ធិលំនៅដ្ឋាន, មនុស្សជាង៥៣០នាក់ជាប់ចោទពីបទបង្កអំពើហិង្សាដោយចេតនា និងការបង្កអំពើហិង្សាទៅលើមន្ត្រីអនុវត្តច្បាប់៕
ចែករំលែកព័តមាននេះ