ខេត្តស្វាយរៀង ៖ រដ្ឋបាលខេត្តស្វាយរៀង បានដុតបំផ្លាញគ្រឿងញៀន និងសារធាតុគីមីផ្សំ តាមអំណាចសាលក្រមតុលាការ ដែលកម្លាំងសមត្ថកិច្ចបង្ក្រាប និងរឹបអុសបានមានទម្ងន់សរុប ៦២,៦២៩.១៤ក្រាម ក្នុងនោះសារធាតុញៀនចំនួន…
ខេត្តស្វាយរៀង ៖ រដ្ឋបាលខេត្តស្វាយរៀង បានដុតបំផ្លាញគ្រឿងញៀន និងសារធាតុគីមីផ្សំ តាមអំណាចសាលក្រមតុលាការ ដែលកម្លាំងសមត្ថកិច្ចបង្ក្រាប និងរឹបអុសបានមានទម្ងន់សរុប ៦២,៦២៩.១៤ក្រាម ក្នុងនោះសារធាតុញៀនចំនួន ៣៧,១៥៤.៦៦៨ក្រាម ដើម្បី អបអរសាទរទិវាអន្តរជាតិ ប្រយុទ្ធប្រឆាំងគ្រឿងញៀន ២៦ មិថុនា ២០២៤ ក្រោមប្រធានបទ «រួមគ្នាវិនិយោគលើការទប់ស្កាត់ និងលើកកម្ពស់ដើម្បីសហគមន៍គ្មានគ្រឿងញៀន» ដោយមានការអញ្ជើញចូលរួមជាគណៈអធិបតី លោក ប៉េង ពោធិសា អភិបាលខេត្តស្វាយរៀង លោក ម៉ែនវិបុល ប្រធានក្រុមប្រឹក្សាខេត្ត លោកស្រីឧត្តមសេនីយ៍ឯក ជ័យ បុប្ផា អគ្គលេខាធិការរង អាជ្ញាធរជាតិប្រយុទ្ធប្រឆាំងគ្រឿងញៀន និងគណៈប្រតិភូ មន្ត្រីរាជ្យការកងកម្លាំងប្រដាប់អាវុធ សិស្សានុសិស្ស និងប្រជាពលរដ្ឋជាច្រើនកុះករ ។
ពិធីនេះធ្វើឡើងនៅវេលាម៉ោង៨និង០០នាទីព្រឹកដល់ម៉ោង១១និង០០នាទីព្រឹកថ្ងៃទី២៥ ខែមិថុនា ឆ្នាំ២០២៤ នៅទីលានខាងកើតបន្ទាយកងរាជអាវុធហត្ថខេត្ត ស្ថិតនៅភូមិថ្មី សង្កាត់សង្ឃរ័ក្រុងស្វាយរៀង ។
លោកបណ្ឌិត តូច ប៉ូលីវ៉ា អភិបាលរងខេត្ត និងប្រធានលេខាធិការដ្ឋានត្រួតពិនិត្យគ្រឿងញៀនខេត្ត បានរាយការណ៍ជូនអង្គពិធី ថាការអនុវត្តច្បាប់របស់កម្លាំសមត្ថកិច្ច ក្នុងរយៈពេលមួយឆ្នាំកន្លងមកនេះ លេខាធិការដ្ឋានត្រួតពិនិត្យគ្រឿងញៀនខេត្ត បានចុះប្រតិបត្តិការអនុវត្តដិកាបង្គាប់ឲ្យចាប់ខ្លួនបង្រាបបទល្មើសប្រើប្រាស់ រក្សាទុក និងជួញដូរគ្រឿងញៀន ដោយខុសច្បាប់សរុប ១៧៦លើក (ក្នុងនោះករណីប្រើប្រាស់គ្រឿងញៀន០៥លើកករណីជួញដូរគ្រឿងញៀន១៣៨លើក អនុវត្តដិកាចាប់ខ្លួន៣៣ដីការ) ឃាត់ខ្លួនជនសង្ស័យ ៤៣៨នាក់ ស្រី៧៦នាក់ (ជនជាតិវៀតណាម២៤០នាក់ ស្រី៥៦នាក់, ជនជាតិចិន១០នាក់ ជនជាតិតៃវ៉ាន់០៥នាក់ ជនជាតិថៃ០១នាក់ ជនជាតិខ្មែរ១៤១នាក់ស្រី១៨នាក់) បានដកហូតថ្នាំញៀន និងសារធាតុគីមីផ្សំសរុប ៦២,៦២៩.១៤ក្រាម ក្នុងនោះសារធាតុញៀនចំនួន ៣៧,១៥៤.៦៦៨ក្រាម ដែលត្រូវវិចខ្ចប់ដុតបំផ្លាញ នាពេលនេះ ។
