ព្រែកជីកហ្វូណនតេជោ ជាគម្រោងយក្សមួយដែលរាជរដ្ឋាភិបាលគ្រោងនឹងធ្វើហើយក៏ជា គម្រោងដ៏មានអត្ថប្រយោជន៍មួយដែលជួយកាត់បន្ថយរយៈពេលចម្ងាយតម្លៃនៃការដឹកជញ្ជូនបង្កើតតំបន់ពាណិជ្ជកម្ម អភិឌ្ឍកំពង់ផែរណបថ្មីៗអភិវឌ្ឍកសិកម្ម ធារាសាស្ត្រ ចិញ្ចឹមសត្វ ។ គម្រោងមួយនេះជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា បង្កើតការងារបន្ថែមជូនប្រជាជនជំរុញការអភិវឌ្ឍទីក្រុងសំណង់នគររូបនីយកម្ម…
ព្រែកជីកហ្វូណនតេជោ ជាគម្រោងយក្សមួយដែលរាជរដ្ឋាភិបាលគ្រោងនឹងធ្វើហើយក៏ជា គម្រោងដ៏មានអត្ថប្រយោជន៍មួយដែលជួយកាត់បន្ថយរយៈពេលចម្ងាយតម្លៃនៃការដឹកជញ្ជូនបង្កើតតំបន់ពាណិជ្ជកម្ម អភិឌ្ឍកំពង់ផែរណបថ្មីៗអភិវឌ្ឍកសិកម្ម ធារាសាស្ត្រ ចិញ្ចឹមសត្វ ។
គម្រោងមួយនេះជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា បង្កើតការងារបន្ថែមជូនប្រជាជនជំរុញការអភិវឌ្ឍទីក្រុងសំណង់នគររូបនីយកម្ម ជំរុញកំណើនទេសចរណ៍ និងជំរុញកំណើនអចលនទ្រព្យ ។
កម្មវិធីលុយនៃសារព័ត៌មានកោះសន្តិភាព សូមនាំមកជូននូវការពិតទាំង២៦យ៉ាងរបស់ គម្រោងព្រែកជីកហ្វូណនតេជោ ជូនសារធារណៈ ។
១. រាជរដ្ឋាភិបាលបានដាក់ចេញផែនការអភិវឌ្ឍជាតិមួយហើយបានប្តេជ្ញាចិត្តធ្វើអោយប្រសើរ ឡើងនូវប្រព័ន្ធដឹកជញ្ជូនរបស់កម្ពុជាទាំងផ្លូវគោក ផ្លូវអាកាស ផ្លូវទឹកសាប និងផ្លូវសមុទ្រ ។ ក្នុងផែនការនោះមានផ្លូវ១០២ខ្សែ គម្រោងផ្លូវដែក គម្រោងព្រែកជីក គម្រោងដឹក ជញ្ជូនផ្លូវ សមុទ្រ និងគម្រោងអាកាសចរណ៍ ហើយក្នុងគម្រោងទាំងនេះគម្រោងព្រែកជីកហ្វូណនតេជោ មានសារៈសំខាន់ជាងគេ ។
២ ព្រែកជីកហ្វូណនតេជោនេះមានទទឹងខាងលើ១០០ម៉ែត្រ ទទឹងខាងក្រោម៨០ម៉ែត្រ និងជម្រៅ៥,៤ម៉ែត្រ ដែលអាចអោយកប៉ាល់ផ្ទុកកុងទីន័រទម្ងន់៣០០០តោនធ្វើនាវាចរណ៍បាន ។
៣. គម្រោងព្រែកជីកប្រវែង១៨០គីឡូម៉ែត្រនេះឆ្លងកាត់ខេត្តចំនួន៤ គឺខេត្តកណ្តាល តាកែវ កំពត និងខេត្តកែប ។ ព្រែកជីកហ្វូណនតេជោនេះនឹងភ្ជាប់កំពង់ផែភ្នំពេញ ទៅកំពង់ផែ សមុទ្រខេត្តកែប ដែលបង្កើតជាចរន្តការដឹកជញ្ជូនថ្មីមួយក្នុងប្រវត្តិសាស្ត្រកម្ពុជាសម័យទំនើប ។
