ADផ្ទាំងផ្សព្វផ្សាយពាណិជ្ជកម្ម

Picture

សម្តេច​ធិ​បតី ហ៊ុន ម៉ា​ណែ​ត បើក​ការដ្ឋាន​សាងសង់​ស្ពាន​អាកាស​ភ្លោះ នៅ​ចំណុចប្រសព្វ​មហាវិថី​សម្តេច​តេ​ជោ ហ៊ុន សែន និង​ផ្លូវជាតិ​លេខ​២

3 អាទិត្យ មុន

រាជធានី​ភ្នំពេញ ៖ នៅ​ព្រឹក​ថ្ងៃ​ចន្ទ ទី១៧ ខែមិថុនា ឆ្នាំ​២០២៤​នេះ សម្តេច​មហា​បវរ​ធិ​បតី ហ៊ុន ម៉ា​ណែ​ត នាយក​រដ្ឋមន្ត្រី​កម្ពុជា…

រាជធានី​ភ្នំពេញ ៖ នៅ​ព្រឹក​ថ្ងៃ​ចន្ទ ទី១៧ ខែមិថុនា ឆ្នាំ​២០២៤​នេះ សម្តេច​មហា​បវរ​ធិ​បតី ហ៊ុន ម៉ា​ណែ​ត នាយក​រដ្ឋមន្ត្រី​កម្ពុជា អញ្ជើញ​ជា​អធិបតីភាព​ដ៏​ខ្ពង់ខ្ពស់​បើក​ការដ្ឋាន​សាងសង់​ស្ពាន​អាកាស​ភ្លោះ ស្ថិត​នៅ​ចំណុច ប្រសព្វ​មហាវិថី​សម្តេច​តេ​ជោ ហ៊ុន សែន និង​ផ្លូវជាតិ​លេខ​២ ព្រំប្រទល់​រវាង រាជធានី ភ្នំពេញ និង​ខេត្តកណ្តាល ​។

ស្ពាន​អាកាស​ភ្លោះ​ ដែល​បើក​ការដ្ឋាន​សាងសង់​នេះ សាងសង់​ឡើង​ដើម្បី​ឆ្លើយ​តប​ទៅ​នឹង ស្ថានភាព​ចរាចរណ៍ ដែល​នឹង​មាន​សភាព​កាន់តែ​មមាញឹក​នៅ​ពេល​ព្រ​លាន​យន្តហោះ​អន្តរ ជាតិ​តេ​ជោ ស្ថិត​ក្នុង​ខេត្តកណ្តាល ត្រូវ​ដាក់​ឱ្យ​ដំណើរការ​នៅ​ឆ្នាំ​២០២៥​។ ព្រោះថា ​មហាវិថី សម្តេច តេ​ជោ ហ៊ុន សែន ត្រូវ​បាន​សង់​ត​ភ្ជាប់​ទៅ​ដល់​ព្រ​លាន​យន្តហោះ​ថ្មី​នេះ​។ ច្បាស់ ណាស់​នៅ​ពេល​ព្រ​លាន​យន្តហោះ​ដាក់​ឱ្យ​ដំណើរការ​ចរាចរណ៍​កាន់តែ​មមាញឹក ហើយ​នៅ ចំណុច ឆ្លងកាត់​ផ្លូវជាតិ​លេខ​២ អាច​ប្រឈម​ការ​កកស្ទះ​ប្រសិនបើ​មិន​មាន​ស្ពាន​អាកាសភ្លោះ សម្រាប់​ឆ្លងកាត់​លើ​ផ្លូវជាតិ​លេខ​២​ទេ​នោះ​។ ប្រមើល​មើលឃើញ​ពី​បញ្ហា​ប្រឈម​នេះ​ហើយ ទើប​សម្តេច​ធិ​បតី ហ៊ុន ម៉ា​ណែ​ត សម្រេច​ឱ្យ​សាងសង់​ស្ពាន​អាកាស​ភ្លោះ​នេះ​ឡើយ​ ។

ស្ពាន​អាកាស​ភ្លោះ​នេះ សាងសង់​ដោយ​ក្រុមហ៊ុន​វិនិយោគទុន​អាណិកជន​កម្ពុជា (OCIC) ​ដោយ​គ្រោង​ប្រើ​រយៈពេល​សាងសង់​ចំនួន១២​ខែ និង​ត្រូវ​ចំណាយ​ថវិកា​ចំនួន១៦,២០០,៥០០​ដុល្លារ ជា​កញ្ចប់​ថវិកា​បាន​មក​ពី​ការ​បង្វែរ​កញ្ចប់​ថវិកា​ពី​គម្រោង សាងសង់ ស្ពាន​អាកាស គង់ សំ​អុល និង​មូលនិធិ​អភិវឌ្ឍ​កោះន​រា ​។ ស្ពាន​នេះ នឹង​ក្លាយជា​ស្ពាន​អាកាស​ទី​៨ ក្រោម​កិច្ច​សហប្រតិបត្តិការ​រវាង​រដ្ឋបាល​រាជធានី​ភ្នំពេញ និង​វិស័យ​ឯកជន ស្រប​តាម​អនុសាសន៍ និង​ចំណាត់ការ​ដ៏​ម៉ឹង​ម៉ាត់​ក្ន​ង​ការ​ស្ថាបនា ហេដ្ឋារចនាសម្ព័ន្ធ ដែល​ដាក់​ចេញ​ដោយ​សម្ដេច​តេ​ជោ ហ៊ុន សែន គឺ «​ការ​យក​ទីក្រុង​ចិញ្ចឹម​ទីក្រុង ឬ យក​ស្លឹក​ត្នោត​ខ្ចប់​ស្ករត្នោត​» ​។

