វៀតណាម ៖ បាតុភូតហ្វូងកណ្តូបជាច្រើនសន្ធឹកសន្ធាប់បានចូលមកវា.យប្រហារក្នុងតំបន់ភ្នំទីប្រជុំជនមួយនៃឃុំធៀនហ្វា ស្រុកប៊ិញយ៉ា ខេត្តឡាំងសឺន ភាគខាងជើងប្រទេសវៀតណាម ។ ហ្វូងកណ្តូបទាំងនេះ មិនត្រឹមតែបំផ្លាញព្រៃឈើ និងផលដំណាំនៅក្នុងភូមិប៉ុណ្ណោះទេ តែពួកវាក៏បានបង្កការភ័យខ្លាចដល់អ្នកភូមិអំពីប្រផ្នូលអ្វីមិនល្អដែលអាចកើតមានឡើង ។
ពលរដ្ឋឃុំធៀនហ្វា បានបញ្ជាក់ប្រាប់អ្នកយកព័ត៌មាន VOV កាលពីព្រឹកថ្ងៃទី២៩ ខែឧសភា ឆ្នាំ២០២៤ថា អស់រយៈពេល៣ ទៅ៤ថ្ងៃហើយ ដែលពួកគាត់បានប្រទះឃើញហ្វូងកណ្តូបរាប់លានក្បាលបន្តហើរ ចូលមកអុកឡុក នៅក្នុងភូមិជាច្រើននៃឃុំធៀនហ្វា ហើយតាំងពីកើតមកពួកគេពុំដែលធ្លាប់ប្រទះនឹងហ្វូងកណ្តូបដ៏ច្រើនសន្ធឹកសន្ធាប់បែបនេះពីមុនមកទេ ។
ពលរដ្ឋក្នុងឃុំធៀនហ្វា បានបង្ហើបថា ហ្វូងកណ្តូបដែលចូលមកលុកលុយវា.យប្រហារនាពេលនេះ គឺជាកណ្តូបឬស្សី ដែលមានខ្នងពណ៌លឿង និងមានជំនាញក្នុងការស៊ីបំផ្លាញស្លឹករុក្ខជាតិ និងដំណាំ ។
លោក Lang Van Hanh ប្រធានគណៈកម្មាធិការប្រជាជនឃុំធៀនហ្វា មានឱ្យដឹងថា៖ «ហ្វូងកណ្តូបពិតជាច្រើនក្រាស់ក្រែលមែនទែន ដោយតំបន់ខ្លះមានកណ្ដូបរាប់រយក្បាលក្នុងមួយម៉ែត្រការ៉េ ។ ទោះបីជាប្រជាជនបានបា.ញ់ថ្នាំគីមីសម្លា.ប់ពួកវាក៏ដោយ ប៉ុន្តែហ្វូងកណ្តូបរាប់ម៉ឺនក្បាលនៅតែបន្តហោះចូលមក ដែលប៉ះពាល់យ៉ាងខ្លាំងដល់ការរស់នៅប្រចាំថ្ងៃរបស់អ្នកស្រុក ក៏ដូចជា ស៊ីបំផ្លាញដំណាំអ្នកស្រុកជាច្រើនហិកតា ។
ប្រធានគណៈកម្មាធិការប្រជាជនឃុំធៀនហ្វា បានបញ្ជាក់ទៀតថា ដោយមានការសម្របសម្រួលជាមួយទីភ្នាក់ងារផ្សព្វផ្សាយកសិកម្ម និងស្ថានីយសេវាកសិកម្ម ថ្នាំសម្លា.ប់សត្វល្អិតគ្រោងនឹងបញ្ចូនមកកាន់តំបន់ដែលរងការវា.យប្រហារដោយហ្វូងកណ្តូប ដើម្បីបា.ញ់សម្លា.ប់ និងទប់ស្កាត់ការរីករាលដាលនៃហ្វូងកណ្តូប ។
