រាជធានីភ្នំពេញ ៖ អ្នកជំនាញផ្នែកហិរញ្ញវត្ថុបានឱ្យដឹងថា ការទិញលក់ភាគហ៊ុនរបស់ស្ថាប័ន ហិរញ្ញវត្ថុនានា កន្លងមកវាមិនមែនជារឿងថ្មី ហើយនៅក្នុងដំណាក់កាលសេដ្ឋកិច្ចកំពុងងើបឡើង និងមានការប្រកួតប្រជែងខ្លាំងរវាងគ្រឹះស្ថានមីក្រូហិរញ្ញវត្ថុ និងធនាគារនៅក្នុងស្រុក នោះ គឺជាចរន្តដែលនាំឱ្យមានការផ្ទេភាគហ៊ុន និងការគ្រប់គ្រងបែបនេះ ។
![](https://kohsantepheapdaily.com.kh/wp-content/uploads/2024/05/bafb797a9738193626ca25140aa6e220.jpg)
តើចរន្តនៃការទិញនេះនឹងឈានដល់ការបាត់មីក្រូហិរញ្ញវត្ថុពីកម្ពុជាឬទេ ? ពាក់ព័ន្ធនឹងស្ថានភាពនេះ លោក កាំង តុងងី អ្នកនាំពាក្យសមាគមមីក្រូហិរញ្ញាវត្ថុកម្ពុជា បានឱ្យកម្មវិធីលុយនៃសារព័ត៌មានកោះសន្តិភាពដឹងថា វិស័យមីក្រូហិរញ្ញាវត្ថុ មានប្រវត្តិជាប់ទាក់ទងនិងបរទេសតាំងពីដើមមកហើយ ពោលគឺ តាំងពីការចាប់ផ្តើមក្នុងទស្សវត្សរ៍ឆ្នាំ១៩៩០មកម្ល៉េះ ដែលវាជាទម្រង់អភិវឌ្ឍរបស់ម្ចាស់ជំនួយរបស់អង្គការធំៗដែលបានចូលរួមជួយកម្ពុជា ។
លោកបានសង្កត់ធ្ងន់ថា «ក្រោយពេលដែលកម្មវិធីអភិវឌ្ឍទាំងអស់ដកចេញពីកម្ពុជាយើងទៅ ក្រុមការងារដែលមានក៏បានវិវត្តន៍គម្រោងនានា ទៅជាក្រុមហ៊ុនឯកជន ដើម្បីធានាបាននូវនិរន្តរភាពបន្តផ្តល់សេវាដល់ប្រជាពលរដ្ឋនៅប្រទេសកម្ពុជា» ។ លោក កាំង តុងងី បន្តថា ចាប់តាំងពីឆ្នាំ ២០០០ មក គម្រោងទាំងអស់បានវិវត្តន៍មកជាក្រុមហ៊ុនឯកជន ហើយមួយចំនួនមានភាគហ៊ុនបរទេសតាំងតែពីដើម ដែលមួយចំនួនទៀតជាភាគហ៊ុនរបស់ខ្មែរ ដូចជាធនាគារមួយចំនួន ។ នៅពេលដែលវិស័យមីក្រូហិរញ្ញាវត្ថុកើនឡើងខ្ពស់ផ្សំជាមួយសេ្ថរភាពនយោបាយ ហើយចាប់ពីឆ្នាំ ២០១០ មក យើងឃើញមានធនាគារឯកជនលើពិភពលោកចាប់ផ្តើមចូលមកទិញភាគហ៊ុន ទិញទាំងស្រុង ឬចូលរួមវិនិយោគបន្ថែមលើវិស័យមួយនេះ ។
លោក កាំង តុងងី បន្ថែមថា «យើងឃើញគ្រឹះស្ថានមីក្រូហិរញ្ញាវត្ថុស្ថាបនា ក្រោយមកត្រូវបានធនាគារទិញ គ្រឹះស្ថានក្រេឌីត ត្រូវបានធនាគារហ្វីលីពទិញ ក៏ដូចជាគ្រឹះស្ថានមីក្រូ ហិរញ្ញាវត្ថុផ្សេងៗទៀតមួយចំនួនទិញ ដូចជាក្រុមហ៊ុនមកពីចិន កូរ៉េ សឹង្ហបុរី ជប៉ុន អីជាដើមទិញដោយសារតែគាត់មើលឃើញពីកំណើននៃសេដ្ឋកិច្ចកម្ពុជា» ។
