រាជធានីភ្នំពេញ ៖ ជាងសំណង់៤នាក់ ខណៈអង្គុយផឹកស៊ី ស្រាប់តែមានយុវជន ដែលជាអ្នកលេងម្នាក់ នៅក្បែរនោះដែរ សម្លឹងមើលមុខ មិនដាក់ភ្នែកសោះ ហើយក្រុមជាងសំណង់ ក៏មើលទៅវិញ ប៉ុន្តែមានម្នាក់ ក្នុងចំណោម៤នាក់ បាននិយាយប្រាប់មិត្តភក្ដិថា «កុំមើលមុខគេ នៅភ្នំពេញ ប្រយ័ត្នគេវ៉ៃ» គ្រាន់តែឮបែបនេះភ្លាម យុវជនអ្នកលេងម្នាក់នោះ ក៏ក្រោកឡើង ជិះម៉ូតូចេញទៅបាត់ លុះ១ម៉ោងកន្លះក្រោយមក ក៏បានជិះម៉ូតូត្រលប់មកវិញ ដោយនាំបក្ខពួកចំនួន៣នាក់ទៀត មកជាមួយ ប្រដាប់ដោយកាំបិតប៉័ងតោ និងកាំបិតផ្គាក់ផងដែរ ។
បន្ទាប់មក បានស្ទុះទៅកាប់ក្រុមជាងសំណង់ទាំងកំរោល ប៉ុន្តែកាប់មិនបានឡើយ ដោយជនរងគ្រោះបាននាំគ្នារត់បាតជើងសព្រាត រួចផុតពីផ្លែកាំបិតពិឃាត ហើយដោយខឹងកាប់មនុស្សមិនបាន ក្រុមអ្នកលេង៤នាក់នោះ បានកាប់បំផ្លាញម៉ូតូ ១គ្រឿងខ្ទេច រួចគេចខ្លួនបាត់អស់តែម្ដង ប៉ុន្តែក្រោយពេលកើតហេតុ ដោយមានបញ្ជាពីលោកវរសេនីយ៍ឯកជឹម ស៊ីថា អធិការនគរបាលខណ្ឌដង្កោ កម្លាំងនគរបាលប៉ុស្តិ៍ជើងឯក បានធ្វើការស្រាវជ្រាវភ្លាមៗ ហើយ១ថ្ងៃក្រោយមក ទើបឈានដល់ការឃាត់ខ្លួនក្រុមអ្នកលេងទាំង៤នាក់នោះបាន ។
ហេតុការណ៍នោះ បានបង្កឲ្យមានការភ្ញាក់ផ្អើល និងភ័យខ្លាចដល់ប្រជាពលរដ្ឋផងដែរ កាលពីថ្ងៃទី០៦ ខែមិថុនា ឆ្នាំ២០២៤ វេលាម៉ោង២១និង៣០នាទីយប់ នៅត្រង់ចំណុចខាងមុខរោងកម្មករសំណង់ស្នាក់នៅ ស្ថិតនៅក្នុងភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។
ក្រុមអ្នកលេងកាំបិតបុ័ងតោ និងកាំបិតផ្គាក់ ៤នាក់នោះ រួមមាន ៖
១-ឈ្មោះ សុង សាយ័ន អាយុ២១ឆ្នាំ មុខរបរកម្មករអនាម័យ
២-ឈ្មោះ រ៉ា ភារិន អាយុ២៨ឆ្នាំ
៣-ឈ្មោះរ៉ា ចំរើន អាយុ ២០ឆ្នាំ ។ អ្នកទាំង៣នាក់នេះមានទីលំនៅភូមិព្រែកថ្លឹង សង្កាត់ជើងឯក ខណ្ឌដង្កោ ។
៤-ឈ្មោះ ពន្លក ពន្លឺ អាយុ២៨ឆ្នាំ មានទីលំនៅភូមិស្រីស្នំ សង្កាត់ព្រែកកំពឹស ខណ្ឌដង្កោ ។
ចំណែកក្រុមជាងសំណង់រងគ្រោះ រួមមាន ៖
១-ឈ្មោះ ប៉ាត វាន់ណាក់ អាយុ២១ឆ្នាំ ខូចខាតម៉ូតូ១គ្រឿង ម៉ាកហុងដាសេ១២៥ ពណ៌ខ្មៅពាក់ស្លាកលេខកំពង់ធំ1S-1138 ។
២-ឈ្មោះ ផាត ផាន់ណា អាយុ១៩ឆ្នាំ
៣-ឈ្មោះ ជ្រី គឹមហ៊ាង អាយុ១៦ឆ្នាំ
៤-ឈ្មោះ អ៊ាង ផាន់ណា អាយុ១៤ឆ្នាំ ។
ក្រុមជនរងគ្រោះស្នាក់នៅរោងកម្មករ ស្ថិតនៅភូមិព្រែកថ្លឹង សង្កាត់ជើងឯក ខណ្ឌដង្កោ ដែលជាកន្លែងកើតហេតុខាងលើ ។
