ទីក្រុងប៉េកាំង៖ មានហេតុការណ៍ឆេះផ្សារទំនើបមួយកន្លែងនៅប្រទេសចិនបណ្ដាលឱ្យស្លាប់មនុស្សយ៉ាងតិច៦នាក់។ ក្រៅពីនេះ មនុស្ស៣០នាក់ទៀតត្រូវគេជួយសង្គ្រោះចេញពីភ្លើងដែលឆាបឆេះយ៉ាងសន្ធោសន្ធៅ។ នេះបើយោងតាមការផ្សាយរបស់សារព័ត៌មានរបស់រដ្ឋ។ ទូរទស្សន៍ស៊ីស៊ីធីវី (CCTV) ផ្សាយថាមនុស្ស៦នាក់បានស្លាប់ហើយ ហើយក្រុមការងារបន្តស្វែងរក និងជួយសង្គ្រោះអ្នកបាត់ខ្លួន។…
ទីក្រុងប៉េកាំង៖ មានហេតុការណ៍ឆេះផ្សារទំនើបមួយកន្លែងនៅប្រទេសចិនបណ្ដាលឱ្យស្លាប់មនុស្សយ៉ាងតិច៦នាក់។ ក្រៅពីនេះ មនុស្ស៣០នាក់ទៀតត្រូវគេជួយសង្គ្រោះចេញពីភ្លើងដែលឆាបឆេះយ៉ាងសន្ធោសន្ធៅ។ នេះបើយោងតាមការផ្សាយរបស់សារព័ត៌មានរបស់រដ្ឋ។ ទូរទស្សន៍ស៊ីស៊ីធីវី (CCTV) ផ្សាយថាមនុស្ស៦នាក់បានស្លាប់ហើយ ហើយក្រុមការងារបន្តស្វែងរក និងជួយសង្គ្រោះអ្នកបាត់ខ្លួន។
តាមរយៈវីឌីអូឃ្លីបដែលផ្សព្វផ្សយនៅលើទូរទស្សន៍ស៊ីស៊ីធីវី និងបង្ហោះនៅលើបណ្ដាញសង្គម គេឃើញផ្សែងខ្មៅងងឹតហុយចេញពីអគារនៅទីក្រុងស៊ីកុង (Zigong) ខេត្តស៊ីឈាន់ (Sichuan)។ គិតត្រឹមម៉ោង៨:២០យប់ថ្ងៃពុធ អគ្គិភ័យត្រូវបានពន្លត់រួចរាល់។ នេះបើតាមការផ្សាយរបស់ទូរទស្សន៍ស៊ីស៊ីធីវ។ ប៉ុន្តែអ្នកខ្លះនៅជាប់ផុងនៅក្នុងអគារ។ ដូច្នេះ ក្រុមការងារត្រូវតែបន្តស្វែងរកអ្នកទាំងនោះ។ ភ្លើងចាប់ផ្ដើមឆាបឆេះនៅពេលក្បាលព្រលប់ថ្ងៃពុធចេញពីជាន់ក្រោមនៃអគារកម្ពស់១៤ជាន់។
តាមរយៈរូបដែលគេចែកចាយតគ្នាតាមបណ្ដាញសង្គម គេឃើញថាហ្វូងមនុស្សឈរកកកុញនៅពីមុខអគារដែលឆេះ និងឃើញរថយន្តបាញ់ទឹក និងរថយន្តគិលានសង្គ្រោះ។ ផ្នែកសង្គ្រោះបន្ទាន់នៃទីក្រុងស៊ីកុងបានទទួលការទូរស័ព្ទដើម្បីធ្វើអន្តរាគមន៍នៅម៉ោង៦:១១ថ្ងៃពុធ។ ហេតុនេះ ពួកគេក៏ប្រញាប់បញ្ជូនភ្នាក់ងារពន្លត់អគ្គិភ័យទៅកន្លែងកើតហេតុ។
អាជ្ញាធរស្នើសុំឱ្យសាធារណជនកុំជឿទៅតាមការនិយាយបំប៉ោងព័ត៌មានពាក់ព័ន្ធនឹងហេតុការណ៍នេះ។ ទីក្រុងស៊ីកុងស្ថិតនៅចម្ងាយ១៩០០គីឡូម៉ែត្រពីទីក្រុងប៉េកាំង និងមានមនុស្សរស់នៅជិត២លាន ៥សែននាក់។ សូមរំលឹកថាកាលពីខែមករា ឆ្នាំ២០២៤ ធ្លាប់មានករណីភ្លើងឆេះហាងលក់ទំនិញនៅទីក្រុងស៊ីនយូ (Xinyu)បណ្ដាលឱ្យស្លាប់មនុស្សរាប់សិបនាក់។ ទីភ្នាក់ងារព័ត៌មានស៊ីនហួរផ្សាយថាភ្លើងឆេះនៅពេលនោះដោយសារបុគ្គលិកបម្រើការនៅក្នុងហាងដុតភ្លើងនៅជាន់ខាងក្រោម។
កាលនោះ ប្រធានាធិបតីចិន លោកស៊ីជីនពីង ចាត់ទុកថានេះជាមេរៀនដ៏ជូរចត់ដែលប្រទេសចិនត្រូវចងចាំទុកដើម្បីជៀសវាងមិនឱ្យមានសោកនាដកម្មបែបនេះកើតឡើងជាថ្មីម្ដងទៀត។ កាលពីខែមករា ឆ្នាំ២០២៤ដដែលក៏មានភ្លើងឆេះអគារមួយទៀតសម្លាប់មនុស្សយ៉ាងតិច១៥នាក់។ កាលពីមុននោះត្រឹមតែប៉ុន្មានថ្ងៃប៉ុណ្ណោះក៏មានហេតុការណ៍ឆេះអគារនៅសាលារៀននៃខេត្តហឺណាន (Henan) បណ្ដាលឱ្យស្លាប់សិស្សសាលាតូចៗ១៣នាក់ដែលកំពុងគេងលក់នៅក្នុងអន្តេវាសិកដ្ឋាន៕
ចែករំលែកព័តមាននេះ