ប៉ូលនយោបាយការទូតចម្បងរបស់កម្ពុជា គឺអាស៊ាន ប៉ុន្តែប្រសិនបើនិយាយអំពីប៉ូលនៃគោលនយោបាយទាក់ម៉ូយជំរុញវិនិយោគទុនក្រៅប្រទេសអាចជាប្រទេស៤សំខាន់ដោយនៅក្នុងនោះ គឺមានមហាសេដ្ឋកិច្ច ចិន ជប៉ុន កូរ៉េខាងត្បូង និងសិង្ហបុរី ។
ជាសេចក្តីពិតមកដល់ពេលនេះ កម្ពុជាពិតជាមិនអាចបំភ្លេចចិនបានឡើយ ហើយក៏នឹងនៅ តែបន្តគោលនយោបាយជំរុញ និងពង្រឹងបន្ថែមការទាក់ម៉ូយវិនិយោគទុនពីចិនបន្ថែមទៀត ដោយសារតែពេលនេះចិន មានមូលដ្ឋានសេដ្ឋកិច្ច និងធនធានដើម្បីវិនិយោគនៅកម្ពុជាស្រាប់ ជាមួយនឹងទុនសរុបដែលគេអាចប៉ានស្មានថា មានប្រមាណជា៤៥ភាគរយនៃទំហំទុនវិនិយោគទុនពីប្រទេសដែលមានតម្លៃប្រមាណជា១៨៥,៧ពាន់ទ្រីលានរៀល ឬស្មើនឹង ប្រមាណជាជិត៤៦ពាន់លានដុល្លារ ។ នេះបើតាមតួរលេខគិតត្រឹមដើមឆ្នាំ២០២៣ ។
![](https://kohsantepheapdaily.com.kh/wp-content/uploads/2024/05/2a675ce4510ab2178e55571541488002.jpg)
នេះ គឺជាតួរលេខដែលសារព័ត៌មានមួយចំនួនបានចុះផ្សាយកន្លងមកដោយឡែកកូរ៉េខាងត្បូង ក៏មិនធម្មតាដែរ គឺឈរនៅលំដាប់លេខពីរបន្តពីចិនក្រៅពីនោះមានសិង្ហបុរី ជប៉ុនជាដើម ។
នៅពេលដែលសម្តេចធិបតី ហ៊ុន ម៉ាណែត បានទៅបំពេញទស្សនៈកិច្ចផ្លូវការនៅកូរ៉េខាងត្បូង ថ្មីៗកន្លងទៅនេះ លោកបានជួប និងធ្វើនយោបាយការទូតសេដ្ឋកិច្ចជាមួយនឹងក្រុមហ៊ុន កូរ៉េ ខាងត្បូងជាច្រើនដោយរួមទាំងចូលរួមកម្មវិធីវេទិកាធុរៈកិច្ចកម្ពុជា-កូរ៉េ ដោយនៅក្នុងនោះ សម្តេចបានលើកទឹកចិត្តខ្លាំងដោយប្រកាសជាចំហរថា វិនិយោគទុនកូរ៉េនឹងលើកទឹកចិត្ត ហើយបើកឱកាសឲ្យសហគមន៍វិនិយោគិនកូរ៉េអាចទំនាក់ទំនងផ្ទាល់ជាមួយនឹងក្រុមប្រឹក្សាវិនិយោគកម្ពុជាដោយផ្ទាល់ដូចគ្នានឹងជប៉ុន និងបណ្តាប្រទេសមួយចំនួនផងដែរ ។ នៅពេលនោះ នៅលើបណ្តាញសង្គមរបស់សម្តេចក៏បានបញ្ជាក់ថា កូរ៉េ គឺជាដៃគូរពាណិជ្ជកម្មធំទី១១ របស់កម្ពុជា នៅក្នុងឆ្នាំ២០២៣ ដោយមានតម្លៃសរុប៧៥១ លានដុល្លារ ខណៈទុនវិនិយោគកូរ៉េនៅកម្ពុជា គឺមានលើសពី៥ពាន់លានដុល្លារ ។
![](https://kohsantepheapdaily.com.kh/wp-content/uploads/2024/05/c1d715a6e28c538c021473ac1020fa2a.jpeg)
ការសម្រេចចិត្តរបស់ជប៉ុនមកកម្ពុជាក្រោយគេ ប៉ុន្តែនៅពេលដែលជប៉ុនបានមក គឺកុំភ្លេចថា គម្រោងវិនិយោគរបស់ជប៉ុននីមួយៗគឺមានមូលដ្ឋានច្បាស់លាស់ ហើយសុទ្ធសឹងតែជាគម្រោងធំៗដោយមកដល់ដើមឆ្នាំ២០២៣ ពាណិជ្ជកម្មកម្ពុជា និងជប៉ុន មានទំហំដល់ទៅ ១,៨ ពាន់លានដុល្លារ ហើយទុនវិនិយោគរបស់ជប៉ុនវិញ គឺមានទំហំប្រមាណជា២,៧៧៦ ពាន់លានដុល្លារ ។