គម្រោង​សាងសង់​ស្ពាន​អាកាស​នេះ នឹង​ត្រូវ​សាងសង់​ស្ពាន​អាកាស​ភ្លោះ​ជា​ផ្លូវ​ឯកទិស ដោយ​ស្ពាន​ទី​១ មាន​ទិស​ដៅ​តាម​បណ្ដោយ​មហាវិថី​សម្ដេច​តេ​ជោ ហ៊ុន សែន ឆ្លងកាត់ ផ្លូវ ជាតិ​លេខ​២ ឆ្ពោះទៅ​កាន់​អាកាសយានដ្ឋាន​អន្តរជាតិ​តេ​ជោ និង​ស្ពាន​ទី​២ មាន​ទិស​ដៅ​ពី អាកាសយានដ្ឋាន​អន្តរជាតិ​តេ​ជោ ឆ្លងកាត់​ផ្លូវជាតិ​លេខ​២ ឆ្ពោះ​តាម​បណ្ដោយ​មហាវិថី សម្តេច​តេ​ជោ ហ៊ុន សែន វិញ ​។

ក្នុង​នោះ ស្ពាន​នីមួយ​ៗ មាន​ទទឹង​តួ​ស្ពាន​ទំហំ ៩,៥​ម៉ែត្រ បណ្តោយ​តួ​ស្ពាន​ប្រវែង ២៨១​ម៉ែត្រ និង​ស្ថាបនា​ផ្លូវ​ត​ភ្ជាប់​ក្បាលស្ពាន​ផ្នែក​ខាងជើង​ប្រវែង ១៨០​ម៉ែត្រ និង​ផ្នែក​ខាងត្បូង​ប្រវែង ១៦១​ម៉ែត្រ សរុប​បណ្ដោយ​ស្ពាន​មាន​ប្រវែង ៦២២​ម៉ែត្រ ហើយ​គន្លង​ផ្លូវរ​ត់របស់​តួ​ស្ពាន​នីមួយ​ៗ មាន​ចំនួន ៣​គន្លង (​ទំហំ ៣,២៥ ម៉ែត្រ + ៣,២៥ ម៉ែត្រ + ២ ម៉ែត្រ​) សម្រាប់​ចរាចរ​ឯកទិស​ ។

ក្រៅពី​សំណង់​តូ​ស្ពាន និង​ផ្លូវ​ត​ភ្ជាប់​ក្បាលស្ពាន​ហើយ​នោះ គម្រោង​ស្ពាន​អាកាស ភ្លោះ នេះ ក៏​នៅ​មានការ​សាងសង់​ហេដ្ឋារចនាសម្ព័ន្ធ​មួយ​ចំនួន ដែល​ត្រូវ​បំពាក់​ភ្ជាប់​ក្នុង គម្រោង រួម​មានការ​បំពាក់​បង្គោល​ភ្លើង​បំភ្លឺ​ផ្លូវ​, ការ​ដាក់​ស្លាក សញ្ញា ចរាចរ​, ការ​លាប​គំនូសចរាចរ​,​ការ​រៀបចំ​បណ្តាញ​លូ​អម​សងខាង​ផ្លូវ​, ការ​កែសម្រួល​ចិញ្ចើម​ផ្លូវ​ក្នុង​តំបន់​ការដ្ឋាន ការ​ដាំ ដើម ឈើ -​ដើម​ផ្កា​លម្អ និង ការ​រៀបចំ​រចនា​ជា​សួនច្បារ​បៃតង មាន​គម្លាត ៩​ម៉ែត្រ រវាង ប្រឡោះ ស្ពាន​ទី​១ និង​ស្ពាន​ទី​២​បន្ថែម​ទៀត ​។

រៅ​ពី​ស្ពាន​អាកាស​ដែល​ដាក់​ឱ្យ​ប្រើប្រាស់​ដូច​រៀបរាប់​ខាងលើ​ហើយ​នោះ ក៏​នៅ​មាន​ស្ពាន​អាកាស​មួយ​កំពុង​តែ​សាងសង់​ផង​ដែរ​។ ស្ពាន​អាកាស​ដែល​កំពុង​សាងសង់​នេះ គឺ​ស្ពាន​អាកាស «​មរតក​តេ​ជោ​»​។ ស្ពាន​អាកាស «​មរតក​តេ​ជោ​» គឺជា​ស្ពាន​ស្ថិត​នៅ​ចំណុចប្រសព្វ​រវាង​មហាវិថី​សម្តេច​តេ​ជោ ហ៊ុន សែន ជាមួយ​មហាវិថី​ព្រះ​មុនី​វង្ស និង​វិ​ថី​កង​យោធពលខេមរភូមិន្ទ ហៅ​ផ្លូវ​២៧១ ​។