មានប្រសាសន៍ទៅកាន់ពិធីនេះ លោក ប៉េង ពោធិសា ប្រធានគណៈកម្មាធិការត្រួតពិនិត្យគ្រឿងញៀនខេត្ត បានដាក់ចេញនូវគោលដៅមួយចំនួនក្នុងការលើកកម្ពស់ប្រសិទ្ធភាព ការងារបង្ការ ទប់ស្កាត់ ប្រយុទ្ធប្រឆាំងគ្រឿងញៀន ក្នុងខេត្តស្វាយរៀង ដែលមានចំណុចសំខាន់ៗដូចខាងក្រោម ៖
១.ត្រូវយកចិត្តទុកដាក់អនុវត្ត នូវសារលិខិតរបស់សម្ដេចធិបតីនាយករដ្ឋមន្ត្រី ក៏ដូចជាខ្លឹមសារប្រធានបទនៅក្នុងឆ្នាំនេះ ឲ្យចេញជាសកម្មភាពពិត និងលទ្ធផលជាក់ស្ដែងនៅក្នុងមូលដ្ឋាន តាមរយៈការលើកកម្ពស់សកម្មភាពផ្សព្វផ្សាយអប់រំឲ្យកាន់តែល្អប្រសើរ សកម្ម និងផុលផុសថែមទៀត ។
២.ត្រូវបន្តផ្ដោតការយកចិត្តទុកដាក់ ចាត់តាំងអនុវត្តឲ្យបានកាន់តែខ្លាំងក្លាថែមទៀតនូវផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកទី៩ គោលនយោបាយភូមិ ឃុំ សង្កាត់មានសុវត្ថិភាព គោលនយោបាយភូមិ ឃុំ សង្កាត់ “ស” គ្មានគ្រឿងញៀន ជាពិសេសការចាត់តាំងអនុវត្តគោលការណ៍ “សម្អាតផ្ទះយើង” និង “សម្អាតចកចេញពីផ្ទៃបឹង” ស្របតាមបទបញ្ជាលេខ០១ បប របស់រាជរដ្ឋាភិបាល ឲ្យបានម៉ឺងម៉ាត់ និងដាច់ខាតបំផុត ។
៣.កម្លាំងមានសមត្ថកិច្ច និងអាជ្ញាធរដែនដីគ្រប់លំដាប់ថ្នាក់ ត្រូវបង្កើន ពង្រឹង និងយកចិត្តទុកដាក់ជំរុញការអនុវត្តវិធានការរដ្ឋបាល និងការអនុវត្តវិធានការច្បាប់ឲ្យបានម៉ឺងម៉ាត់ ចំពោះគោលដៅដែលងាយ ឬកើតមានបទល្មើសគ្រឿងញៀន ជាពិសេសនៅតាមកាស៊ីណូ សណ្ឋាគារ ផ្ទះសំណាក់ ផ្ទះជួល ក្លឹបរាត្រី ខារ៉ាអូខេ និងតំបន់ដែលមានលក្ខណៈស្មុគស្មាញ ។
៤.អាជ្ញាធរមានសមត្ថកិច្ចទាំងអស់ ត្រូវបំផុសដល់ប្រជាពលរដ្ឋឲ្យចូលរួមកាន់តែសកម្មថែមទៀត ក្នុងការផ្ដល់ព័ត៌មានពីក្រុមឧក្រិដ្ឋជន ដែលមានបំណងប៉ុនប៉ងលួចលាក់ផលិត កែច្នៃ និងចរាចរគ្រឿងញៀនក្នុងខេត្ត ។