៤. ការកសាងព្រែកជីកដ៏ធំបែបនេះមិនមែនជារឿងងាយស្រួលនោះទេ ដែលត្រូវការទឹកប្រាក់ ចំនួន១.៧០០លានដុល្លារ ហើយត្រូវកសាងផ្លូវសន្ទះនាវាចរចំនួន៣ ស្ពានឆ្លង១១ស្ពាន ប្រើរយៈពេល៤ឆ្នាំអោយរួចរាល់ ។
៥. ដើម្បីអោយគម្រោងយក្សមួយនេះ អាចសម្រេចទៅបានប្រមុខរាជរដ្ឋាភិបាលកម្ពុជាបានសម្រេចចិត្តផ្តល់ការងារនេះដល់ក្រុមហ៊ុនចិន ដើម្បីប្រតិបត្តិការកសាង ។ កាលពីខែតុលា ឆ្នាំ២០២៣ នាយករដ្ឋមន្ត្រីបានចូលរួមគម្រោងខ្សែក្រវ៉ាត់ និងផ្លូវ ដែលធ្វើនៅប្រទេសចិន ហើយ ឈានទៅរកការចុះហត្ថលេខាលើកិច្ចព្រមព្រៀង ដើម្បីដំណើរការដ្ឋានព្រែកជីកហ្វូណនតេជោ ក្នុងទំហំទឹកប្រាក់១៧០០លានដុល្លារ ។
៦. នៅពេលព្រែកជីករួចរាល់ជាស្ថាពរ ព្រែកជីកនេះនឹងធ្វើអោយកម្ពុជាអាចឯករាជ្យពីការគ្រប់គ្រងការដឹកជញ្ជូនផ្លូវទឹកពីវៀតណាមបាន ព្រោះកម្ពុជាអាចដឹកជញ្ជូនទំនិញនានាទៅសមុទ្រដោយខ្លួនឯងបាន ។
៧. យោងលើរបាយការណ៍ព្រែកជីកហ្វូណនតេជោ ស្ថាបនារួចរាល់ និងដំណើរការពេញ លេញ ព្រែកជីកនេះភ្ជាប់ការដឹកជញ្ជូនទៅកាន់សមុទ្រទៅកំពត បើកអោយការដឹកជញ្ជូនផ្លូវ ទឹកទន្លេមេគង្គ និងផ្លូវសមុទ្រកម្ពុជា ។ ព្រែកជីកនេះជួយកាត់បន្ថយការដឹកជញ្ជូនផ្លូវទឹក ប្រមាណ១៦ភាគរយ និងបន្ថយរយៈពេលដឹកជញ្ជូនទំនិញផង ។
៨. ព្រែកជីកនេះនឹងជួយលើកស្ទួយកសិកម្ម ធារាសាស្ត្រនៅតាមដងព្រែកជីកសម្រួលដល់ជីវភាពប្រជាពលរដ្ឋប្រមាណ១,៦លាននាក់ ដែលអាចទាញយកប្រយោជន៍ផ្ទាល់ ឬមិនផ្ទាល់ពីគម្រោង ។
៩. អ្នកជំនាញផ្នែកអចលនទ្រព្យបានលើកឡើងថា គម្រោងព្រែកជីកហ្វូណនតេជោនេះនឹងជួយលើការអភិវឌ្ឍវិស័យអចលនទ្រព្យនៅតាមតំបន់ទាំងនោះ ហើយថែមទាំងបង្កើត គម្រោងអចលនទ្រព្យថ្មីៗ សម្រាប់ប្រជាជន និងអ្នកវិនិយោគ ។
១០. អ្នកជំនាញផ្នែកទេសចណ៍វិញ បាននិយាយថា គម្រោងព្រែកជីកនេះក៏នឹងធ្វើអោយវិស័យទេសចរណ៍កាន់តែប្រសើរឡើងតាមរយៈការដឹកជញ្ជូនទេសចរណ៍ទាំងជាតិ និងអន្តរជាតិចូលមកតាមផ្លូវទឹករហូតដល់រាជធានីភ្នំពេញ ដែលជាបេះដូងនៃប្រទេសកម្ពុជា។
