ខេត្តបន្ទាយមានជ័យ ៖ អនុវត្តតាមការណែនាំ និងបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ កម្លាំងផែនព្រហ្មទណ្ឌ កម្លាំងអធិការដ្ឋាននគរបាលក្រុងប៉ោយប៉ែត បានបើកប្រតិបត្តិការចុះស្រាវជ្រាវ ករណីមានចោរលួចរថយន្ត ខណៈម្ចាស់កំពុងចុះទិញឥវ៉ាន់ ដោយចោរនោះបានឡើងបើករថយន្តរត់គេចខ្លួន រួចបានយកទៅប្លុងចោល ម្ដុំក្រោយផ្សារសមាគមន៍ ក្រុងប៉ោយប៉ែត កាលពីវេលាម៉ោង២០ និង២៣នាទី យប់ ថ្ងៃទី២១ ខែឧសភា ឆ្នាំ២០២៤។ សូមរំលឹកថា៖ ចោរស្លុយ! បញ្ឆេះឡានឱ្យម្តាយចាស់និងកូននៅខាងក្នុង ស្រាប់តែឡើងបើករត់
![](https://kohsantepheapdaily.com.kh/wp-content/uploads/2024/05/3d8335be48d7cc6124cbf020ef78ca91.jpg)
ប្រភពបន្តថា ពលរដ្ឋរងគ្រោះមានឈ្មោះ សំ សុវណ្ណ ភេទប្រុស អាយុ៥៦ឆ្នាំ មុខរបរជាងម៉ាស៊ីនត្រជាក់ និងប្រពន្ធឈ្មោះ ឈឹម ស៊ីណា អាយុ៤៧ឆ្នាំ រស់នៅភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ មានកូនប្រុស១នាក់ និងម្តាយចាស់ម្នាក់ រួមដំណើរជាមួយ ។
![](https://kohsantepheapdaily.com.kh/wp-content/uploads/2024/05/90485bd9907865a4d91190ff0eec1454.jpg)
នៅវេលាម៉ោងកើតហេតុ ជនរងគ្រោះបាននាំគ្នា ជិះរថយន្តរបស់ខ្លួន ម៉ាកលុច្សស៊ីស RX330 ពណ៌ស ពាក់ផ្លាកលេខ បន្ទាយមានជ័យ 2C-4361 ឈប់នៅមុខតូបលក់ខោអាវជជុះមួយកន្លែង ត្រង់ចំណុចខាងកើតបេនឡានតូច ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ដើម្បីចុះទៅទិញខោអាវ ដោយកូននិងម្ដាយ អង្គុយរង់ចាំនៅក្នុងរថយន្ត ប្រហែល១០នាទី ស្រាប់តែក្រោយមក មានបុរសម្នាក់ពុំស្គាល់អត្តសញ្ញាណ បានលួចចូលក្នុងរថយន្តបើកចេញទៅតាមបណ្តោយផ្លូវស្តង់តា
ងួន ដល់ចំណុចស្រះបេះដូង បានអោយក្មេងប្រុស ខាងលើចុះពីលើរថយន្ត រួចបន្តដំណើរទៅតាមផ្លូវជាតិលេខ៥៨ ដល់ចំណុចផ្លូវបំបែកអូរនាង បានដាក់អ៊ុំស្រីខាងលើ រួចអ្នកបើកបរបានបើកត្រឡប់ទៅទិសខាងត្បូងវិញ។
![](https://kohsantepheapdaily.com.kh/wp-content/uploads/2024/05/5074772797a9b6f9f8cfc09a986a8ac4.jpg)
ជាលទ្ធផលនៅវេលាម៉ោង២២ និង៣០នាទីយប់ថ្ងៃដដែល កម្លាំងនគរបាលក្រុងប៉ោយប៉ែត បានចុះស្រាវជ្រាវ និងរកឃើញរថយន្តត្រូវបានជនសង្ស័យផ្លុងចោលនៅខាងលិចផ្សារសហគមន៍ និងបានប្រគល់រថយន្តទៅម្ចាស់ដើមវិញរួចរាល់។
![](https://kohsantepheapdaily.com.kh/wp-content/uploads/2024/05/7383fe229d810fe887bc224428cbfce1.jpg)
ករណីខាងលើនេះ ពុំបានបណ្តាលអោយមានមនុស្សរងរបួសនោះទេ ចំណែកសំភារៈនៅក្នុងរថយន្តមានទូរស័ព្ទចំនួន ០២គ្រឿង (ម៉ាកoppo និងអាយហ្វូនXsmax ក្នុងរថយន្តត្រូវបានបាត់។ បច្ចុប្បន្ននគរបាលកំពុងបន្តការស្រាវជ្រាវ លើករណីនេះ៕
ចែករំលែកព័តមាននេះ