(ថៃ)៖ អ្នកទេសចរកូរ៉េខាងត្បូងម្នាក់ បានរាយការណ៍ទៅប៉ូលិសប៉ាតាយ៉ា កាលពីថ្ងៃទី៣០ ខែឧសភា ឆ្នាំ២០២៤ ដោយអះអាងថាគាត់ត្រូវបានគេទាត់ចំមុខពីរដង។យោងតាមការចុះផ្សាយរបស់សារព័ត៌មាន Pattaya News បានឱ្យដឹងថាកាលពីយប់ថ្ងៃទី៣០ ខែឧសភា ភ្ញៀវទេសចរកូរ៉េខាងត្បូងម្នាក់ឈ្មោះ Park Munsu អាយុ៣៨ឆ្នាំ បានដើរលេងជាមួយមិត្តស្រីរបស់គាត់នៅផ្សាររាត្រី Runway ផ្លូវ Pattaya Second Street ក្រុង Pattaya ប្រទេសថៃ។
នៅក្នុងផ្សាររាត្រីនោះក៏មានការតាំងពិពណ៌ ពួកគេបានឈប់មើលការលេងសៀក ជាមួយសត្វជាច្រើនដូចជា ពស់ថ្លាន់ និងសត្វទីទុយ បន្ទាប់មកអ្នកទេសចរកូរ៉េខាងត្បូងម្នាក់នោះក៏បានប្រើទូរស័ព្ទរបស់គាត់ដើម្បីថតរូប និងវីដេអូនៃការសម្តែងរបស់សត្វ។
ទោះជាយ៉ាងណាក៏ដោយម្ចាស់កម្មវិធីបង្ហាញសត្វដែលមានឈ្មោះថា Bas បានស្នើឱ្យគាត់ឈប់ថតរូប និងថតវីដេអូ នេះបើយោងតាម Pattayamail ហើយការឈ្លោះប្រកែកគ្នាកាន់តែតានតឹងនាំឱ្យ បុរសកូរ៉េខាងត្បូងម្នាក់នោះ បង្ហាញកាយវិការមិនសមរម្យដោយ បោះក្រដាសប្រាក់១០០បាតដាក់មុខបុរសថៃនោះហើយចាកចេញទៅ។
កាយវិការនេះហាក់ដូចជាបង្ហាញការប្រមាថទើបធ្វើឱ្យបុរសថៃខឹង ក៏ទាត់អ្នកទេសចរកូរ៉េចំមុខចំនួនពីរដង បណ្តាលឱ្យ Park ដួលថយក្រោយ និងហូរឈាមពេញមាត់។ ការវាយតប់គ្នានេះបានធ្វើឱ្យអ្នកទេសចរណ៍កូរ៉េម្នាក់នេះបាក់ធ្មេញមុខ និងធ្មេញជាច្រើនទៀត ព្រមទាំងហូរឈាម។
ក្រោយពីទទួលបានព័ត៌មានភ្លាមសមត្ថកិច្ចបានចុះស្រាវជ្រាវ និងកោះហៅបុរសថៃនោះមកភ្លាមៗ ។បុរសថៃឈ្មោះBasនេះបាននិយាយថា គាត់ខឹងខ្លាំងណាស់សកម្មភាពគប់លុយរបស់ភ្ញៀវទេសចរកូរ៉េរូបនេះ គឺជាការប្រមាថដោយសារលុយនៅប្រទេសថៃមានរូបស្តេចដែលជំរុញឲ្យលោកផ្ទុះអំពើហិង្សា តែគាត់ក៏បានទទួលស្គាល់អំពើខុសឆ្គងរបស់គាត់ ហើយបានសម្តែងនូវវិប្បដិសារី។
ទាក់ទិននឹងរឿងរ៉ាវនេះបុរសថៃខាងលើក៏បាននិយាយថា គាត់បានដាក់ផ្លាកជូនដំណឹងជាភាសាអង់គ្លេស សុំកុំឱ្យអ្នកទស្សនាថត ឬថតរូបពេលសត្វកំពុងសំដែង។
ហេតុការណ៍នេះស្ថិតក្រោមការស៊ើបអង្កេត គេមិនទាន់ដឹងថាតើបុរសថៃរូបនេះបានផ្តល់សំណងសម្រាប់ការខូចខាតដល់ភ្ញៀវទេសចរកូរ៉េនោះឬយ៉ាងណានោះទេ៕
ចែករំលែកព័តមាននេះ