១១. លទ្ធផលការសិក្សា ផលប៉ះពាល់ និងទិដ្ឋភាពច្បាប់ឃើញថា មិនបានធ្វើអោយល្មើសលើកិច្ចព្រមព្រៀងមេគង្គឆ្នាំ១៩៩៥នោះទេ ។ យោងតាមមាត្រា៥ នៃកិច្ចព្រមព្រៀង បានចែងពីការប្រើប្រាស់ទឹកដោយសមហេតុផល ដោយកម្ពុជាមានកាតព្វកិច្ច ធ្វើការជូនដំណឹងទៅគណៈកម្មការរួមអោយបានជ្រាបជាមុន ពេលអនុវត្តការងារសាងសង់ និងមិនជាប់កាតព្វកិច្ចធ្វើការពិគ្រោះយោបល់ជាមុន ឬត្រូវមានកិច្ចព្រមព្រៀងជាក់លាក់ពីប្រទេសសមាជិកគណៈកម្មការទន្លេមេគង្គនោះទេ ។
១២. គម្រោងព្រែកជីកហ្វូណន តេជោជាគម្រោងមួយដែលបង្វែរទឹកចេញពីព្រែកតាហ៊ីង ដែលជាដៃទន្លេបាសាក់ ហើយទន្លេបាសាក់ជាដៃមួយរបស់ទន្លេមេគង្គ មិនមែនបង្វែរចេញពីទន្លេមេគង្គដែលជាទន្លេមេនោះទេ ។ ដូច្នេះកម្ពុជាមិនចាំបាច់ស្នើទៅកាន់គណៈកម្មការទន្លេមេគង្គអន្តរជាតិ ដើម្បីសុំអនុវត្តគម្រោងនេះឡើយគ្រាន់តែជូនដំណឹងជាមុនប៉ុណ្ណោះ ។
១៣. ក្រុមហ៊ុនសិក្សា គឺក្រុមហ៊ុនCCCC Water Transportation Consultants Co., Ltd. និងក្រុមហ៊ុនសាជីវកម្មស្ពាន និងថ្នល់ចិន (CRBC) រួម និងដៃគូអន្តរជាតិលើផ្នែកបច្ចេកទេស ជំនាញការរបស់ JICA ADB និង MIRCS ជំនាញការអន្តរជាតិផ្នែកកំពង់ផែ និងផ្លូវទឹកមេធាវីអន្តរជាតិជំនាញកិច្ចការច្បាប់ទឹក និងកិច្ចព្រមព្រៀងមេគង្គ១៩៩៥ ។
១៤. គម្រោងព្រែកជីកហ្វូណនតេជោ មិនស្ថិតនៅក្នុងគម្រោងខ្សែក្រវ៉ាត់ និងផ្លូវរបស់ចិននោះទេ ទោះបីជាគម្រោងនេះទទួលការសាងសងក្រោមរូបភាពវិនិយោគបែប BOT ក្នុងគោលបំណងដោះស្រាយបញ្ហាការដឹកជញ្ជូនតាមផ្លូវទឹក ។
១៥. ទោះបីជាគម្រោងព្រែកជីកនេះទើបតែបានសិក្សា និងត្រៀមបើកការដ្ឋានសាងសង់ក្តីក៏មិនមែនមានន័យថា គម្រោងព្រែកជីកនេះថ្មីដែរដោយសារវាសិ្ថតនៅលើដានព្រែកជីកចាស់ របស់ខ្មែរតាំងពីសម័យមុនអង្គរមកម្ល៉េះ គឺសម័យហ្វូណនក្នុងប្រវត្តិសាស្ត្ររបស់កម្ពុជា មាន ព្រែកជីកចំនួន៣ គឺព្រែកជីកអូកែវ ព្រែកជីកវេនតេ និងព្រែកជីកហ្វូណន តែឆ្លងកាត់សង្គ្រាម ក្នុងប្រវត្តិសាស្ត្រព្រែកជីកចំនួន២ គឺអូកែវ និងវេនតេ ស្ថិតនៅក្នុងទឹកដីវៀតណាម ។
