ខេត្តកំពង់ចាម ៖ ក្រុមក្មេងទំនើងចំនួនពីរនាក់ជិះម៉ូតូមួយគ្រឿង មានកាំបិតនិងដាវសាមូរ៉ៃ ដោយជិះតាមផ្លូវជាតិលេខ៧ អូសបែកផ្កាភ្លើងព្រាត ចំណុចក្បែរផ្សារព្រៃទទឹង ក្នុងឃុំជ្រៃវៀន ស្រុកព្រៃឈរ …
ខេត្តកំពង់ចាម ៖ ក្រុមក្មេងទំនើងចំនួនពីរនាក់ជិះម៉ូតូមួយគ្រឿង មានកាំបិតនិងដាវសាមូរ៉ៃ ដោយជិះតាមផ្លូវជាតិលេខ៧ អូសបែកផ្កាភ្លើងព្រាត ចំណុចក្បែរផ្សារព្រៃទទឹង ក្នុងឃុំជ្រៃវៀន ស្រុកព្រៃឈរ កាលពីយប់ថ្ងៃទី២៤ឧសភា ឆ្នាំ២០២៤ ហើយត្រូវបានកម្លាំងនគរបាលដែលជាម្លប់បាតតាមដងផ្លូវប្រទះឃើញក៏ចាប់ខ្លួនតែម្ដង។ រួចបញ្ជូនមកអធិការដ្ឋាននគរបាលស្រុកព្រៃឈរដើម្បីសួរនាំរកមូលហេតុការពិត។
សមត្ថកិច្ចមូលដ្ឋានបានឲ្យដឹងថា ក្នុងការពង្រឹងសន្តិសុខសណ្ដាប់ធ្នាប់គ្រប់បណ្ដាលឃុំទាំងអស់នៅស្រុកព្រៃឈរ សម្រាប់ការបោះឆ្នោតក្រុមប្រឹក្សារាជធានីខេត្ត គឺកម្លាំងបានចេញល្បាត តាមការចង់ឱ្យបង្ហាញរបស់លោកឧត្តមសេនីយ៍ស្នងការនគរបាលខេត្តក៏ដូចជាឯកឧត្តមអ៊ុន ចាន់ដា អភិបាលខេត្ត ពិសេសការបង្ក្រាបក្រុមក្មេងទំនើងដែលបង្ករការអុកឡុកឬធ្វើសកម្មភាពនៅកន្លែងណាមួយត្រូវតែទប់ស្កាត់ឱ្យបានទាន់ពេលវេលា។
ជាមួយនោះក៏ទទួលបានអនុសាសន៍ដ៏ខ្ពង់ខ្ពស់ ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងការចង្អុលណែនាំពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានដាក់ចេញនូវបទបញ្ជាយ៉ាងមុឹងម៉ាត់ក្នុងការបង្ក្រាបក្រុមក្មេងទំនើងឲ្យមានប្រសិទ្ធភាព។
សមត្ថកិច្ចមូលដ្ឋានបន្តឲ្យដឹងទៀតថា វេលាម៉ោង១០និង៤០នាទីយប់ថ្ងៃទី ២៤ឧសភា ខណៈពេលកម្លាំងសមត្ថកិច្ច្ច បាននឹងកំពុងល្បាតចល័ត នៅលើផ្លូវជាតិលេខ៧ ត្រង់ចំណុចផ្លូវបំបែកផ្សារព្រៃទទឹង ស្ថិតក្នុងភូមិព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម ក៏បានប្រទះឃើញក្មេងទំនើង ០១ក្រុម មានគ្នា ០២នាក់ ប្រើប្រាស់មធ្យោបាយម៉ូតូ ០១គ្រឿង ម៉ាកហុងដាឌ្រីមសេ១២៥ ប្រដាប់ដោយកាំបិតតាំងតោ ០១ដើម និងដាវ ០១ដើម ធ្វើសកម្មភាពជិៈម៉ូតូ កាន់ដាវអូសកាត់លើថ្នល់ បែកផ្កាភ្លើងភ្លាមៗនោះកម្លាំងនគរបាលបានធ្វើការឃាត់ខ្លួនបញ្ជូនមកអធិការនគរបាលស្រុកដើម្បីសួរនាំ។
តាមរយៈការឆ្លើយសារភាពដោយពួកគេទាំងពីរនាក់ខឹងភាគីម្ខាងទៀតដែលជិះម៉ូតូ២ ទៅ៣គ្រឿងរកសំឡេងខ្លាំងៗឌឺមកលើពួកគេ ដោយខឹងពេកបានជិះម៉ូតូទៅយកកាំបិតនិងដាវមកដើម្បីតាមរកក្រុមម្ខាងទៀត តែពុំឃើញមិនដឹងថាក្រុមនោះមានអត្តសញ្ញាណនៅទីណាឡើយ។
សូមបញ្ជាក់ថាការឃាត់ខ្លួនជនទាំងពីរនាក់នេះ។តាមបញ្ជាឯកឧត្តម វង្ស ប៊ុនវិសុទ្ធ ព្រះរាជអាជ្ញា នៃអយ្យការអមសាលាដំបូងខេត្តកំពង់ចាម ហើយមកដល់ព្រឹកថ្ងៃទី២៥ ឧសភា ក្រុមក្មេងទំនើងត្រូវបានបញ្ជូនមកកាន់ស្នងការដ្ឋាននគរបាលខេត្តនិងចាត់តាមនីតិវិធីតាមផ្លូវច្បាប់។
ចែករំលែកព័តមាននេះ