រាជធានីភ្នំពេញ ៖ រាជរដ្ឋាភិបាលបានសម្រេចផ្ទេរភារកិច្ចប្រធានមន្ទីរបរិស្ថាននៅខេត្តចំនួន២រូប គឺប្រធានមន្ទីរបរិស្ថានខេត្តពោធិ៍សាត់ និងប្រធានមន្ទីរបរិស្ថានខេត្តមណ្ឌលគិរីឲ្យមកបំរើការងារនៅទីស្តីការក្រសួងបរិស្ថានវិញ ។ យោងតាមអនុក្រឹត្យរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាចេញផ្សាយកាលពីពេលថ្មីកន្លងមកនេះ…
រាជធានីភ្នំពេញ ៖ រាជរដ្ឋាភិបាលបានសម្រេចផ្ទេរភារកិច្ចប្រធានមន្ទីរបរិស្ថាននៅខេត្តចំនួន២រូប គឺប្រធានមន្ទីរបរិស្ថានខេត្តពោធិ៍សាត់ និងប្រធានមន្ទីរបរិស្ថានខេត្តមណ្ឌលគិរីឲ្យមកបំរើការងារនៅទីស្តីការក្រសួងបរិស្ថានវិញ ។
យោងតាមអនុក្រឹត្យរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាចេញផ្សាយកាលពីពេលថ្មីកន្លងមកនេះ បានសម្រេចផ្ទេរភារកិច្ចមន្ត្រីរាជការចំនួន២រូបរបស់ក្រសួងបរិស្ថាន គឺ១-លោក ឆៅ ប៊ុនធឿន ឋានន្តរស័ក្តវរមន្ត្រី ថ្នាក់លេខ១ ពីប្រធានមន្ទីបរិស្ថានខេត្តមណ្ឌលគិរី ឲ្យមកបម្រើការងារនៅទីស្តីការក្រសួងបរិស្ថាន។ ២-លោកគង់ ពុទ្ធីរ៉ា ឋានន្តរស័ក្តិឧត្ត មមន្ត្រីថ្នាក់លេខ៥ ពីប្រធានមន្ទីបរិស្ថាន ខេត្តពោធិ៍សាត់ឲ្យមកបម្រើការងារនៅទីស្តីការក្រសួងបរិស្ថានវិញ ។
សូមជម្រាបថា កាលពីពេលកន្លងមកនេះ អភិបាលខេត្តមណ្ឌលគិរីបានដាក់សំណើទៅរដ្ឋមន្ត្រីក្រសួងបរិស្ថាន សុំសម្រួលភារកិច្ច លោក ឆៅ ប៊ុនធឿន ប្រធានមន្ទីរបរិស្ថានខេត្តមណ្ឌលគិរីឱ្យទៅបម្រើការងារនៅទីស្ដីការក្រសួងបរិស្ថានវិញ ។
លិខិតរបស់រដ្ឋបាលខេត្តមណ្ឌលគិរីដែល គោរពជូនទៅឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថានបញ្ជាក់ពីមូលហេតុថា យោងស្មារតីកិច្ចប្រជុំថ្ងៃទី២៣ ខែមេសា ឆ្នាំ២០២៤ របស់រដ្ឋបាលខេត្តមណ្ឌលគិរី បន្ទាប់ពីទទួលបានអនុសាសន៍ណែនាំ៧ចំណុច នៅក្នុងកិច្ចប្រជុំកាលពីថ្ងៃទី២៩ ខែមីនា ឆ្នាំ២០២៤ របស់គណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ក្នុងការចាត់វិធានការរដ្ឋបាលមន្ត្រីពាក់ព័ន្ធករណីបទល្មើសធនធានធម្មជាតិ នៅក្នុងតំបន់ដែនជម្រកសត្វព្រៃណាមលៀរ ។
ការស្នើសុំនេះដែរ បន្ទាប់ពីឯកឧត្តមនាយឧត្ដមសេនីយ៍ សៅ សុខា ប្រធានគណៈកម្មការជាតិបង្ក្រាបបទល្មើសធនធានធម្មជាតិ បានដឹកនាំកម្លាំងចម្រុះ គ្រប់ក្រសួងស្ថាប័នពាក់ព័ន្ធចុះត្រួតពិនិត្យការទន្ទ្រានយកដីរដ្ឋក្នុងទំហំធំមហាសាលលាតសន្ធឹងលើដែនជម្រកសត្វព្រៃភ្នំណាមលៀរ ភូមិសាស្ត្រស្រុកពេជ្រាដា ខេត្តមណ្ឌលគិរី ។
នៅក្នុងកិច្ចប្រជុំជាមួយកម្លាំងជំនាញពាក់ព័ន្ធនៅសាលាខេត្តមណ្ឌលគិរី កាលពីថ្ងៃ២៩ ខែមីនា ឆ្នាំ២០២៤ នាយឧត្ដមសេនីយ៍ សៅ សុខា បានដាក់បទបញ្ជាម៉ឺងមាត់ឲ្យមន្ត្រីជំនាញពាក់ព័ន្ធទាំងអស់ទាំងថ្នាក់ខេត្ត និងថ្នាក់ក្រសួងស្ថាប័នរៀងៗខ្លួន ត្រូវស្រាវជ្រាវវែកមុខរកមេខ្លោង មេខ្យល់ ដែលបំផុសឲ្យមានការកាប់ទន្ទ្រានយកដីរដ្ឋក្នុងទ្រង់ទ្រាយច្រើនបែបនេះ ហើយប្រសិនរកឃើញថាមានមន្ត្រីរាជការ ឬកងកម្លាំង មានការពាក់ព័ន្ធ ត្រូវមានវិធានផ្លូវច្បាប់ ទោះបីមន្ត្រីរបស់ខេត្តមណ្ឌលគិរី ឬមន្ត្រីនៅរាជធានីភ្នំពេញក៏ដោយ ៕
ចែករំលែកព័តមាននេះ