រាជធានីភ្នំពេញ ៖ រថយន្តម៉ាកឡិចស៊ិសLX៤៧០មួយគ្រឿងបានបើកគេចម៉ូតូ បើកផ្លូវជ្រុលឡើង ចិញ្ចើមផ្លូវទៅបុករះរថយន្តជាបន្តបន្ទាប់ចំនួន៥គ្រឿងដែលកំពុងឈប់ចតមុខហាងកាហ្វេ បណ្តាលអោយរងការខូចខាតធ្ងន់ធ្ងរ ហើយរថយន្តបង្កបានខ្ទេចខ្ទេចមុខ ។
ហេតុការណ៍គ្រោះថ្នាក់នេះ បានកើតឡើងកាលពីវេលាម៉ោងប្រមាណ១០និង៣០នាទីព្រឹកថ្ងៃទី១០ ខែមិថុនា ឆ្នាំ២០២៤ នៅមុខភោជនីយដ្ឋាន និងហាងកាហ្វេធី អិន ដែលស្ថិតនៅតាមបណ្តោយផ្លូវជាតិ៦Aក្នុង ភូមិគៀនឃ្លាំង ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
រថយន្តដែលបង្កម៉ាកឡិចស៊ិសLX ៤៧០ ពណ៌ខ្មៅ ពាក់ស្លាកលេខស្វាយរៀង ២A-០៧៨៨ បើកបរដោយបុរសម្នាក់មិនស្គាល់អត្តសញ្ញាណឡើយ។
តាមសាក្សីបានអោយដឹងថា នៅមុនពេលកើតហេតុ គេឃើញរថយន្តបង្កធ្វើដំណើរតាមផ្លូវជាតិលេខ ៦អា ក្នុងទិសដៅពីត្បូងទៅជើង (ចេញពីរាជធានីភ្នំពេញ) នៅពេលមកដល់កន្លែងកើតហេតុ ក៏បានគេចម៉ូតូ១គ្រឿង ដែលបើកផ្លូវជាហេតុធ្វើអោយរថយន្តរេចង្កូតទៅស្តាំដៃជ្រុលឡើង ចិញ្ចើមផ្លូវបុករះរថយន្ត ដែលកំពុងឈប់ចតជាបន្តបន្ទាប់ចំនួន៥គ្រឿង បណ្តាលអោយរងការខូចខាតហើយរថយន្តបង្កខ្ទេចមុខ ។
តាមព័ត៌មានអោយដឹងទៀតថា មុនដំបូងរថយន្ត បង្កបានបុកបញ្ឆិតគូថ រថយន្តម៉ាកឡង់គ្រឹស្ស័រនិងបុករថយន្ត ម៉ាក GAC GS5 ០១ គ្រឿង ហើយរុញទៅបោករថយន្តហ្វ័ត និងរថយន្តម៉ាកហាយឡែនឌ័រជាបន្តបន្ទាប់ចំនួន០២គ្រឿងទៀត ទាំងអស់រថយន្ត៥គ្រឿងបានរងការខូចខាត។ បន្ទាប់ពីបង្កគ្រោះថ្នាក់ ម្ចាស់រថយន្តម៉ាកឡិចស៊ិស បង្កបានសម្របសម្រួលចេញថ្លៃជួសជុលការខូចខាត។ទោះបីជាយ៉ាងណា គេពុំដឹងថា អស់ប៉ុន្មានឡើយ ៕
ចែករំលែកព័តមាននេះ