នគរបាលខណ្ឌដង្កោ បានប្រាប់ឲ្យដឹងថា នៅមុនពេលកើតហេតុ ក្រុមជនរងគ្រោះបាននាំគ្នាអង្គុយផឹកស៊ី នៅខាងមុខរោងកម្មករ ដែលជាកន្លែងពួកខ្លួនស្នាក់នៅ ចំណែកអ្នកលេងម្នាក់ឈ្មោះ រ៉ា ភារិន ហៅ រ័ត្ន ក៏កំពុងអង្គុយនៅក្បែរនោះដែរ និងបានសម្លឹងមើលមុខក្រុមជាងសំណង់មិនដាក់ភ្នែក។ ចំណែកក្រុមជាងសំណង់ ក៏មើលទៅវិញដែរ ហើយភ្លាមៗនោះ យុវជនឈ្មោះ ប៉ាត វាន់ណាក់ បាននិយាយប្រាប់មិត្តភក្ដិរបស់ខ្លួនថា «កុំមើលមុខគេ នៅភ្នំពេញ ប្រយ័ត្នគេវ៉ៃ» ។
នគរបាលបានប្រាប់ឲ្យដឹងបន្តទៀតថា គ្រាន់តែឮបែបនេះភ្លាម អ្នកលេងឈ្មោះ រ៉ា ភារិន ហៅ រ័ត្ន នោះក៏ឡើងជិះម៉ូតូចេញទៅបាត់ លុះ១ម៉ោងកន្លះក្រោយមក គឺនៅវេលាម៉ោង២១និង៣០យប់ថ្ងៃដដែល ជននោះក៏បានជិះម៉ូតូត្រលប់មកវិញ ដោយនាំបក្ខពួកចំនួន៣នាក់ទៀត មកជាមួយហើយ ប្រដាប់ដោយកាំបិតប៉័ងតោ និងកាំបិតផ្គាក់គ្រប់ដៃផងដែរ ។ បន្ទាប់មក បានស្ទុះទៅកាប់ក្រុមជាងសំណង់ប៉ុនប៉ងផ្ដាច់ជីវិត ប៉ុន្តែជនរងគ្រោះបាននាំគ្នារត់គេចខ្លួនផុតពីផ្លែកាំបិតពិឃាតរបស់ក្រុមអ្នកលេង ។ ដោយសារតែខឹងកាប់មនុស្សមិនបានក្រុមអ្នកលេងទាំងនេះបានកាប់បំផ្លាញម៉ូតូជនរងគ្រោះ១គ្រឿង បណ្តាលឲ្យបែកកុងទ័រ, អាវម៉ូតូខាងឆ្វេង និងកាប់យកផ្លាកលេខម៉ូតូរបស់ជនរងគ្រោះទៅបោះចោលក្នុងទឹកស្ទឹងព្រែកត្នោតរួចគេចខ្លួនបាត់ ។
នគរបាល បានប្រាប់បន្ថែមទៀតថា ខណៈនោះមិនត្រឹមតែក្រុមជនរងគ្រោះភិតភ័យរត់បាតជើងសព្រាតប៉ុណ្ណោះទេ ប្រជាពលរដ្ឋ ដែលនៅជិតនោះក៏ភិតភ័យដែរ ខ្លាចក្រុមអ្នកលេងកាប់ច្រលំ ហើយក្រោយពេលកើតហេតុជនរងគ្រោះ ក៏បានរាយការណ៍ និងដាក់ពាក្យបណ្តឹងនៅប៉ុស្តិ៍នគរបាលរដ្ឋបាលជើងឯក ។ ពេលនោះលោកវរសេនីយ៍ឯកជឹម ស៊ីថា អធិការនគរបាលខណ្ឌដង្កោ បានបញ្ជាឲ្យកម្លាំងនគរបាលប៉ុស្តិ៍ជើងឯក ចុះធ្វើការស្រាវជ្រាវភ្លាមៗ ហើយ១ថ្ងៃក្រោយមក គឺនៅរសៀលថ្ងៃទី០៧ ខែមិថុនា ឆ្នាំ២០២៤ កម្លាំងនគរបាលប៉ុស្តិ៍ឈានដល់ការឃាត់ខ្លួនក្រុមអ្នកលេងទាំង៤នាក់នោះ បានជាបន្តបន្ទាប់ នៅត្រង់ចំណុចវត្តព្រែកថ្លឹង ស្ថិតនៅភូមិព្រែកថ្លឹង សងា្កត់ជើងឯក ខណ្ឌដង្កោ ។
នគរបាលបានបញ្ជាក់ថា បន្ទាប់មកបាននាំទៅសាកសួរ នៅប៉ុស្តិ៍ដើម្បីកសាងសំណុំរឿងបញ្ជូនទៅកាន់សាលដំបូងរាជធានីភ្នំពេញ ចាត់ការតាមផ្លូវច្បាប់ ។ នៅក្នុងពេលនគរបាលសួរនាំ ក្រុមជនដៃដល់បានឆ្លើយសារភាពថា ក្រុមខ្លួនពិតជាបានធ្វើសកម្មភាពកាប់បំផ្លាញម៉ូតូរបស់ជនរងគ្រោះមែន ។ មិនតែប៉ុណ្ណោះ បានកាប់យកស្លាកលេខម៉ូតូនោះ យកទៅបោះចោលនៅក្នុងទឹកស្ទឹងព្រែកត្នោត ព្រោះខឹងក្រុមជនរងគ្រោះមើលមុខ និងនិយាយឌឺដងខ្លាំងពេក ៕
ចែករំលែកព័តមាននេះ