(ឥណ្ឌា)៖  យោងតាមប្រភពព័ត៌មាន Justin Bieber ត្រូវបានមហាសេដ្ឋីឥណ្ឌាដែលមានបំផុតនៅអាស៊ី លោក Mukesh Ambani ​ចំណាយ​ប្រាក់​១០​លាន​ដុល្លារ​ដើម្បីហៅលោកទៅ​សម្តែង​ក្នុង​ពិធី​មង្គលការសម​លោក Anant Ambani ដែលជាកូនប្រុស​ពៅ ក្នុង​ទីក្រុង Mumbai កាលពី​ថ្ងៃទី៥ ខែកក្កដា។

តារា​ចម្រៀង​ប៉ុប​វ័យ ៣០ ឆ្នាំ​រូប​នេះ​បាន​ច្រៀង​បទ​ល្បី​ជាង ១០បទ​ ​រួម​មាន Baby , Love Yourself និង Peaches ក្នុង​ការ​សម្ដែង​ជាឯកជន​សម្រាប់​កូន​កំលោះ Ambani និង​កូនក្រមុំ Radhika Merchant រួម​ទាំងភ្ញៀវកិត្តិយសដែលចូលរួមពិធីមង្គលការ។

Justin Bieber ដែល​មាន​ទ្រព្យ​សម្បត្តិ​ប្រមាណ ៣០០ លាន​ដុល្លារ បាន​ចែករំលែក​រូបថត និង​វីដេអូ​ជា​បន្តបន្ទាប់​ពី​ការ​សម្តែង​នៅ​លើ Instagram កាល​ពី​ថ្ងៃ​ទី ៦ ខែ​កក្កដា។

ការបង្ហោះជាច្រើននៅលើគណនីរបស់ Bieber ក៏បង្ហាញពីដំណើរកម្សាន្តដ៏ខ្លីរបស់គាត់ទៅកាន់ប្រទេសឥណ្ឌា ដោយបង្ហាញពីតារាដែលធ្វើដំណើរដោយរថយន្ត limousine ទៅកាន់ទីតាំងមង្គលការ និងសម្រាកនៅក្នុងបន្ទប់សណ្ឋាគារប្រណីត។

Anant Ambani គឺជាកូនប្រុសពៅរបស់ប្រធាន និងជានាយកប្រតិបត្តិក្រុមហ៊ុន Reliance Industries លោក Mukesh Ambani ដែលជាបុរសមានបំផុតនៅអាស៊ីដែលមានទ្រព្យសម្បត្តិសុទ្ធចំនួន ១២៣.៤ពាន់លានដុល្លារ នេះ បើយោងតាម ទស្សនាវដ្តី Forbes ។ ពិធីមង្គលការរបស់គូស្នេហ៍មួយគូនេះបានធ្វើឡើងជាផ្លូវការនៅថ្ងៃទី ១២-១៤ ខែកក្កដា ប៉ុន្តែប្រហែល ១-២សប្តាហ៍មុននោះ ព្រឹត្តិការណ៍អបអរសាទរធំៗ និងតូចជាច្រើនត្រូវបានប្រារព្ធឡើង។

គ្រួសារ Ambani ក៏បានរៀបចំពិធីជប់លៀង Pre-wedding ដ៏ធំចំនួនពីរនៅក្នុងខែមីនា និងឧសភា នៅក្នុងខែមីនា Rihanna ត្រូវបានគេនិយាយថា បានទទួល ប្រាក់ចំនួន ៦លានដុល្លារ ដើម្បីសម្តែងសម្រាប់គូស្នេហ៍នៅក្នុងពិធីមួយដែលមានការចូលរួមដោយមហាសេដ្ឋី Bill Gates និង Mark Zuckerberg ។ កាលពីខែឧសភា គ្រួសារ Ambani បានរៀបចំដំណើរកម្សាន្តរយៈពេលបីថ្ងៃពីប្រទេសអ៊ីតាលីទៅកាន់ប្រទេសបារាំងដោយមានការចូលរួមពីតារាដូចជា Katy Perry, Pitbull និង David Guetta ។