ទីក្រុងវ៉ាស៊ីនតោន៖ តើលោកបៃដិនអាចមានក្រឡាឈ្នះឆ្នោតនៅចុងឆ្នាំ២០២៤នេះ ឬយ៉ាងណា? នេះជាសំណួរដ៏ធំមួយចំពេលលោកបៃដឹនធ្វើតេស្តឃើញឆ្លងមេរោគកូវីដ១៩កាលពីព្រឹកថ្ងៃព្រហស្បតិ៍។ នេះជាសញ្ញាមិនសូវល្អប៉ុន្មានទេ ហើយរឹតតែបន្ថែមបន្ទុកទៅលើលោកបៃដិន និងគណបក្សប្រជាធិបតេយ្យថែមទៀត។
ចំណែកគណបក្សសាធារណរដ្ឋចេះតែទៅមុខហើយ។ ឥឡូវនេះ មានរុស្ស៊ីជួយឃោសនាឱ្យបក្សសាធារណរដ្ឋជាប្រយោលថែមទៀត។ រដ្ឋមន្ត្រីការបរទេសរុស្ស៊ីថ្លែងថាទីក្រុងម៉ូស្គូគាំទ្រជំហររបស់លោកជេរឌីវេន(JD Vance)ជាបេក្ខជនអនុប្រធានាធិបតីដែលគាំទ្រឱ្យបញ្ចប់សង្គ្រាមអ៊ុយក្រែន។
ថ្មីៗនេះ លោកស្រីផេឡូស៊ី (Nancy Pelosi) ដែលជាអតីតប្រធានរដ្ឋសភាអាមេរិកមកពីគណបក្សប្រជាធិបតេ្យបាននិយាយខ្សិបប្រាប់លោកបៃដិនស្ងាត់ៗថា «បក្សយើងប្រហែលជាចាញ់ឆ្នោតហើយព្រោះលទ្ធផលស្ទង់មតិបង្ហាញថាលោកបៃដិនមិនអាចយកឈ្នះលោកត្រាំបានឡើយ»។ លោកស្រីផេឡូស៊ីនិយាយស្ងាត់ៗនៅក្នុងការសន្ទនានោះថា «ស្រួលមិនស្រួល លោកបៃដិនអាចនឹងបំផ្លាញផលប្រយោជន៍របស់គណបក្សខ្លួនឯងទៅវិញទេ។ សូម្បីតែតំណែងប្រធានរដ្ឋសភាអាមេរិកក៏ប្រហែលជាគណបក្សប្រជាធិបតេយ្យមិនអាចដណ្ដើមបានផងនៅក្នុងការបោះឆ្នោតនាខែវិច្ឆិកា ឆ្នាំ២០២៤នោះ»។
លោកស្រីនិយាយនេះនៅក្នុងករណីដែលលោកបៃដិននៅតែបន្តឈរឈ្មោះជាបេក្ខជនប្រធានាធិបតី។ ខាងលើនេះជាការអះអាងរបស់ប្រភពដែលដឹងរឿងនេះច្បាស់ចំនួន៤ប្រភពផ្សេងៗគ្នាដែលស្ដាប់ឮការសន្ទនាគ្នាតាមទូរស័ព្ទ។ នេះជាការសន្ទនាគ្នាលើកទី២រវាងលោកបៃដិន និងលោកស្រីផេឡូស៊ីចាប់តាំងពីថ្ងៃទី២៧ ខែមិថុនាជាពេលដែលលោកបៃដិនឡើងតទល់មតិគ្នាជាមួយលោកត្រាំ។ គេគិតថាលោកបៃដិនឡើងវេទិកានោះមិនមែននាំឱ្យចំណេញទេ ប៉ុន្តែនាំឱ្យខាតធ្ងន់តែម្ដង។
នៅក្នុងការសន្ទនាគ្នាលើកទី២នេះ គេស្ដាប់ឮលោកបៃដិននិយាយប្រកែក។ លោកប្រាប់លោកស្រីផេឡូស៊ីថាលទ្ធផលស្ទង់មតិបង្ហាញថាលោកអាចមានក្រឡាឈ្នះឆ្នោត។ នេះបើយោងតាមប្រភព១ដែលបានបង្ហើបឱ្យដឹង។ យោងតាមប្រភព១ទៀត, លោកបៃដិនប្រាប់លោកស្រីផេឡូស៊ីថាលោកអាចនឹងមានក្រឡាឈ្នះបើយោងតាមលទ្ធផលស្ទង់មតិ។ កំពុងសន្ទនាគ្នាសុខៗ លោកស្រីផេឡូស៊ីបានប្រាប់ឱ្យទីប្រឹក្សារបស់លោកបៃដិនយកលទ្ធផលស្ទង់មតិមកពិនិត្យមើលឡើងវិញចុះបើមិនជឿតាមសម្ដីរបស់លោកស្រីទេ។
