(ថៃ)៖ សហព័ន្ធឧស្សាហកម្មថៃ (FTI) បាននិយាយកាលពីថ្ងៃអង្គារថា ការប្រកាសផែនការរបស់ក្រុមហ៊ុនផលិតរថយន្តជប៉ុនចំនួនពីរក្នុងការបិទរោងចក្រផលិតនៅក្នុងប្រទេសថៃនាពេលថ្មីៗនេះអាចប៉ះពាល់ដល់ទំនុកចិត្តរបស់អ្នកវិនិយោគនៅក្នុងឧស្សាហកម្មរថយន្ត។

យោងតាមការចុះផ្សាយរបស់សារព័ត៌មាន The Nation Thailand បាន​ឱ្យដឹងថា ក្រុមហ៊ុន Suzuki Motor (Thailand) បានប្រកាសកាលពីខែមុនថា ខ្លួននឹងបិទរោងចក្រទាំងអស់នៅក្នុងប្រទេសថៃនៅចុងឆ្នាំ២០២៥ បន្ទាប់ពីធ្លាក់ចុះនៃការលក់ និងការប្រកួតប្រជែងពីរថយន្តអគ្គិសនីរបស់ចិន (EVs)។

ទន្ទឹមនឹងនេះ ក្រុមហ៊ុន Tan Chong Subaru Automotive (Thailand) ក៏បានប្រកាសថា ខ្លួននឹងបញ្ឈប់ការផលិតយានយន្តនៅក្នុងប្រទេសថៃនៅចុងឆ្នាំនេះ បន្ទាប់ពីមានការខាតបង់រយៈពេលប្រាំឆ្នាំជាប់ៗគ្នា។

Suzuki បានជួបការលំបាកជាមួយនឹងការលក់នៅក្នុងប្រទេសថៃក្នុងរយៈពេលប៉ុន្មានឆ្នាំចុងក្រោយនេះ ដែលជំរុញឱ្យយីហោនេះកាត់បន្ថយតម្លៃជិត១០០.០០០ក្នុងមួយគ្រឿង ដើម្បីប្រកួតប្រជែងជាមួយនឹងការហូរចូលនៃរថយន្ត EV តម្លៃថោកពីប្រទេសចិន។ ទោះបីជាមានការបញ្ចុះតម្លៃយ៉ាងច្រើនក៏ដោយ ក៏ការផលិតរថយន្តរបស់ក្រុមហ៊ុន Suzuki នៅតែធ្លាក់ចុះ។

កន្លងមក Subaru បាននាំចូលគ្រឿងបន្លាស់ពីប្រទេសជប៉ុន និងម៉ាឡេស៊ី ដើម្បីប្រមូលផ្តុំ និងលាបថ្នាំនៅក្នុងប្រទេសថៃ ហើយថែមទាំងបានផ្លាស់ប្តូរគ្រឿងបរិក្ខារមួយចំនួនរបស់ខ្លួនពីប្រទេសម៉ាឡេស៊ីមកថៃផងដែរ។ ទោះជាយ៉ាងណាក៏ដោយ យីហោបានកត់ត្រាការថយចុះទិន្នផលក្នុងប៉ុន្មានឆ្នាំថ្មីៗនេះ។

សហព័ន្ធឧស្សាហកម្មថៃ (FTI) មានប្រសាសន៍ថា «ការបិទរោងចក្រក្រោមម៉ាកយីហោពីរ ប្រហែលជាមិនប៉ះពាល់ខ្លាំងដល់សហគ្រិនថៃក្នុងឧស្សាហកម្មគ្រឿងបន្លាស់រថយន្ត ដោយសារការផលិតរបស់ពួកគេទាបក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែវានឹងប៉ះពាល់ដល់ទំនុកចិត្តរបស់អ្នកវិនិយោគនាពេលអនាគតនៅក្នុងទីផ្សាររថយន្ត»។

ទោះបីជាមានការប្រកួតប្រជែងខ្លាំងពីរថយន្ត EV របស់ចិននៅក្នុងទីផ្សារប្រទេសថៃក៏ដោយ FTI មានទំនុកចិត្តថាក្រុមហ៊ុនផលិតរថយន្តជប៉ុនផ្សេងទៀតនឹងបន្តការផលិតរបស់ពួកគេនៅក្នុងប្រទេសថៃ ខណៈដែលពួកគេនាំចេញទៅកាន់ទីផ្សារក្រៅប្រទេសផងដែរ។ ទន្ទឹមនឹងនេះ ប្រទេសថៃមានអត្ថប្រយោជន៍នៃខ្សែសង្វាក់ផ្គត់ផ្គង់ដ៏រឹងមាំនៃគ្រឿងបន្លាស់រថយន្ត ព្រមទាំងកម្លាំងពលកម្មជំនាញផងដែរ៕