លោក Lang Van Hanh បង្ហើបថា មុនដែលថ្នាំសម្លា.ប់កណ្តូបនឹងបញ្ចូនមកដល់ អ្នកភូមិជាច្រើននាក់បានព្យាយាមបាញ់ថ្នាំសម្លា.ប់សត្វល្អិតទប់ទល់នឹងសត្វកណ្តូបដោយខ្លួនឯង ប៉ុន្តែមិនបានផលទាល់តែសោះ ព្រោះកណ្តូបមិនងាប់នោះឡើយ ។ ដំណោះស្រាយបន្ទាន់បច្ចុប្បន្ន គឺបា.ញ់ថ្នាំបង្ការ ហើយរង់ចាំមើលថា មានប្រសិទ្ធភាព ឬអត់ ។
បើមិនបានផលទេ យើងនឹងឈានដល់វិធានការដោយដៃ គឺប្រើដូចជាការប្រើកន្ត្រង់សំណាញ់ ដើម្បីចាប់សត្វកណ្តូប ។ ប្រធានគណៈកម្មាធិការប្រជាជនឃុំធៀនហ្វា បន្តថា ហ្វូងកណ្តូបទាំងនេះស៊ីស្លឹកឈើដូចជា ស្លឹកឬស្សី ស្លឹកពោត ស្លឹកស្រូវ ហើយផលប៉ះពាល់ដែលបង្កឡើងដោយហ្វូងកណ្តូប គឺយើងមិនអាចទស្សន៍ទាយបានថា នឹងមានអ្វីកើតឡើងបន្ទាប់ទៀតទេ» ។
របាយការណ៍បឋមបង្ហាញថា ហ្វូងកណ្តូបបានស៊ីបំផ្លាញព្រៃឬស្សី និងព្រៃស្រោងក៏ដូចជា ដំណាំពោត និងស្រូវ ក្នុងភូមិចំនួន៣នៃឃុំធៀនហ្វា ដែលផ្ទៃដីខូចខាតប្រមាណ១០ហិកតាហើយ ។ ហ្វូងកណ្តូបមានដង់ស៊ីតេខ្ពស់ដោយចាប់ពី៦០០ ទៅ១០០០ក្បាល ក្នុងមួយដើមឈើមួយមែកៗដោយបន្សល់អោយដើមឈើនៅសល់តែមែកទទេ គ្មានស្លឹក ។ ហ្វូងកណ្តូបទាំងនេះត្រូវគេដឹងថា ចាប់ផ្តើមផ្លាស់ទីពីតំបន់ភ្នំខ្ពស់ៗ ហោះទៅកាន់ទឹកអូរដែលសម្បូរទៅដោយផលដំណាំ ។ ដោយសារវត្តមានជីវិតរបស់កណ្តូបប្រភេទនេះវែង ពេលវេលារស់នៅ និងខូចខាតមានច្រើនណាស់ អាចរហូតពី៥ទៅ៦ខែក្នុងមួយឆ្នាំ ហើយកណ្តូបពេញវ័យអាចហើរបានចម្ងាយពី៤០-៦០km ផ្លាស់ទីជាហ្វូង និងមានកម្លាំងបំផ្លិចបំផ្លាញខ្លាំង ពិបាកក្នុងការទប់ស្កាត់ និងគ្រប់គ្រង ។
ហ្វូងកណ្តូបទាំងនេះ ជំរុញឱ្យមានការព្យាករណ៍ថា ផលដំណាំក្នុងរដូវបង្កបង្កើនផលនាឆ្នាំ២០២៤ ប្រឈមនឹងហានិភ័យខ្ពស់នៃការបំផ្លិចបំផ្លាញពីសត្វកណ្តូបដែលកើតឡើង ហើយរីករាលដាលបណ្តាលឱ្យមានការវិនាសកម្មយ៉ាងធ្ងន់ធ្ងរដល់វិស័យកសិកម្មវៀតណាម ៕ អត្ថបទ៖ អោម ចែតច័ន្ទណារ៉ា
ចែករំលែកព័តមាននេះ