ខេត្តកំពង់ឆ្នាំង ៖ សាលាក្រុងកំពង់ឆ្នាំង បានដាក់ឱសានវាទដល់គ្រប់បណ្ដាក្រុមហ៊ុនស្រាបៀរ ក្នុងក្រុងកំពង់ឆ្នាំងទាំងអស់ ត្រូវទម្លាក់ផ្លាកផ្សាយពាណិជ្ជកម្មតាមដងផ្លូវនានាក្នុងក្រុងឲ្យអស់ត្រឹមថ្ងៃទី៣១ ខែកក្កដា ខាងមុខនេះ ដែលលោកអភិបាលរងក្រុងបានថ្លែងនៅក្នុងកិច្ចប្រជុំនេះកាលពីរសៀលថ្ងៃទី២៥ ខែកក្កដា…
ខេត្តកំពង់ឆ្នាំង ៖ សាលាក្រុងកំពង់ឆ្នាំង បានដាក់ឱសានវាទដល់គ្រប់បណ្ដាក្រុមហ៊ុនស្រាបៀរ ក្នុងក្រុងកំពង់ឆ្នាំងទាំងអស់ ត្រូវទម្លាក់ផ្លាកផ្សាយពាណិជ្ជកម្មតាមដងផ្លូវនានាក្នុងក្រុងឲ្យអស់ត្រឹមថ្ងៃទី៣១ ខែកក្កដា ខាងមុខនេះ ដែលលោកអភិបាលរងក្រុងបានថ្លែងនៅក្នុងកិច្ចប្រជុំនេះកាលពីរសៀលថ្ងៃទី២៥ ខែកក្កដា ឆ្នាំ២០២៤ ។
លោក ទូច លីហួត អភិបាលរងក្រុងកំពង់ឆ្នាំង នៅរសៀលថ្ងៃទី២៦ ខែកក្កដា នេះ បានបញ្ជាក់ថា សាលាក្រុងបានបើកកិច្ចប្រជុំមួយជាមួយនឹងម្ចាស់ក្រុមហ៊ុនស្រាបៀរទាំងអស់ដែលបានលើកផ្លាកផ្សាយពាណិជ្ជកម្មតាមដងផ្លូវនានា ជាពិសេសនៅតាមផ្លូវជាតិលេខ៥ត្រូវរុះរើផ្លាករបស់ខ្លួនឲ្យរួចរាល់ក្នុងរយៈពេលមួយសប្តាហ៍។ ហើយបើមិនអនុវត្តទេ ចាប់ពីថ្ងៃទី១ ខែសីហា ទៅ សាលាក្រុងនឹងមានវិធានការឲ្យម្ចាស់ក្រុមហ៊ុនទទួលខុសត្រូវដោយខ្លួនឯង ។
អភិបាលរងក្រុងកំពង់ឆ្នាំងក៏បានបន្តថា ក្រុមហ៊ុនអាចបិទផ្សាយពាណិជ្ជកម្មជាភេសជ្ជៈដូចជាទឹកក្រូច ឬទឹកផ្លែឈើបាន ប៉ុន្តែមិនអនុញ្ញាតឲ្យផ្សាយពាណិជ្ជកម្មស្រាបៀរនោះទេ ។
សូមរំលឹកថា កន្លងមក និងថ្មីៗនេះ ផ្លាកផ្សាយពាណិជ្ជកម្មស្រាបៀរនៅតាមបណ្ដារាជធានីក្រុងមួយចំនួន ត្រូវបានទម្លាក់ចេញអស់ហើយ ។ ចំណែកសាលាក្រុងកំពង់ឆ្នាំងចាប់ផ្ដើមអនុវត្តនៅចុងខែកក្កដានេះ គឺជាអ្វីដែលប្រជាពលរដ្ឋចង់បានជាយូរណាស់មកហើយ ហើយវិធានការនេះ ត្រូវបានប្រជាពលរដ្ឋសាទរក្រៃលែង ។
ចែករំលែកព័តមាននេះ