៥.មេបញ្ជាការកងកម្លាំងប្រដាប់អាវុធគ្រប់ប្រភេទ ត្រូវបង្កើនការយកចិត្តទុកដាក់អប់រំណែនាំ និងពង្រឹងការគ្រប់គ្រងកម្លាំងក្រោមឱវាទរបស់ខ្លួនឲ្យបានតឹងរ៉ឹងបំផុត ចៀសវាងកុំឲ្យពាក់ព័ន្ធក្នុងករណីបទល្មើសគ្រឿងញៀន និងជាមួយឧក្រិដ្ឋជនគ្រឿងញៀន ដោយត្រូវប្រកាន់ខ្ជាប់នូវស្មារតី “៣កុំ ១រាយការណ៍” គឺកុំពាក់ព័ន្ធ កុំអន្តរាគមន៍ កុំបន្ធូរបន្ថយ និងត្រូវរាយការណ៍ ។
៦.កងកម្លាំងប្រដាប់អាវុធគ្រប់ប្រភេទ និងអាជ្ញាធរដែនដីគ្រប់លំដាប់ថ្នាក់ ជាពិសេសនៅតំបន់ព្រំដែន ត្រូវពង្រឹងយន្តការត្រួតពិនិត្យនៅតាមច្រកទ្វារព្រំដែននានាក្នុងខេត្ត ឲ្យបានតឹងរ៉ឹងបំផុត ទប់ស្កាត់ឲ្យបានការនាំចូលនូវសារធាតុគីមីផ្សំគ្រឿងញៀនគ្រប់ប្រភេទ ។
៧.ប៉ុស្ដិ៍នគរបាលរដ្ឋបាលទាំងអស់ ត្រូវយកចិត្តទុកដាក់គ្រប់គ្រង និងក្ដាប់ឲ្យបានច្បាស់លាស់នូវមុខសញ្ញាលក់ និងចែកចាយគ្រឿងញៀន ជាពិសេសអ្នកចំណូលស្រុកមកស្នាក់នៅបណ្ដោះអាសន្ន ប្រកបមុខរបរផ្សេងៗ នៅក្នុងមូលដ្ឋានរបស់ខ្លួន និងត្រូវបង្ក្រាបឲ្យបានទាន់ពេលវេលាពេលមានបទល្មើសកើតឡើង ។
៨.ត្រូវបន្តពង្រឹងសមត្ថភាព គុណភាព និងប្រសិទ្ធភាព នៃយន្តការបន្សាបគ្រឿងញៀននៅតាមមណ្ឌលសុខភាព និងមន្ទីរពេទ្យដែលមានស្រាប់នៅក្នុងខេត្តឲ្យមានដំណើរការល្អ និងកាន់តែមានប្រសិទ្ធភាព ធ្វើយ៉ាងណាឲ្យជនរងគ្រោះដោយសារសារធាតុញៀន ទទួលបានសេវាបន្សាបគ្រឿងញៀន និងស្ដារនីតិសម្បទាឡើងវិញ ។
៩.អាណាព្យាបាល មាតាបិតាសិស្សទាំងអស់ សូមបង្កើនការពិនិត្យ និងតាមដានចំពោះការសិក្សារបស់កូនៗឲ្យបានទៀងទាត់ និងសហការឲ្យបានជិតស្និទ្ធជាមួយលោកគ្រូ អ្នកគ្រូទទួលបន្ទុកថ្នាក់រៀននីមួយៗ ដើម្បីជាយន្តការមួយដាស់តឿន ក្រើនរំលឹកដល់កូនៗរបស់ខ្លួន ឲ្យពួកគេគេចផុតពីការប្រឈមមុខខ្លាំងដោយបញ្ហាគ្រឿងញៀន ។
លោកអភិបាលខេត្ត និងជាប្រធានគណៈកម្មាធិការត្រួតពិនិត្យគ្រឿងញៀនខេត្ត រួមទាំងគណៈអធិបបានធ្វើការពិនិត្យ និងដុតបំផ្លាញវត្ថុតាងគ្រឿងញៀននៅទីតាំង ដែលរៀបចំជិតពិធីខាងលើយ៉ាងអធឹកអធម័ ៕
ចែករំលែកព័តមាននេះ