ADផ្ទាំងផ្សព្វផ្សាយពាណិជ្ជកម្ម

ឃ្លាំងស្តុកបារីដ៏ធំរបស់ក្រុមហ៊ុនចិនត្រូវបានភ្លើងឆេះអស់ទាំងស្រុង

6 ថ្ងៃ មុន

ភ្នំពេញ
១៥ ខែ មិថុនា ឆ្នាំ ២០២៤ ម៉ោង ០៩:០៧

រាជធានីភ្នំពេញ៖ ឃ្លាំងស្តុកបារីដ៏ធំមួយកន្លែងដែលជារបស់ក្រុមហ៊ុនចិនត្រូវបានភ្លើងឆាបឆេះអស់ទាំងស្រុង ដោយពុំទាន់ដឹងពីមូលហេតុនៃការឆេះនោះពិតប្រាកដនៅឡើយទេ ហើយក្រោយពីទទួលបានដំណឹងនេះភ្លាម អាជ្ញាធរនិងសមត្ថកិច្ច បានចេញអន្តរាគមន៍និងបានហៅរថយន្តពន្លត់អគ្គិភ័យជាច្រើនគ្រឿងទៅបាញ់ពន្លត់ ។ ហេតុការណ៍នេះបានកើតឡើងកាលពីវេលាម៉ោង២និង៥៥នាទីទៀបភ្លឺថ្ងៃទី១៥ ខែមិថុនា ឆ្នាំ២០២៤…

ហេតុការណ៍នេះបានកើតឡើងកាលពីវេលាម៉ោង២និង៥៥នាទីទៀបភ្លឺថ្ងៃទី១៥ ខែមិថុនា ឆ្នាំ២០២៤ ដែលទីតាំងខាងលើស្ថិតនៅតាមផ្លូវបេតុងចូលវត្តព្រះធាតុ ក្បែររង្វង់មូលគួរស្រូវ ក្នុងភូមិកណ្ដាល សង្កាត់រលួស ខណ្ឌដង្កោ រាជធានីភ្នំពេញ ។

ប្រជាពលរដ្ឋនៅជិតកន្លែងកើតហេតុបានឲ្យដឹងថា ឃ្លាំងខាងលើនោះមានស្តុកបារីរាប់រយកេសរួមនិងសម្ភារផ្សេងៗទៀតជាច្រើនផងដែរ ដែលឃ្លាំងស្តុកនេះស្ថិតនៅក្នុងសិប្បកម្មផលិតបារីតែម្ដង ប៉ុន្តែអត់ស្គាល់ថាបារីម៉ាកអ្វីនោះទេ ព្រោះសុទ្ធតែអក្សរចិន ។ ក្រោយផលិតរួចក្រុមហ៊ុននេះដឹកទៅកាន់កំពង់ផែខេត្តព្រះសីហនុដើម្បីនាំចេញទៅក្រៅប្រទេស ហើយនៅវេលាយប់នោះពួកគាត់មិនបានដឹងច្បាស់ថា មានកម្មករកំពុងធ្វើការនៅក្នុងសិប្បកម្មនោអឬអត់នោះទេ ប៉ុន្តែខណៈពេលមានហេតុការណ៍ភ្លើងឆេះបានឃើញមានមនុស្សជញ្ជូនអីវាន់រត់ចេញដែរ ។

ប្រភពដដែលបានប្រាប់ឲ្យដឹងបន្តទៀតថា ដោយសារតែនៅក្នុងឃ្លាំងនោះបារីនិងវត្ថុផ្សេងៗដែលងាយនិងឆាបឆេះនោះ ភ្លើងបានឆេះលឿនណាស់ តែមួយសន្ទុះប៉ុណ្ណោះអគារឃ្លាំងទាំងមូលបានគ្របដណ្ដប់ដោយអណ្ដាតភ្លើង ។ ចំណែកអាជ្ញាធរនិងសមត្ថកិច្ចបានចេញទៅអន្តរាគមន៍ភ្លាមៗទាំងយប់ ហើយក្រោយមកបានឃើញមានរថយន្តពន្លត់អគ្គិភ័យជាច្រើនគ្រឿងបានចេញទៅបាញ់ពន្លត់ជាបន្តបន្ទាប់ ។

សមត្ថកិច្ចបានប្រាប់ថា ក្រោយពីទទួលបានដំណឹងនេះភ្លាមរថយន្តពន្លត់អគ្គិភ័យជាច្រេីនគ្រឿង របស់ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលដ្ឋានរាជធានីភ្នំពេញ ដឹកនាំផ្ទាល់ដោយលោកវរសេនីយ៍ឯក ព្រហ្ម យ៉ន នាយការិយាល័យ បានចេញទៅអន្តរាគមន៍បាញ់ពន្លត់ភ្លើង។ ពេលនោះក៏មានជំនួយពីរថយន្តពន្លត់អគ្គិភ័យក្រុមហ៊ុនខ្មែរប៊ីវេីរីជីស(ស្រាបៀរកម្ពុជា), រថយន្តពន្លត់អគ្គិភ័យបុរីប៉េងហួត, រថយន្តពន្លត់អគ្គិភ័យទីក្រុងកោះនរាហ៍, និងរថយន្តពន្លត់អគ្គិភ័យរបស់អង្គភាព៧១១ RRC711 នៃកងពលតូចលេខ៧០ ផងដែរ ប៉ុន្តែរហូតដល់ព្រឹកថ្ងៃដដែលភ្លើងនៅពុំទាន់រលត់នៅឡើយ ហើយក្រុមពន្លត់អគ្គិភ័យកំពុងប្រតិបត្តិការពន្លត់បន្ត៕