ខេត្តពោធិ៍សាត់ ៖ លោកខូយ រីដា អភិបាលនៃគណៈអភិបាលខេត្តពោធិ៍សាត់ សូមឲ្យអាជ្ញាធរក្រុងស្រុកទាំង៧ក្នុងខេត្តពោធិ៍សាត់ ជម្រុញឲ្យបណ្ដាក្រុមហ៊ុន និងអាជីវករលក់ដូរតាមលំនៅឋានទាំងអស់ ទម្លាក់ស្លាកផ្ទាំងប៉ាណូផ្សាយពាណិជ្ជកម្មស្រាបៀរគ្រប់ប្រភេទនៅតាមលំនៅឋាន និងតាមដងផ្លូវសាធារណៈនានា…
ខេត្តពោធិ៍សាត់ ៖ លោកខូយ រីដា អភិបាលនៃគណៈអភិបាលខេត្តពោធិ៍សាត់ សូមឲ្យអាជ្ញាធរក្រុងស្រុកទាំង៧ក្នុងខេត្តពោធិ៍សាត់ ជម្រុញឲ្យបណ្ដាក្រុមហ៊ុន និងអាជីវករលក់ដូរតាមលំនៅឋានទាំងអស់ ទម្លាក់ស្លាកផ្ទាំងប៉ាណូផ្សាយពាណិជ្ជកម្មស្រាបៀរគ្រប់ប្រភេទនៅតាមលំនៅឋាន និងតាមដងផ្លូវសាធារណៈនានា ជាពិសេស តាមបណ្ដោយផ្លូវជាតិលេខ៥ ក្នុងភូមិសាស្ត្រខេត្តពោធិ៍សាត់ ។
អនុវត្តតាមបទបញ្ជារបស់លោកអភិបាលខេត្ត ក្នុងការលុបបំបាត់ការផ្សាយពាណិជ្ជកម្មគ្រឿងស្រវឹងនេះ អភិបាលក្រុងស្រុកនីមួយៗ សហការជាមួយក្រុមហ៊ុន និងអាជីវករលក់ដូរតាមផ្ទះ បាននិងកំពុងតែចុះទម្លាក់ស្លាកសញ្ញាផ្ទាំងប៉ាណូធំៗតាមដងផ្លូវជាតិលេខ៥ និងរុះរើយីហោស្រាបៀរតាមផ្ទះជាបន្តបន្ទាប់ ។
គិតត្រឹមថ្ងៃទី២៩ ខែកក្កដា ឆ្នាំ២០២៤ នេះ ស្លាកសញ្ញាផ្ទាំងប៉ាណូតូច-ធំ ដែលផ្សព្វផ្សាយពាណិជ្ជកម្មស្រាបៀរ និងគ្រឿងស្រវឹងគ្រប់ប្រភេទ នៅតាមផ្លូវសាធារណៈក្នុងខេត្តពោធិ៍សាត់ ត្រូវបានរុះរើចេញអស់ស្ទើរទាំងស្រុង ជាពិសេស តាមបណ្តោយផ្លូវជាតិលេខ៥ ចាប់ពីព្រំប្រទល់ខេត្តកំពង់ឆ្នាំង ដល់ព្រំប្រទល់ខេត្តបាត់ដំបង (ស្រុកក្រគរ ក្រុងពោធិ៍សាត់ និងស្រុកបាកាន) ។
ស្លាកសញ្ញាផ្ទាំងប៉ាណូផ្សព្វផ្សាយស្រាបៀរ និងគ្រឿងស្រវឹង ដែលនៅសេសសល់ នឹងត្រូវរុះរើចេញជាបន្តបន្ទាប់ជារៀងរាល់ថ្ងៃ ។ មន្ត្រីរាជការ និងប្រជាពលរដ្ឋក៏ដូចគ្រូបង្រៀនក្នុងខេត្តពោធិ៍សាត់ បានសម្តែងការគ្រាំទ្រចំពោះចំណាត់ការរបស់លោក ខូយ រីដា អភិបាលនៃគណៈអភិបាលខេត្ត ក្នុងការរុះរើស្លាកយីហោផ្ទាំងប៉ាណូផ្សព្វផ្សាយស្រាបៀរចេញពីទីសាធារណៈ ដើម្បីកាត់បន្ថយការទទួលទានគ្រឿងស្រវឹង ដល់បងប្អូនប្រជាពលរដ្ឋទាំងចាស់ទាំងក្មេង ដែលនាំឲ្យប៉ះពាល់សុខភាពបង្កគ្រោះថ្នាក់ចរាចរណ៍ ឬប្រើអំពើហិង្សាក្នុងគ្រួសារដោយសារតែការទទួលទានគ្រឿងស្រវឹងនេះ ។
គួររំលឹកថា ថ្មីៗនេះផ្ទាំងប៉ាណូផ្សាយពាណិជ្ជកម្មស្រាបៀរគ្រប់ប្រភេទនៅតាមបណ្ដារាជធានី-ខេត្ត-ក្រុងមួយចំនួន ត្រូវបានទម្លាក់ចេញជាបណ្ដើរៗហើយ ។ ដោយឡែក ខេត្តពោធិ៍សាត់ កំពុងតែចាប់ផ្ដើមនៅចុងខែកក្កដានេះ ដែលទទួលបានការគាំទ្រយ៉ាងខ្លាំង ពីមន្ត្រីរាជការនិងប្រជាពល
រដ្ឋ ៕
ចែករំលែកព័តមាននេះ