គេមិនបានដឹងច្បាស់ថាតើអ្នកទាំង២សន្ទនាគ្នាតាមទូរស័ព្ទនោះតាំងពីពេលណាមកទេ។ ប៉ុន្តែប្រភព១ប្រាប់ថាប្រហែលជាសន្ទានាគ្នាកាលពីសប្ដាហ៍មុន។ កាលពីដើមខែកក្កដា អ្នកទាំង២ក៏ធ្លាប់សន្ទនាគ្នាម្ដងដែរ។ សូមជម្រាបថានៅក្នុងចំណោមប្រភពទាំង៤ដែលបញ្ចេញឱ្យទូរទស្សន៍ស៊ីអឹនអឹន (CNN) បានដឹងនោះ គ្មានប្រភពណា១បញ្ជាក់ឱ្យបានច្បាស់ថាតើលោកស្រីផេឡូស៊ីនៅក្នុងការសន្ទនានោះបានជូនយោបល់ឱ្យលោកបៃដិនដកខ្លួនថយពីបេក្ខភាពប្រធានាធិបតី ឬយ៉ាងណាទេ។
ប៉ុន្តែច្បាស់ណាស់ថាលោកស្រីផេឡូស៊ីយកចិត្តទុកដាក់ខ្ពស់ចំពោះសភាពការណ៍វិវត្តនៅក្នុងគណបក្សប្រជាធិបតេយ្យ។ ជាច្រើនសប្ដាហ៍មកហើយ លោកស្រីបានចំណាយពេលស្ទាបស្ទង់មតិយោបល់ ក៏ដូចជាការព្រួយបារម្ភនៅក្នុងចំណោមមន្ត្រីធំៗរបស់គណបក្សនេះ។ លោកស្រីផេឡូស៊ីធ្វើឱ្យគេចាប់អារម្មណ៍ត្រង់ចំណុច១នៅពេលលោកស្រីនិយាយនៅក្នុងបទសម្ភាសកាលពីសប្ដាហ៍មុនថា «ករណីលោកបៃដិនបន្តឈរឈ្មោះជាបេក្ខជនប្រធានាធិបតី ឬយ៉ាងណាអាស្រ័យលើការសម្រេចចិត្តរបស់គាត់ទៅចុះ។ យើងទាំងអស់គ្នាលើកទឹកចិត្តឱ្យគាត់សម្រេចចិត្តលើរឿងនេះដោយសារពេលវេលាកាន់តែខ្លីណាស់ទៅហើយ»។ នេះបើយោងតាមប្រភពពីគេហទំព័រស៊ីអឹនអឹន (CNN)។
ឈានដល់ដំណាក់កាលនេះ គេគិតថាគណបក្សប្រជាធិបតេយ្យចង់ជ្រុលក្បាលក្រពើបន្តិចទៅហើយ។ ពោលគឺមិនខុសពីសម្ដីរបស់លោកស្រីផេឡូស៊ីបានលើកឡើងនោះទេ។ គណបក្សប្រជាធិបតេយ្យស្ថិតនៅក្នុងដំណាក់កាលពិបាកសម្រេចចិត្ត។ ទី១-តើលោកបៃដិនអាចតស៊ូនឹងការដាក់សម្ពាធកាន់តែខ្លាំងឱ្យលោកដកខ្លួនថយដែរឬទេ? ទី២-បើលោកបៃដិនដកខ្លួនថយ ហើយដាក់បេក្ខជនផ្សេង តើបក្សនេះអាចមានសង្ឃឹមឈ្នះឆ្នោតដែរឬទេបើនៅក្នុងជួរបក្សនេះមានតែលោកបៃដិននេះហើយដែលមានសំឡេងគាំទ្រខ្ពស់ជាងគេ ហើយសង្ឃឹមឈ្នះលោកត្រាំ?
ថ្មីៗនេះ លោកបៃដិនក៏ទទួលស្គាល់ផងដែរថាលោកអាចនឹងពិចារណាដកខ្លួនថយ បើសិនគ្រូពេទ្យពិនិត្យឃើញថាលោកមានបញ្ហាធ្ងន់ធ្ងរផ្នែកសុខភាពរហូតដល់ទៅមុខលែងរួច។ ប៉ុន្តែនិយាយចុះនិយាយឡើងដូចជម្រាបជូនពីខាងដើមស្រាប់។ បើលោកដកខ្លួនថយ ក៏គណបក្សមិនឈ្នះឆ្នោត។ បើលោកនៅបន្ត ក៏គណបក្សមិនប្រាកដជាឈ្នះឆ្នោត។ ស្ថានភាពនេះប្រៀបបាននឹងមនុស្សដែលស្ថិតនៅលើអគារដ៏ខ្ពស់១ដែលកំពុងត្រូវភ្លើងឆេះយ៉ាងសន្ធោសន្ធៅ។ បើបន្តនៅលើអគារក៏ស្លាប់នឹងភ្លើងឆេះ។ បើប្រថុយលោតចុះពីលើអគារក៏មិនប្រាកដជានៅរស់៕
ចែករំលែកព័តមាននេះ