ទីក្រុងប៉ារីស៖ នៅក្នុងការបោះឆ្នោតសភានៅប្រទេសបារាំងកាលពីយប់មិញ គណបក្សសមាជជាតិរបស់លោកស្រីម៉ារីន ឡឺពែន (Marine Le Pen) អាចឆ្លងផុតវគ្គជម្រុះជុំទី១ដើម្បីបន្តទៅវគ្គផ្ដាច់ព្រ័ត្រនៅថ្ងៃទី៧ ខែកក្កដា។ នេះបើយោងតាមលទ្ធផលបោះឆ្នោតសភាកាលពីយប់ថ្ងៃអាទិត្យ។…
ទីក្រុងប៉ារីស៖ នៅក្នុងការបោះឆ្នោតសភានៅប្រទេសបារាំងកាលពីយប់មិញ គណបក្សសមាជជាតិរបស់លោកស្រីម៉ារីន ឡឺពែន (Marine Le Pen) អាចឆ្លងផុតវគ្គជម្រុះជុំទី១ដើម្បីបន្តទៅវគ្គផ្ដាច់ព្រ័ត្រនៅថ្ងៃទី៧ ខែកក្កដា។ នេះបើយោងតាមលទ្ធផលបោះឆ្នោតសភាកាលពីយប់ថ្ងៃអាទិត្យ។ ទោះជាយ៉ាងណាក្ដី លទ្ធផលចុងក្រោយនៅមិនទាន់ដឹងនៅឡើយទេ។ ចាប់ពីពេលនេះរហូតដល់ថ្ងៃបោះឆ្នោតវគ្គទី២មានរយៈពេលអន្តរកាលប៉ុន្មានថ្ងៃទៀតដែរ។ ដូច្នេះ គណបក្សសមាជជាតិរបស់លោកស្រីឡឺពែនអាចមានវាសនាឈ្នះឆ្នោតឬយ៉ាងណានឹងត្រូវកំណត់ដោយការពូកែនិយាយបញ្ចុះបញ្ចូលអ្នកបោះឆ្នោត។
យោងតាមលទ្ធផលឆ្នោតយប់មិញ គណបក្សសមាជជាតិទទួលបានសំឡេងគាំទ្រ៣៤%។ លទ្ធផលនេះធ្វើឱ្យលោកម៉ាក្រុងខកចិត្តមិនតិចទេព្រោះលោកសម្រេចចិត្តរំលាយរដ្ឋសភា និងរៀបចំការបោះឆ្នោតមុនអាណត្តិដោយសង្ឃឹមថាអាចស្ដារមុខមាត់ឡើងវិញ។ ជាក់ស្ដែង មិនត្រឹមតែស្ដារមិនបានទេ ប៉ុន្តែអាចហុចឱកាសឱ្យគណបក្សស្ដាំនិយមជ្រុលឡើងកាន់អំណាចទៅវិញ។ សំឡេងគាំទ្រគណបក្សសមាជជាតិច្រើនជាងក្រុមឆ្វេងនិយម និងក្រុមកណ្ដាលនិយម។ សូម្បីតែសម្ព័ន្ធភាពគណបក្សរបស់លោកម៉ាក្រុងបានត្រឹម២០-២៣%ប៉ុណ្ណោះ។ ក្រុមសម្ព័ន្ធភាពគណបក្សឆ្វេងនិយមទទួលបាន២៩%។
លទ្ធផលឆ្នោតនេះមិនខុសគ្នាពីការស្ទង់មតិមុនការបោះឆ្នោតនោះទេ ហើយស្របទៅនឹងការរំពឹងទុករបស់ក្រុមអ្នកគាំទ្ររបស់លោកស្រីឡឺពែន។ ប៉ុន្តែលទ្ធផលនេះអាចជាភាពស្រពេចស្រពិល។ គេមិនដឹងថាតើរវាងគណបក្សសមាជជាតិ (ដែលប្រឆាំងនឹងជនអន្តោប្រវេសន៍ និងប្រឆាំងនឹងការចូលសហភាពអឺរ៉ុប) អាចនឹងចូលគ្នាជាមួយគណបក្សរបស់លោកម៉ាក្រុង(ដែលមាននិន្នាការគាំទ្រសហភាពអឺរ៉ុប) ដើម្បីបង្កើតរដ្ឋាភិបាលបានដែរឬទេក្រោយការបោះឆ្នោតជុំទី២នៅថ្ងៃអាទិត្យ?