កាលពី​ថ្ងៃ​ទី​១ ខែមេសា ឆ្នាំ​២០២៤ រដ្ឋបាល​រាជធានី​ភ្នំពេញ បាន​បើក​ឱ្យ​ដំណើរ ការ​ជា​បណ្តោះអាសន្ន​នូវ​ស្ពាន​អាកាស​នេះ នៅ​ជាន់​ទី​២ ដំណាក់កាល​ទី​១ ត​ភ្ជាប់​ចរាចរ​រវាង​មហាវិថី​សម្តេច​តេ​ជោ ហ៊ុន សែន និង មហាវិថី​ព្រះ​មុនី​វង្ស ស្ថិត​ក្នុង​មូលដ្ឋាន​ខណ្ឌមានជ័យ និង​ខណ្ឌចំការមន ក្នុង​រាជធានី​ភ្នំពេញ​។

សូម​បញ្ជាក់​ថា ដើម្បី​ដោះស្រាយ​បញ្ហា​កកស្ទះ​ចរាចរណ៍​ដែល​មានកំណើត​ឥត​ឈប់​ឈរ​ពី​មួយ​ឆ្នាំទៅ​មួយ​ឆ្នាំ​នោះ រាជរដ្ឋាភិបាល​កម្ពុជា បាន​សាងសង់​ស្ពាន​អាកាស​នៅ​ចំណុច​ផ្លូវ​ប្រសព្វ​ជា​ច្រើន​ខ្សែ​រួច​មក​ហើយ​នៅ​ក្នុង​រាជធានី​ភ្នំពេញ​។

បច្ចុប្បន្ន​ក្នុង​រាជធានី​ភ្នំពេញ មាន​ស្ពាន​អាកាស​ចំនួន​៧ ដែល​បាន​សាងសង់​រួចរាល់ និង កំពុង​ប្រើប្រាស់​រួម​មាន​៖ ស្ពាន​អាកាស​ក្បាលថ្នល់ (២៤ មិថុនា ២០១០), ស្ពាន អាកាស ៧​មក​រា (៦ មក​រា ២០១២), ស្ពាន​អាកាស​ស្ទឹង​មាន​ជ័យ (៣១ កក្កដា ២០១៤), ស្ពាន អាកាស ៥​មក​រា (៥ មក​រា ២០១៦), ស្ពាន​អាកាស​មិត្តភាព​កម្ពុជា​-​ចិន សែន​សុខ ឬ​ហៅ​ថា «​ស្ពាន​អាកាស​ផ្សារ​ដី​ហ៊ុយ​» (២ កក្កដា ២០១៨) និង​ស្ពាន អាកាស រង្វង់​មូល​ចោម​ចៅ (៣១ មីនា ២០២២) និង​ស្ពាន​អាកាស​ឫស្សី​កែវ ស្ថិត​លើ​ផ្លូវជាតិ​លេខ​៥ (៣១ ខែឧសភា ឆ្នាំ​២០២៣) ។

កាលពីម្សិលមិញថ្ងៃ​ទី​១៦ ខែមិថុនា ឆ្នាំ​២០២៤ លោក ឃួ​ង ស្រេង អភិបាល នៃ​គណៈ​អភិបាល​រាជធានី​ភ្នំពេញ និង​លោក​ជំទាវ បាន​អញ្ជើញ​ជា​អធិបតី​ក្នុង​ពិធី​ក្រុង​ពាលី​តាម​បែប​សាសនា ដើម្បី​សុំ​ម្ចាស់​ទឹក​ម្ចាស់​ដី សុំ​សេចក្តីសុខ​ចម្រុងចម្រើន មុន​នឹង​បើក​ការ​ដា្ឋ​ន សាងសង់​ស្ពាន​អាកាស​ភ្លោះ​តាម​បណ្ដោយ​មហាវិថី សម្ដេច​តេ​ជោ ហ៊ុន សែន ប្រសព្វ និង​ផ្លូវជាតិ​លេខ​២ ។

ជា​ប្រពៃណី​ទំនៀមទម្លាប់​ខ្មែរ មុន​នឹង​ចាប់ផ្តើម​សាងសង់​សំណង់​ផ្សេង​ៗ ដើម្បី​ឱ្យ​ការ​សាងសង់​នោះ​ប្រព្រឹត្ត​ទៅ​ដោយ​រលូន និង​មាន​សេចក្តីសុខ​សេចក្តីចម្រើន តែង​ប្រារ​ព្វ​នូវ​ពិធី​នេះ​ឡើង​មិន​ខកខាន​ឡើយ ៕

អត្ថបទសរសេរ ដោយ

អត្ថបទសរសេរ ដោយ