![](https://kohsantepheapdaily.com.kh/wp-content/uploads/2024/05/20af83be33f4a10dee67d881e6267149-scaled.jpg)
លោក កាំង តុងងី បន្តថា នេះជានិនា្នការធម្មតាដូចតែនៅក្នុងប្រទេសផ្សេងៗ ដែលនៅ ពេលប្រទេសកំពុងអភិវឌ្ឍតួរអង្គក្នុងស្រុកខិតខំកសាងទីផ្សារ ហើយនៅពេលដែលទីផ្សាររឹងមាំហើយ នឹងចាប់ផ្តើមមានអ្នកវិនិយោគអន្តរជាតិចូលមកវិនិយោគក្នុងវិស័យនេះ កម្ពុជាក៏ងាកទៅរកនិន្នាការនេះដូចគ្នាដែរ ។ បន្ថែមថា «ខ្ញុំមើលឃើញថា នេះជាការវិវត្តន៍ល្អទេសម្រាប់ទីផ្សារ នៅពេលដែលអ្នកផ្តល់សេវាច្រើនការប្រកួតប្រជែងកាន់តែខ្លាំង អ្នកដែលចំណេញគឺអតិថិជនទេ ហើយអ្នកដែលប្រកួតប្រជែងលើទីផ្សារគាត់ត្រូវផ្តល់ទៅលើគុណភាពនៃសេវា ដើម្បីធានាបាននូវប្រសិទ្ធភាពការផ្តល់សេវារបស់គាត់» ។
លោកបន្ថែមថា គ្រឹះស្ថានក្នុងស្រុកគាត់ចាប់ដៃគូរជាមួយនិងគ្រឹះស្ថានអន្តរជាតិទី១ គាត់មានលទ្ធភាពទទួលបានទុនវិនិយោគពីប្រទេសអភិវឌ្ឍដែលជាទូទៅមានអត្រាការប្រាក់ថោកជាងទុន ដែលប្រមូលពីទីផ្សារអន្តរជាតិ ឬទុនដែលប្រមូលពីទីផ្សារក្នុងស្រុក ។ ទី ២គ្រឹះស្ថានអន្តរជាតិទាំងនោះ គេមានបច្ចេកវិទ្យាខ្ពស់ដែលអាចយកមកចែករំលែកជាមួយគ្រឹះស្ថាននៅក្នុងស្រុកពេលដែលគេទិញយក ។ ទី ៣ គេមានបច្ចេកទេសល្អៗជាច្រើនដែលគេយកមកជួយពង្រឹងនូវប្រសិទ្ធភាពនៃការផ្តល់សេវារបស់គ្រឹះស្ថាននៅក្នុងស្រុកដែលគេទិញយក ។ ការចូលប្រឡូករបស់គ្រឹះស្ថានអន្តរជាតិទាំងអស់នេះ វានឹងរឹតតែធ្វើឱ្យទីផ្សាររបស់កម្ពុជាកាន់តែមានភាពទាក់ទាញ ការប្រកួតប្រជែងកាន់តែល្អនាំឱ្យមានប្រសិទ្ធភាពប្រតិបត្តិការកាន់តែខ្ពស់តម្លៃសេវាកាន់តែមានភាពថយចុះ ។
![](https://kohsantepheapdaily.com.kh/wp-content/uploads/2024/05/d881a34124dd659936d1d46abbdb60aa.jpg)
ជាមួយនឹងស្ថានភាពបែបនេះ វាទំនងជានឹងអាចមានស្ថាប័នមីក្រូហិរញ្ញវត្ថុផ្សេងទៀត នឹងត្រូវទិញដោយធនាគារធំៗមកពីក្រៅប្រទេស ។ ប៉ុន្តែទោះបីជាយ៉ាងណាក៏ដោយចុះ វានឹងមិនអាចបំបាត់ស្ថាប័នមីក្រូហិរញ្ញវត្ថុទាំងអស់នៅកម្ពុជាបានឡើយ ។ មីក្រូហិរញ្ញវត្ថុនៅតែមានទីផ្សារដោយឡែកពីធនាគារ ហើយស្ថាប័នមីក្រូហិរញ្ញវត្ថុដែលមានការគ្រប់គ្រងបានល្អនឹងអាចនៅតែបម្រើទីផ្សារដែលតូចជាងពីទីផ្សារធនាគារ ៕
ចែករំលែកព័តមាននេះ