ទីក្រុងរ៉ង់ហ្គូន៖ នៅទីបញ្ចប់ អំណាចទាំងអស់បានធ្លាក់ទៅក្នុងដៃរបស់លោកមីនអុងឡាំងទាំងអស់ក្នុងនាមជាប្រមុខដឹកនាំរបបយោធាភូមាបន្ទាប់ពីប្រមុខរដ្ឋស្ដីទី លោកម្យីនស្វេ (Myint Swe) ធ្លាក់ខ្លួនឈឺទាំងប្រព័ន្ធខួរក្បាល និងសរីរៈរាងកាយដល់ថ្នាក់ធ្វើការលែងកើតតទៅទៀត។ ថ្មីៗនេះ ខុទ្ទកាល័យរបស់លោកម្យីនស្វេបានធ្វើលិខិតជាលាយលក្ខណ៍អក្សរដើម្បីផ្ទេរភារកិច្ច…
ទីក្រុងរ៉ង់ហ្គូន៖ នៅទីបញ្ចប់ អំណាចទាំងអស់បានធ្លាក់ទៅក្នុងដៃរបស់លោកមីនអុងឡាំងទាំងអស់ក្នុងនាមជាប្រមុខដឹកនាំរបបយោធាភូមាបន្ទាប់ពីប្រមុខរដ្ឋស្ដីទី លោកម្យីនស្វេ (Myint Swe) ធ្លាក់ខ្លួនឈឺទាំងប្រព័ន្ធខួរក្បាល និងសរីរៈរាងកាយដល់ថ្នាក់ធ្វើការលែងកើតតទៅទៀត។ ថ្មីៗនេះ ខុទ្ទកាល័យរបស់លោកម្យីនស្វេបានធ្វើលិខិតជាលាយលក្ខណ៍អក្សរដើម្បីផ្ទេរភារកិច្ច និងតួនាទីគ្រប់យ៉ាងជូនទៅលោកមីនអុងឡាំង។ ចំណែកលោកម្យីនស្វេសូមឈប់សម្រាកដើម្បីព្យាបាលជំងឺ។
សេចក្ដីប្រកាសផ្ទេរតំណែងនេះត្រូវបានផ្សព្វផ្សាយនៅលើទូរទស្សន៍របស់រដ្ឋភូមា អឹមអ័រធីវី (MRTV) ដែលនិយាយថា «លិខិតនោះបានផ្ដល់សិទ្ធិអំណាចពេញលេញជូនទៅលោកមីនអុងឡាំងដើម្បីទទួលតំណែងជាប្រធានាធិបតីស្ដីទីដោះស្រាយបញ្ហាពាក់ព័ន្ធនឹងកិច្ចការពារជាតិ និងសន្តិសុខជាតិនៅពេលលោកម្យីនស្វេកំពុងអវត្តមានពីការងារដើម្បីព្យាបាលជំងឺ»។
ការប្រកាសផ្ទេរតំណែងនេះកើតឡើង១សប្ដាហ៍មុនពេលផុតសុពលភាពនៃការប្រកាសដាក់ប្រទេសជាតិនៅក្នុងគ្រាអាសន្នដូចដែលប្រទេសនេះធ្លាប់ធ្វើជារៀងរាល់ឆ្នាំចាប់តាំងពីឆ្នាំ២០២១មក។ លោកម្យីនស្វេសព្វថ្ងៃនេះមានអាយុ៧៣ឆ្នាំ។ លោកមានបញ្ហាធ្ងន់ធ្ងរផ្នែកប្រព័ន្ធសរសៃប្រសាទ និងសរីរៈរាងកាយ។ នេះបើយោងតាមការផ្សព្វផ្សាយរបស់ទូរទស្សន៍រដ្ឋភូមា។
