ADផ្ទាំងផ្សព្វផ្សាយពាណិជ្ជកម្ម

Picture

វៀតណាម​ត្រៀម​ទទួល​ដំណើរ​ទស្ស​ន​កិច្ច​របស់​លោក​ពូទីន​ ​ធ្វើ​ឱ្យ​​អា​មេ​រិក​មិន​សប្បាយ​ចិត្ត

1 ខែ មុន

ទី​ក្រុង​ហាណូយ៖ តើ​ប្រទេស​វៀតណាម​​ចង់​​ងាក​ទៅ​រក​​សម្ព័ន្ធ​មិត្ត​ចាស់​របស់​ខ្លួន​ឡើង​វិញ​ ហើយ​​រលាស់​ដៃ​ចេញ​ពី​ប្រទេស​អាមេរិក​​ ឬ​យ៉ាង​ណា​? នៅ​សប្ដាហ៍​នេះ ចាប់​ពី​ថ្ងៃ​ទី​១៩​-២០​ ខែ​មិថុនា វៀតណាម​ត្រៀម​ស្វាគមន៍​ដៃ​ពីរ​​ដើម្បី​ទទួល​​វត្ត​មាន​របស់​លោក​ពូទីន​ដែល​នឹង​អញ្ជើញ​ទៅ​បំពេញ​ទស្សន​កិច្ច​ជា​ផ្លូវ​ការ​នៅ​ទី​ក្រុង​ហាណូយ​តប​តាម​ការ​អញ្ជើញ​ពី​ថ្នាក់ដឹក​នាំ​វៀត​ណាម​។ ​ទី​ក្រុង​ហាណូយ​​ចាប់​ផ្ដើម​​​រៀប​ចំ​សណ្ដាប់​ធ្នាប់​ និង​ពង្រឹង​សន្តិ​សុខ​ជា​បណ្ដើរ​ៗ​ហើយ​នៅ​តាម​ទី​តាំង​សំខាន់​ៗ​។…

ទី​ក្រុង​ហាណូយ៖ តើ​ប្រទេស​វៀតណាម​​ចង់​​ងាក​ទៅ​រក​​សម្ព័ន្ធ​មិត្ត​ចាស់​របស់​ខ្លួន​ឡើង​វិញ​ ហើយ​​រលាស់​ដៃ​ចេញ​ពី​ប្រទេស​អាមេរិក​​ ឬ​យ៉ាង​ណា​? នៅ​សប្ដាហ៍​នេះ ចាប់​ពី​ថ្ងៃ​ទី​១៩​-២០​ ខែ​មិថុនា វៀតណាម​ត្រៀម​ស្វាគមន៍​ដៃ​ពីរ​​ដើម្បី​ទទួល​​វត្ត​មាន​របស់​លោក​ពូទីន​ដែល​នឹង​អញ្ជើញ​ទៅ​បំពេញ​ទស្សន​កិច្ច​ជា​ផ្លូវ​ការ​នៅ​ទី​ក្រុង​ហាណូយ​តប​តាម​ការ​អញ្ជើញ​ពី​ថ្នាក់ដឹក​នាំ​វៀត​ណាម​។ ​ទី​ក្រុង​ហាណូយ​​ចាប់​ផ្ដើម​​​រៀប​ចំ​សណ្ដាប់​ធ្នាប់​ និង​ពង្រឹង​សន្តិ​សុខ​ជា​បណ្ដើរ​ៗ​ហើយ​នៅ​តាម​ទី​តាំង​សំខាន់​ៗ​។