នៅពេលនេះ នៅលើវិស័យលក់រាយផ្សារទំនើបអ៊ីអនរបស់ជប៉ុន គឺបានក្លាយជានិមិត្តរូបមួយ នៅក្នុងដួងចិត្តពលរដ្ឋកម្ពុជា មិនតែប៉ុណ្ណោះនៅពេលថ្មីៗនេះជប៉ុនក៏បានកំពុងដែលហក់ចូល ជាបន្តបន្ទាប់មកក្នុងទីផ្សាធនាគារ និងហិរញ្ញវត្ថុគ្រឿងបង្គំអេឡិចត្រូនិក ខណៈដែលមូលដ្ឋាន កសិកម្មក៏កំពុងតែទាក់ទាញ ហើយក៏មានជនជាតិជប៉ុនខ្លះកំពុងតែដំណើរការគម្រោងខ្លះៗនៅកម្ពុជា ។
ចំណែកមេដឹកនាំកម្ពុជា ទាំងសម្តេចតេជោ និងសម្តេចធិបតី សុទ្ធតែព្យាយាមលើកទឹកចិត្ត ដល់ការវិនិយោគជប៉ុននៅកម្ពុជា ។
សិង្ហបុរីក៏ជាគោលដៅមួយមិនធម្មតាដែរ ទោះបីជាប្រទេសតូច តែសិង្ហបុរី គឺជាមជ្ឈមណ្ឌល ពាណិជ្ជកម្មមួយនៅក្នុងអាស៊ី ហើយតែងតែឈរនៅលំដាប់កំពូលនៃវិស័យសេវាកម្ម ពាណិជ្ជកម្ម ហិរញ្ញវត្ថុ និងទេសចរណ៍ ដែលជាដៃគូមួយដែលកម្ពុជាកំពុងតែសម្លឹងមើល ស្របពេលដែលសិង្ហបុរីក៏មានទុនវិនិយោគ និងមានមូលដ្ឋានវិនិយោគនៅកម្ពុជារួចហើយដែរ ។
នៅពេលនេះ ក្រុមហ៊ុនសិង្ហបុរីជាច្រើន បានកំពុងតែហាក់ចូលនៅក្នុងវិស័យអចលនទ្រព្យ ធនាគារ និងសេវាកម្មជាច្រើនខណៈដែលពលរដ្ឋសិង្ហបុរីជាច្រើននាក់ បានកំពុងតែបម្រើការជាអ្នកជំនាញខាងគ្រប់គ្រងលំដាប់កំពូលៗជាច្រើននាក់នៅកម្ពុជា ។ ប្រទេសនេះតូចប្រជាជនតិច តែតួរលេខពាណិជ្ជកម្មនៅដើមឆ្នាំ២០២៣ គឺមានប្រមាណជា៩២០ លានដុល្លារ រីឯទុនវិនិយោគវិញក៏មិនធម្មតាដែរ គឺប្រមាណជាលើសពី២,០៦៥ ពាន់លានដុល្លារ ។
សម្តេចធិបតី ហ៊ុន ម៉ាណែត ធ្លាប់បានថ្លែងកាលពីពេលថ្មីៗនេះថា សម្តេចនឹងអញ្ជើញទៅ បំពេញទស្សនៈកិច្ចនៅសិង្ហបុរីនៅខែក្រោយនេះស្របពេលដែលសិង្ហបុរីមានមេដឹកនាំថ្មីថែម ទៀតដូច្នេះនេះ គឺជាឱកាសមួយ ដែលកម្ពុជានឹងពង្រឹងគោលនយោបាយការទូតសេដ្ឋកិច្ច និងពង្រឹងយន្តការទាក់ម៉ូយឲ្យវិនិយោគិនសិង្ហបុរីមកកម្ពុជាបន្ថែមទៀត ។
សរុបមកវិញ ចិនក្តី កូរ៉េខាងត្បូងក្តី ជប៉ុនក្តី សិង្ហបុរី ក្តីគឺជាគោលដៅចម្បងដែលកម្ពុជាកំពុងតែសំឡឹង ហើយក្រៅពីនោះ កម្ពុជាក៏ទំនងជាមិនចោលដែរនូវដៃគូសេដ្ឋកិច្ចនៅក្នុងតំបន់ ដែលមានវៀតណាម ថៃ និងម៉ាឡេស៊ី ប្រទេសទាំងនេះក៏មានសក្តានុពលសេដ្ឋកិច្ច ពាណិជ្ជកម្មទេសចរណ៍ សេវាកម្ម និងសុទ្ធសឹងតែមានអំណាច និងឱកាសជំរុញគ្នាទៅវិញទៅមកផងដែរ ៕
ចែករំលែកព័តមាននេះ