ខេត្តបន្ទាយមានជ័យ ៖ អាជ្ញាធរក្រុងប៉ោយប៉ែត និងសមត្ថកិច្ចបានឱ្យដឹងថា នឹងមានចំណាត់ការចំពោះហាងសាច់អាំងម៉ៃម៉ៃ ដែលលក់យកតែលុយបាតមិនយកលុយខ្មែរ ។ ហាងនេះស្ថិតក្នុងបរិវេណកាស៊ីណូហ្គ្រេនទីង ស្ថិតក្នុងភូមិក្បាលស្ពាន១ សង្កាត់អូរជ្រៅ…
ខេត្តបន្ទាយមានជ័យ ៖ អាជ្ញាធរក្រុងប៉ោយប៉ែត និងសមត្ថកិច្ចបានឱ្យដឹងថា នឹងមានចំណាត់ការចំពោះហាងសាច់អាំងម៉ៃម៉ៃ ដែលលក់យកតែលុយបាតមិនយកលុយខ្មែរ ។ ហាងនេះស្ថិតក្នុងបរិវេណកាស៊ីណូហ្គ្រេនទីង ស្ថិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ។
ប្រជាពលរដ្ឋបានបញ្ជាក់ថា ហាងសាច់អាំងម៉ៃម៉ៃដែលលក់យកតែលុយបាត(លុយថៃ)មិនយកលុយខ្មែរ មានម្ចាស់ជាជនជាតិឥណ្ឌូនេស៊ី ដែលទិញបើកបន្តពីម្ចាស់ជនជាតិថៃ ត្រូវមហាជនរិះគន់ថា លក់លើទឹកដីខ្មែរ ដាក់យីហោអក្សរខ្មែរ តែមិនយកលុយខ្មែរ ។ ឥរិយាបថនេះ ពលរដ្ឋបានសុំឱ្យអាជ្ញាធរ និងមន្ទីជំនាញចុះពិនិត្យ និងមានចំណាត់ការចំពោះការខ្ពើមលុយខ្មែរស្នេហ៍តែលុយថៃនេះ ឬបិទហាងនេះចោលតែម្ដងទៅ ។
លោក គាត ហ៊ុល អភិបាលក្រុងប៉ោយប៉ែត បានប្រាប់នៅល្ងាចថ្ងៃទី១៤ ខែឧសភា ឆ្នាំ២០២៤ថា ក្រោយទទួលព័ត៌មានថាមានហាងលក់សាច់អាំងម៉ៃម៉ៃ នៅចំណុចបរិវេណកាស៊ីណូហ្គ្រេនទីង លក់យកតែលុយបាត មិនព្រមយកលុយខ្មែរ លោក និងមន្ត្រីជំនាញនឹងចុះទៅត្រួតពិនិត្យ តើជាការពិតឬយ៉ាងណា បើសិនជាពិតមែន នឹងធ្វើការអប់រំណែនាំ និងធ្វើកិច្ចសន្យា បើនៅតែបន្តនឹងមានចំណាត់ការតាមច្បាប់ ព្រោះរយៈពេលកន្លងមក មន្ត្រីជំនាញបានចុះណែនាំផ្សព្វផ្សាយថា ការលក់ដូរទំនិញត្រូវទិញលក់ជារូបិយប័ណ្ណកម្ពុជា គឺប្រាក់រៀល ។
លោក មាស បូរ៉ា ប្រធានសាខា(ក.ប.ប)ខេត្តបន្ទាយមានជ័យបានប្រាប់ថា នៅថ្ងៃស្អែក លោកនឹងនាំមន្ត្រីសហការជាមួយអាជ្ញាធរមូលដ្ឋាន ចុះទៅពិនិត្យមើលហាងលក់សាច់អាំង ដែលលក់ទំនិញហូបចុកមិនយកប្រាក់រៀលយកតែប្រាក់បាត ។ បន្ទាប់ពីមានការផ្ទុះមតិរិះគន់ពីបណ្តាញសង្គម ។
ហាងលក់សាច់អាំងនេះ បើកលក់តែពេលល្ងាច និងយប់ ។
ប្រជាពលរដ្ឋម្នាក់បានប្រាប់ឱ្យដឹងមុននេះថា កាលពីថ្មីៗនេះ គាត់បានកុម្មង់ទិញសាច់អាំង បាយឆា និងទឹកសុទ្ធហូបនៅកន្លែង រួចហើយហៅឱ្យគឹតលុយ ស្រាប់តែអស់៥.០០០បាត ហើយគាត់តបវិញថា គាត់មានតែប្រាក់រៀលទេ អាចយកបានអត់ ? ពេលនោះទំនងជាម្ចាស់ហាងចេញមកនិយាយប៉ៃឡាំ ទំនងជនជាតិថៃប្រាប់ថា ហាងនេះយកតែប្រាក់បាតទេ មិនយកលុយខ្មែរទេ ទើបគាត់ភ្ញាក់ផ្អើលតបវិញថា ពេលនេះគាត់មានតែប្រាក់រៀលទេ អាចយកបានអត់ តែម្ចាស់ហាងនៅតែឆ្លើយថាមិនយកទេ ទើបគាត់សម្រេចខ្ចីលុយមិត្តភក្តិឱ្យទៅ ដោយមិនចង់ឈ្លោះប្រកែកគ្នាវែងឆ្ងាយ ។
ប្រជាពលរដ្ឋរូបនោះបានបញ្ជាក់ថា គាត់ពិតជាហួសចិត្តនឹងហាងសាច់អាំងមួយកន្លែងនេះណាស់ ដែលលក់លើទឹកដីខ្មែរហើយដាក់ឈ្មោះជាអក្សរខ្មែរ តែមិនយកលុយខ្មែរ បែរជាយកតែលុយបាតទៅវិញ ទើបគាត់សរសេរបង្ហោះតាមបណ្តាញសង្គម សូមឱ្យអាជ្ញាធរក្រុងប៉ោយប៉ែត និងមន្ទីរជំនាញ ក្រោយទទួលព័ត៌មាននេះមេត្តាចុះពិនិត្យ ព្រោះជាការមើលងាយរូបិយប័ណ្ណខ្មែរ ។ ក្រោយការបង្ហោះក្នុងបណ្តាញសង្គម ប្រជាពលរដ្ឋខ្មែរបានចូលខំមិន ទាមទារសុំឱ្យអាជ្ញាធរក្រុងប៉ោយប៉ែត និងមន្ទីរជំនាញ ត្រូវចាត់ការពីបញ្ហានេះ ៕
ចែករំលែកព័តមាននេះ