កាលពីមុននេះ គេពុំដែលនឹកស្មានទាល់តែសោះថាគណបក្សរបស់លោកស្រីឡឺពែនអាចនឹងមានឱកាសកាន់តែខ្លាំងដើម្បីកាន់អំណាច។ ប៉ុន្តែលើកហ្នឹងមើលស្រាលមិនបានទេ។ ស្រួលមិនស្រួលគណបក្សនេះអាចនឹងឡើងកាន់អំណាចមែន។ មែនទែនទៅ បារាំងមិនសូវនិយមនិន្នាការខាងស្ដាំទេព្រោះប្រជាជនបារាំងភាគច្រើនគាំទ្រគំនិតសង្គមនិយម និងឆ្វេងនិយម។
ដូច្នេះហើយ, ដើម្បីប្រមូលសំឡេងគាំទ្រកាន់តែខ្លាំង នយោបាយជ្រុលនិយមខ្លះដូចជាការរើសអើងជាតិសាសន៍ និងការប្រឆាំងនឹងជនជាតិជ្វីបត្រូវគណបក្សសមាជជាតិរបស់លោកស្រីឡឺពែនចាប់ផ្ដើមកែសម្រួលដើម្បីស្រូបទាញការគាំទ្រ។ យុទ្ធសាស្ត្រកែសម្រួលគោលជំហរនេះធ្លាប់ទទួលជោគជ័យនៅពេលគណបក្សសមាជជាតិចុះឃោសនាមុនការបោះឆ្នោតជុំទី១។ មូលហេតុដោយសារប្រជាជនបារាំងខឹងសម្បារយ៉ាងខ្លាំងដែលខ្លួនត្រូវចំណាយច្រើនលើការរស់នៅ។ ម៉្យាងទៀត ពួកគេចាប់ផ្ដើមព្រួយបារម្ភពីការហូរចូលនៃជនអន្តោប្រវេសន៍។ ម៉្លោះហើយ ពួកគេក៏ងាកទៅបោះឆ្នោតឱ្យក្រុមខាងស្ដាំវិញ។
បន្ទាប់ពីដឹងលទ្ធផលឆ្នោតនេះ ក្រុមរបស់លោកស្រីឡឺពែនមានចិត្តសប្បាយរីករាយណាស់។ ពួកគេជួបជុំគ្នានៅទីស្នាក់ការបក្ស និងគ្រវីទង់ជាតិបារាំង។ លោកស្រីឡឺពែនថ្លែងថាប្រជាជនបារាំងចង់ផ្លាស់ប្ដូររបបដឹកនាំសព្វថ្ងៃដែលគួរឱ្យស្អប់ខ្ពើម និងចុះខ្សោយ។ តាមពិត ក្រុមស្ដាំនិយមជ្រុលមិនអាចសប្បាយភ្លេចខ្លួន និងជិះសេះលែងដៃបានឡើយ។ នេះមិនមែនជាលើកទី១ទេដែលក្រុមស្ដាំនិយមជ្រុលតាំងពីជំនាន់ឪពុករបស់លោកស្រីឡឺពែនធ្លាប់ឈ្នះឆ្នោតជម្រុះជុំទី១។ ប៉ុន្តែនៅទីបំផុតត្រូវចាញ់ឆ្នោតត្រឹមវគ្គទី២ដោយសារគូប្រកួតប្រជែងប្រមូលផ្ដុំកម្លាំងគ្នាមកពីច្រើនគណបក្សដើម្បីបោះឆ្នោតទម្លាក់។
ដូច្នេះ គេកំពុងរង់ចាំមើលថាតើប្រវត្តិសាស្ត្រច្រំដែលដែរឬទេ? យោងតាមប្រព័ន្ធបោះឆ្នោតនៅប្រទេសបារាំង បើគ្មានគណបក្សណាទទួលបានសំឡេង៥០%ទេ គណបក្សលេខ១ និងលេខ២នឹងប្រកួតគ្នានៅវគ្គទី២។ បើក្នុងករណីគណបក្សលេខបីទទួលបានសំឡេងគាំទ្រចាប់ពី១២,៥%ឡើងទៅក៏អាចមានសិទ្ធិប្រកួតនៅវគ្គទី២បានដែរ។ ដូចជាលើកនេះជាដើម គណបក្សចំនួន៣នឹងប្រកួតគ្នានៅវគ្គទី២។ គ្រាន់តែចេញលទ្ធផលភ្លាម លោកម៉ាក្រុងក៏ចាប់ផ្ដើមឃោសនាជាបណ្ដើរៗ។ លោកអំពាវនាវឱ្យប្រជាជនដែលជាម្ចាស់ឆ្នោតរួបរួមកម្លាំងគ្នាដើម្បីបោះឆ្នោតទម្លាក់គណបក្សស្ដាំនិយមជ្រុល និងឆ្វេងនិយមជ្រុល៕
ចែករំលែកព័តមាននេះ