ទូរទស្សន៍នេះផ្សាយបន្តទៀតថាលោកម្យីនស្វេបានធ្លាក់ខ្លួនឈឺ និងសម្រាកព្យាបាលជំងឺចាប់តាំងពីដើមឆ្នាំ២០២៤រហូតមកដល់ពេលនេះមិនព្រមធូរស្បើយទាល់តែសោះ។ លោកមិនអាចបំពេញការងារប្រចាំថ្ងៃតទៅទៀតទេ។ សូម្បីតែបរិភោគអាហារក៏បរិភោគមិនកើតផង។ លោកម្យីនស្វេធ្លាប់កាន់តំណែងជាអនុប្រធានាធិបតីកាលពីជំនាន់លោកស្រីអង់សានស៊ូជីកាន់អំណាច។ ក្រោយមក លោកត្រូវបានតែងតាំងជាប្រធានាធិបតីស្ដីទីនៅពេលលោកមីនអុងឡាំងឡើងកាន់អំណាច។
ថ្វីដ្បិតលោកម្យីនស្វេជាមេដឹកនាំមានតែឈ្មោះ ប៉ុន្តែរបបដឹកនាំយោធារបស់លោកមីនអុងឡាំងត្រូវការប្រើប្រាស់រូបលោកដើម្បីចុះហត្ថលេខាលើច្បាប់ផ្សេងៗ និងទទួលជួបភ្ញៀវបរទេស។ ក្រុមប្រឹក្សាការពារជាតិ និងសន្តិសុខជាតិជាផ្លូវការដឹកនាំដោយប្រធានាធិបតី។ ប៉ុន្តែអំណាចពិតប្រាកដនៅតែស្ថិតនៅក្នុងដៃរបស់ពួកយោធាជាដដែលទេ។ ក្រុមប្រឹក្សានេះមានតួនាទីបន្តសុពលភាពដាក់ប្រទេសនៅក្នុងគ្រាអាសន្នរៀងរាល់៦ខែម្ដងដើម្បីឱ្យរបបយោធាដឹកនាំប្រទេសជាបន្តទៀត។
ពួកយោធាអះអាងថាការប្រកាសដាក់ប្រទេសជាតិនៅក្នុងគ្រាអាសន្នជារឿងសំខាន់ណាស់ដើម្បីថែរក្សាស្ថិរភាពជាតិនៅពេលក្រុមប្រឆាំងបន្តវាយប្រហារប្រដាប់អាវុធឥតឈប់ឈរនៅគ្រប់សមរភូមិទាំងអស់។ លោកម្យីនស្វេក្លាយជាប្រធានាធិបតីស្ដីទីបន្ទាប់ពីមានអំពើរដ្ឋប្រហារឆ្នាំ២០២១។ កាលនោះ តំណែងប្រធានាធិបតីស្ថិតនៅក្នុងដៃរបស់លោកវីនម្យីន (Win Myint)។ ប៉ុន្តែដោយសារលោកវីនម្យីនជាខ្សែខាងលោកស្រីស៊ូជី។ ដូច្នេះ ពួកយោធាចាប់គាត់ដាក់ឃុំដូចលោកស្រីស៊ូជីដែរ។
លោកម្យីនស្វេជាខ្សែខាងលោកមីនអុងឡាំង និងជាអ្នកគាំទ្ររបបយោធាតាំងពីដើមរៀងមក។ លោកអាចមានឱកាសឡើងកាន់តំណែងជាប្រធានាធិបតីស្ដីទីដោយសារលោកធ្លាប់កាន់តំណែងជាអនុប្រធានាធិបតីលំដាប់ទី១។ ដូច្នេះ នៅពេលលោកវីនម្យីនជាប់ពន្ធនាគារ, លោកម្យីនស្វេក៏ឡើងកាន់តំណែងស្ដីទី។ ក្រោយការផ្ទេរមុខតំណែងនេះ ក្រុមប្រឹក្សាការពារជាតិ និងសន្តិសុខជាតិនឹងមានសិទ្ធិកោះប្រជុំដើម្បីប្រកាសដាក់ប្រទេសជាតិនៅក្នុងគ្រាអាសន្ន និងប្រគល់អំណាចផ្ដាច់មុខជូនទៅលោកមីនអុងឡាំង។ លោកសន្យាថានឹងរៀបចំការបោះឆ្នោតតាមបែបប្រជាធិបតេយ្យនាឆ្នាំ២០២៥ខាងមុខនេះ៕
ចែករំលែកព័តមាននេះ