ខេត្តព្រះវិហារ ៖ មន្ត្រីប៉ូលិសក្នុងកងឯកភាពលេខ៧៩៥ ព្រំដែនគោក ប្រចាំតំបន់ប្រាសាទព្រះវិហារ ឈ្មោះស្រី សុផាន់ អាយុ២៧ឆ្នាំ មានស្រុកកំណើតភូមិថ្នល់កែង ឃុំរុងរឿង ស្រុករវៀង ត្រូវបានឃាតជនពីរនាក់ជួលឱ្យឌុបម៉ូតូចេញពីភូមិស្រឯម ឃុំកន្ទួត ស្រុកជាំក្សាន្ត ទៅកាន់ភូមិកំពង់ស្រឡៅ ឃុំស្រឡៅ១ ស្រុកឆែប ជាប់ព្រំដែនប្រទេសឡាវ ហើយបានអារ.កសម្លាប់យ៉ាងព្រៃផ្សៃកាលពីវេលាម៉ោង១១និង៣០នាទីថ្ងៃទី៧ មិថុនា ខណៈទៅដល់ចំណុចភូមិក្បាលដំរី ចម្ងាយប្រហែល១២គីឡូម៉ែត្រ ពីតំបន់មុំបី កន្លែងដែលមានព្រៃរបោះ និងស្ងាត់ជ្រងំ។
ឃាតជន២នាក់នោះបានសម្លាប់ម្ចាស់ម៉ូតូ ដែលជាមន្ត្រីប៉ូលិសក្នុងអង្គភាពខាងលើ ដោយអារ.កដោយឡាម និងកាំបិត ហើយអូសសាកសពយកទៅចោលក្នុងប្រឡាយទឹកក្បែរស្ពានមួយនៅមិនឆ្ងាយប៉ុន្មានពីផ្លូវ រួចហើយបុរសទាំងពីរនាក់ជាចោរប្លន់បានយកម៉ូតូរបស់ជនរងគ្រោះ ជិះទៅកាន់ភូមិកំពង់ពោធិ៍ ឃុំស្រឡៅ១ ។ ក្នុងថ្ងៃដដែលនោះអ្នកធ្វើដំណើរតាមដងផ្លូវ បានប្រទះឃើញសពក៏រាយការណ៍ឱ្យសមត្ថកិច្ចប៉ូលិសប៉ុស្តិ៍ក្បាលដំរី ភ្លាមនោះប៉ូលិសប៉ុស្តិ៍ខាងលើ បានរាយការណ៍បន្ទាន់ទៅស្នងការដ្ឋានខេត្ត និងធ្វើការស្រាវជ្រាវជាបន្ទាន់។ លុះក្រោយពេលកើតហេតុមួយថ្ងៃ ក៏ត្រូវបានរកឃើញមុខសញ្ញាជនដៃដល់ និងធ្វើការឃាត់ខ្លួនបានទាំងពីរនាក់ នៅថ្ងៃទី៨ មិថុនានៅក្នុងភូមិឃុំស្រឡៅ១ ជាប់ព្រំប្រទល់ប្រទេសឡាវ ។
លោកឧត្តមសេនីយ៍ម៉ៅ ពៅ ស្នងការប៉ូលិសខេត្តកាលពីវេលាព្រឹកថ្ងៃទី៩ មិថុនា ២០១១ បានឱ្យដឹងថា ពេលនេះសមត្ថកិច្ចកំពុងបញ្ជូនជនជាប់ចោទជាឃាតកទាំងពីរនាក់ ទៅកាន់ស្នងការដ្ឋានខេត្ត ដើម្បីសាកសួរ។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព ៕
ចែករំលែកព័តមាននេះ