១៦. បច្ចុប្បន្នទំនិញរបស់កម្ពុជាចេញពីកំពង់ផែភ្នំពេញ៦៧% ត្រូវដឹកទៅកាន់កំពង់ផែ ក្រុងព្រះសីហនុ និង៣៣% ត្រូវដឹកតាមប្រទេសវៀតណាម តាមការរំពឹងទុកនៅពេលព្រែកជីក នេះបញ្ចប់ការសាងសង់ និងប្រើប្រាស់ជាផ្លូវការ ការដឹកជញ្ជូនតាមផ្លូវទឹកទៅកំពង់ផែក្រុង ព្រះសីហនុ នឹងកើន៩០% រីឯទៅតាមវៀតណាមនៅសល់ត្រឹមតែ១០%ប៉ុណ្ណោះសម្រាប់ តែទំនិញណាដែលចាំបាច់ទៅតាមផ្លូវនេះ ។
១៧. តាមការបញ្ជាក់របស់លោកឧបនាយករដ្ឋមន្ត្រី និងជាអនុប្រធានទី១ក្រុម ប្រឹក្សាអភិវឌ្ឍកម្ពុជា លោកស៊ុន ចាន់ថុល គម្រោងនេះប្រើប្រាស់ថវិការវាងរដ្ឋាភិបាលកម្ពុជាជាមួយក្រុមហ៊ុនឯកជន ។
១៨. លោកបណ្ឌិត គី សិរីវឌ្ឍ អ្នកជំនាញផ្នែកសេដ្ឋកិច្ចនៃរាជ្យបណ្ឌិតសភាកម្ពុជា បានលើក ឡើងថា ការប្រើប្រាស់ព្រែកជីកនេះនឹងផ្តល់ដល់ឧត្តមភាពផ្នែកប្រកួតប្រជែងរបស់កម្ពុជា ព្រោះកម្ពុជាចំណេញលើថ្លៃដឹកជញ្ជូនជាង៣០០ដុល្លារក្នុងមួយទូកុងទីន័រ បើធៀបនឹងការដឹកជញ្ជូនតាមវៀតណាម ។
១៩. គម្រោងព្រែកជីកនេះ ទទួលបានការអបអរសាទរពីប្រជាពលរដ្ឋកម្ពុជា ក្នុងមួយរយៈពេល ចុងក្រោយនេះលើបណ្តាញសង្គមហ្វេសប៊ុក មានការប្តូរprofile បង្ហាញពីការគាំទ្រ លើគម្រោងនេះ ។
២០. បច្ចុប្បន្នកម្ពុជាមានទន្លេឆ្លងកាត់ប្រវែង១.៧៥០គីឡូម៉ែត្រ តែផ្លូវទឹកដែលអាច បើកបរ កប៉ាល់បានមានត្រឹមតែ៧៨០គីឡូម៉ែត្រតែប៉ុណ្ណោះ ។ ក្នុងចំណោមផ្លូវទឹកដឹកជញ្ជូនបាន ទាំងនេះមានទន្លេមេគង្គ៣០ភាគរយ ហើយវាបានក្លាយជាទន្លេសំខាន់ជាងគេក្នុងការដឹកជញ្ជូនតាមផ្លូវទឹក ។ ទន្លេសាប១៥ភាគរយ ទន្លេបាសាក់៥ភាគរយ តែវាមិនដូចជា ទន្លេមេគង្គនោះទេ ក្នុងនោះមានការហូរភ្ជាប់តិចតួច និងទិសដៅលំហូរទឹកផ្សេងគ្នាដូច្នេះទន្លេមេគង្គជាសរសៃឈាមសេដ្ឋកិច្ចសំខាន់បំផុតសម្រាប់កម្ពុជា ៕
ចែករំលែកព័តមាននេះ