លោក​ពូទីន​មិន​សូវ​​​ធ្វើ​ដំណើរ​​ចេញ​ទៅ​ក្រៅ​ប្រទេស​ទេ​​​ចាប់​តាំង​ពី​តុលាការ​ព្រហ្ម​ទណ្ឌ​អន្តរ​ជាតិ​ចេញ​និវេទន៍​ក្រហម​តាម​ចាប់​ខ្លួន​លោក​ពូទីន​កាល​ពី​ខែ​មីនា ឆ្នាំ​២០២៣​​។ លុះ​ត្រា​តែ​ប្រទេស​​ដែល​គួរ​ឱ្យ​ជឿ​ទុក​ចិត្ត​​​ទើប​លោក​ហ៊ាន​ទៅ​។ ​កាល​ពី​ពេល​កិច្ច​ប្រជុំ​ប្រ៊ីក​ (BRICS) នៅ​អាហ្វ្រិក​ខាង​ត្បូង​ក៏​លោក​អវត្ត​មាន ក្រោយ​មក​ទៀត​ កិច្ច​ប្រជុំ​ជីម្ភៃ​នៅ​ញូដេលី ក៏​លោក​អវត្ត​មាន​ទៀត​​។​​

គេ​សង្កេត​ឃើញ​ចំណុច​២​ដែល​មាន​ទំនាក់​ទំនង​គ្នា​នឹង​ដំណើរ​ទស្សន​កិច្ច​នេះ​។ ទី​១​-​នៅ​ឯ​កិច្ច​ប្រជុំ​ប្រ៊ីក​នៅ​ប្រទេស​​រុស្ស៊ី​កាល​ពី​សប្ដាហ៍​មុន​ វៀតណាម​បញ្ជូន​គណៈ​ប្រតិ​ភូ​ទៅ​ចូល​រួម​។ ទី២-​សម្រាប់​កិច្ច​ប្រជុំ​កំពូល​ស្ដី​ពី​បញ្ហា​អ៊ុយ​ក្រែន​ដែល​រៀប​ចំ​នៅ​ប្រទេស​ស្វីស​ វៀតណាម​មិន​បញ្ជូន​គណៈ​ប្រតិ​ភូ​ទៅ​ចូល​រួម​ទេ​។​ ​ការ​ដែល​វៀតណាម​អញ្ជើញ​លោក​ពូទីន​ទៅ​ទី​ក្រុង​ហាណូយ​ដូច្នេះ​ធ្វើ​ឱ្យ​ប្រទេស​អាមេរិក​​មាន​កំហឹង​យ៉ាង​ខ្លាំង​។

​ប្រទេស​​​​អាមេរិក​ដែលជា​សម្ព័ន្ធ​មិត្ត​មិន​ច្បាស់​លាស់​របស់​វៀតណាម​ដោយ​សារ​ធ្លាប់​ហែល​ឆ្លង​សង្គ្រាម​​ដ៏​ជូរ​ចត់​ជា​មួយ​គ្នា​ ក្រោយ​មក​ចាប់​ដៃ​គ្នា​វិញ​ អាមេរិក​មិន​សប្បាយ​ចិត្ត​ទាល់​តែ​សោះ​នៅ​ពេល​​​វៀត​ណាម​​​អញ្ជើញ​លោក​ពូទីន​បែប​នេះ​​។ ​

​អ្នក​នាំ​ពាក្យ​​ស្ថាន​​ទូត​អាមេរិក​ប្រចាំ​ទី​ក្រុង​ហាណូយ​និយាយ​បែប​ដៀម​ដាម​ឱ្យ​​វៀត​ណាម​ថា​​ប្រទេស​នានា​ទូទាំង​ពិភព​លោក​​មិន​គួរ​លើក​មុខ​លើក​មាត់​លោក​ពូទីន​ដែល​ជា​អ្នក​បង្ក​សង្គ្រាម​ឈ្លាន​ពាន​នោះ​ទេ​ ហើយ​ក៏​មិន​គួរ​លើក​មុខ​លើក​មាត់​ឱ្យ​គាត់​ប្រព្រឹត្ត​អំពើ​ឃោរ​ឃៅ​ដោយ​សេរី​នោះ​ដែរ​។ បើ​គាត់​ (លោក​ពូទីន) អាច​ធ្វើ​ដំណើរ​ដោយ​សេរី​បាន​ មាន​ន័យ​ថា​រុស្ស៊ី​អាច​រំលោភ​ច្បាប់​អន្តរ​ជាតិ​ដោយ​សេរី​។​ ក្រសួង​ការ​បរទេស​វៀតណាម​មិន​ទាន់​បញ្ចេញ​ប្រតិ​កម្ម​តប​នឹង​សារ​នយោបាយ​នេះ​ទេ​។

