ខេត្តកំពង់ស្ពឺ ៖ កម្លាំងសមត្ថកិច្ចចម្រុះល្បាតតាមគោលដៅសំខាន់ៗ និងស្មុគស្មាញ ក៏ប្រទះឃើញឈើម្រេញ ឡាំងរួច មុខកាត់ធំៗចំនួន៤ដុំ ដែលឈ្មួញយកទៅលាក់ទុកក្នុងព្រៃក្បែរចំការមួយកន្លែង តាមបណ្តោយផ្លូវលំ ដែលឈ្មួញបម្រុងដឹកយកទៅលក់បន្ត…
ខេត្តកំពង់ស្ពឺ ៖ កម្លាំងសមត្ថកិច្ចចម្រុះល្បាតតាមគោលដៅសំខាន់ៗ និងស្មុគស្មាញ ក៏ប្រទះឃើញឈើម្រេញ ឡាំងរួច មុខកាត់ធំៗចំនួន៤ដុំ ដែលឈ្មួញយកទៅលាក់ទុកក្នុងព្រៃក្បែរចំការមួយកន្លែង តាមបណ្តោយផ្លូវលំ ដែលឈ្មួញបម្រុងដឹកយកទៅលក់បន្ត សមត្ថកិច្ចជំនាញកំពុងតែធ្វើការស្រាវជ្រាវរកម្ចាស់ឈើនោះហើយ ។
ការប្រទះឃើញឈើ៤ដុំ ដែលឈ្មួញបំផ្លាញព្រៃឈើយកទៅលាក់ទុកបម្រុងដឹកយកទៅលក់បន្តនោះ បានកាលពីព្រលប់ថ្ងៃទី៣១ ខែកក្កដា ឆ្នាំ២០២៤ នៅចំណុចព្រៃក្បែចំការមួយកន្លែង តាមផ្លូវលំ ស្ថិតនៅក្នុងភូមិអូរតាពូង ឃុំភក្តី ស្រុកបសេដ្ឋ ខេត្តកំពង់ស្ពឺ ។
សមត្ថកិច្ចស្រុកបានឱ្យដឹងថា នៅមុនពេលប្រទះឃើញឈើចំនួន ៤ដុំនេះ គឺគណៈបញ្ជាការឯកភាព រដ្ឋបាលស្រុកបសេដ្ឋ បានដឹកនាំកម្លាំងជំនាញ នៃអធិការដ្ឋាននគរបាលស្រុកបសេដ្ឋ និងកម្លាំងប៉ុស្តិ៍ភក្តី ល្បាតតាមតំបន់ស្មុគស្មាញ ក៏ប្រទះឃើញឈើចំនួន០៤ដុំ (ប្រភេទឈើម្រេញ) មានមុខទំហំធំៗ ក្រោយពីប្រទះឃើញ បានរាយការណ៍ ទៅជំនាញរដ្ឋបាលព្រៃឈើ ចុះមកធ្វើការវាស់វែង ឈើចំនួន៤ដុំនោះ សរុបស្មើនឹង ២,១២៣ ម៉ែត្រគូប ។
សមត្ថកិច្ចបានបន្តថា ឈើប្រភេទម្រេញ៤ដុំ ដែលប្រទះឃើញនេះ គឺឈ្មួញរកស៊ីដឹកឈើ បានលាក់ទុកក្នុងព្រៃក្បែរចំការស្វាយមួយកន្លែង ស្ថិតក្នុងភូមិអូរតាពូង ឃុំភក្តី ស្រុកបសេដ្ឋនេះ ។
ប្រជាពលរដ្ឋ ដែលរស់នៅក្បែរកន្លែងប្រទះឃើញឈើនេះ បង្ហើបថា ទីតាំងខាងលើនេះជាកន្លែងស្តុកឈើយូរឆ្នាំមកហើយ លើកដាក់លើកដាក់ ដឹកជញ្ជូនតាមគោយន្តផង និងតាមរថយន្តផង។ គេមិនដឹងថា ឈ្មួញដឹកជញ្ជូនឈើនេះ ចេញពីតំបន់ណាមកនោះទេ ប៉ុន្តែអ្វីដែលគេចាប់អារម្មណ៍នោះ ជំនាញរដ្ឋបាលព្រៃឈើ មានតាំងពីសង្កាត់គីរីវ័ន្ត សង្កាត់ត្រែងត្រយឹង សង្កាត់បសេដ្ឋ និងផ្នែករដ្ឋបាលព្រៃឈើបសេដ្ឋ ថែមទៀតផងនោះ តើហេតុអ្វីបានជាគ្មានឆន្ទៈក្នុងការទប់ស្កាត់ និងបង្ក្រាបបទល្មើសព្រៃឈើ បែរជាទុកឱ្យគណៈបញ្ជាការឯកភាពស្រុក ចុះល្បាតហើយរាយការណ៍ទៅអស់លោកជំនាញទៅវិញ ? ។
ក្រោយធ្វើការរឹបអូសឈើទាំង០៤ដុំនោះ ចំពោះវត្ថុតាងឈើខាងលើ គណៈបញ្ជាការឯកភាពរដ្ឋបាលស្រុកបានប្រគល់ជូនទៅរដ្ឋបាលព្រៃឈើស្រុកបសេដ្ឋ ដើម្បីចាត់ការបន្តរតាមច្បាប់រដ្ឋបាលព្រៃឈើ ៕
ចែករំលែកព័តមាននេះ