ថ្វី​ដ្បិត​អាយ​ស៊ីស៊ី​ចេញ​ដីកា​ចាប់​ខ្លួន​លោក​ពូទីន និង​ស្នើ​សុំ​ឱ្យ​ប្រទេស​ដទៃ​ជួយ​សហ​ការ​ចាប់​លោក​ពូទីន​ ប៉ុន្តែ​មិន​អាច​ទៅ​រួច​ទេ​ព្រោះ​ប្រទេស​ខ្លះ​ដូច​ជា​អាមេរិក រុស្ស៊ី និង​វៀតណាម​មិន​មែន​ជា​សមាជិក​អាយ​ស៊ីស៊ី​។ សហ​ភាព​អឺរ៉ុប​មិន​ទាន់​ធ្វើ​អត្ថា​ធិប្បាយ​ទៅ​លើ​គម្រោង​ទស្សន​កិច្ច​របស់​លោក​ពូទីន​ទេ​។ ប៉ុន្តែ​អឺរ៉ុប​ខក​ចិត្ត​កាល​ពី​ខែ​ឧសភា​នៅ​ពេល​ទី​ក្រុង​ហាណូយ​ពន្យារ​ពេល​ជួប​គណៈ​ប្រតិ​ភូ​អឺរ៉ុប​ដែល​ចង់​ពិភាក្សា​ជា​មួយ​វៀតណាម​អំពី​ផែន​ការ​ដាក់​ទណ្ឌកម្ម​ប្រទេស​រុស្ស៊ី​។ អឺរ៉ុប​យល់​ថា​វៀតណាម​ពន្យារ​ពេល​ព្រោះ​ចង់​ទទួល​ដំណើរ​ទស្សន​កិច្ច​របស់​លោក​ពូទីន​ជា​មុន​សិន​។​

ជា​គោល​ជំហរ​របស់​វៀតណាម​ វៀតណាម​ចង់​បង្ហាញ​​សហ​គមន៍​អន្តរ​ជាតិ​ថា​ខ្លួន​មិន​ត្រូវ​ការ​ធ្វើ​នយោបាយ​តាម​ខ្សែ​ញាក់​របស់​ប្រទេស​ណា​ ឬ​ខ្លាច​ប្រទេស​ណា​អាក់​អន់​ស្រពន់​ចិត្ត​ទេ​។ វៀតណាម​ចង់​បង្ហាញ​ថា​​នយោបាយ​ការ​បរទេស​របស់​ខ្លួន​គឺ​ឯក​រាជ្យ អព្យាក្រឹត្យ​-ឥត​លម្អៀង​ មិន​ត្រូវ​ការ​ឱ្យ​ប្រទេស​មហា​អំណាច​ត្រួត​ត្រា​​បង្គាប់​បញ្ជា ឬ​យក​ធ្វើ​ជា​កូន​អុក​របស់​ខ្លួន​ឡើយ​។ ខាង​លើ​នេះ​ជា​ការ​លើក​ឡើង​របស់​លោក​អៀនស្ទ័ររេ (Ian Storey) ជា​អ្នក​សិក្សា​ជាន់​ខ្ពស់​នៅ​សិង្ហ​បុរីដែល​ពិនិត្យ​មើល​ឥរិយាបថ​នយោបាយ​របស់​វៀតណាម​នៅ​ពេល​ទទួល​លោក​បៃដិន និង​លោ​កស៊ី​ជីន​ពីង​កាល​ពី​ប៉ុន្មាន​ខែ​មុន​នេះ៕​

អត្ថបទសរសេរ ដោយ

កែសម្រួលដោយ