ខេត្តត្បូងឃ្មុំ ៖ បុរសម្នាក់រួមដំណើរជាមួយប្រពន្ធតាមរថយន្តមួយគ្រឿងលើដងផ្លូវជាតិលេខ៧ ក្នុងទិសដៅពីលិចមកកើត ស្របពេលដែលបើកមកដល់ចំណុចមុខផ្សារម្រាមទាក ឃុំជីរោទិ៍ទី២ ស្រុកត្បូងឃ្មុំ ត្រូវបានជនពុំស្គាល់មុខយកដុំថ្មគប់បែកកញ្ចក់រថយន្ត សំណាងណាស់ដែលម្ចាស់មិនត្រូវរបួស ។ បន្ទាប់មកម្ចាស់រថយន្តបានប្រញាប់ប្ដឹងទៅសមត្ថកិច្ចមូលដ្ឋានឲ្យជួយអន្តរាគមន៍រកជនកំហូច ទីបំផុតត្រូវបានស្រាវជ្រាវចាប់ខ្លួន ។
សមត្ថកិច្ចមូលដ្ឋានបានឲ្យដឹងថា ស្តីពីករណីហិ.ង្សាបំផ្លិចបំផ្លាញទ្រព្យសម្បត្តិ (គប់កញ្ចក់ រថយន្ត) នៅថ្ងៃទី១២ ខែឧសភា ឆ្នាំ២០២៤ វេលាម៉ោង១០យប់ នៅចំណុចលើផ្លូវជាតិលេខ៧ ភូមិម្រាមទាក ឃុំជីរោទិ៍ទី២ ស្រុកត្បូងឃ្មុំ ខេត្តត្បូងឃ្មុំ ។ ដោយជនសង្ស័យឈ្មោះ ស៊ិន ភ័ណ្ឌ ភេទប្រុស អាយុ២៩ឆ្នាំ ស្នាក់នៅភូមិម្រាមទាក ឃុំជីរោទិ៍ទី២ ស្រុកត្បូងឃ្មុំ ខេត្តត្បូងឃ្មុំ ។
ដោយធ្វើសកម្មភាពយកបំណែកបេតុងគប់កញ្ចក់រថយន្តម៉ាក MITSUBISHI TRITON ពាក់ស្លាកលេខ រដ្ឋ 20.2.0670 ពណ៌ស បណ្តាលអោយបែកកញ្ចក់ផ្នែកខាងមុខ ម្ចាស់រថយន្តឈ្មោះ ស៊ុន យ៉ាន់ ភេទប្រុស អាយុ៥៦ឆ្នាំ ជាតិខ្មែរ នៅភូមិព្រែកដើមចាន់ សង្កាត់សំបួរមាស ក្រុងកំពង់ចាម មុខរបរមន្ត្រីរាជការនៅសាលាខេត្តត្បូងឃ្មុំ ។
សមត្ថកិច្ចមូលដ្ឋានបន្តឲ្យដឹងទៀតថា ក្រោយទទួលបានបណ្តឹងកម្លាំងជំនាញស្រុកត្បូងឃ្មុំ និងកម្លាំងប៉ុស្តិ៍ជីរោទិ៍ទី២ ចុះស្រាវជ្រាវ ដោយមានការឯកភាពពីលោកឧត្តមសេនីយ៍ស្នងការ នគរបាលខេត្តត្បូងឃ្មុំ និងមានការសម្រប់សម្រួលពីលោក សួន ទី ព្រះរាជអាជ្ញារងនៃអយ្យការអមសាលាដំបូងខេត្តត្បូងឃ្មុំ សមត្ថកិច្ចយើងឃាត់ខ្លួនជនសង្ស័យបញ្ជូនមក អធិការដ្ឋាននគរបាលស្រុកត្បូងឃ្មុំ ដើម្បីសួរនាំ ។
សូមបញ្ជាក់ថា ក្រោមការដឹកនាំពីសំណាក់លោកវរសេនីយ៍ឯកសាំ ហេង អធិការនគរបាលស្រុកត្បូងឃ្មុំ និងទទួលបញ្ជាពីលោកឧត្តមសេនីយ៍ស្នងការដំបូងបានចុះទៅដល់កន្លែងកើតហេតុ ដោយបានឆែកកាមេរ៉ាសុវត្ថិភាព ក៏ឃើញពីភិនភាគនៃជនសង្ស័យដែលបានគប់កញ្ចក់រថយន្តនោះ ។ មុនពេលកើតខេត្តជនសង្ស័យបានបង្ហាញខ្លួននៅក្បែរកន្លែងនោះ ធ្វើឲ្យអ្នកភូមិផងរបងជាមួយគេស្គាល់ពីភិនភាគមនុស្សច្បាស់លាស់ ។
គួររំលឹកថា កាលពីជាង១០ឆ្នាំមុន ឪពុករបស់ជនសង្ស័យបានស្លា.ប់ហើយម្ដាយរបស់គេ បានទៅរស់នៅស្រុកកញ្ជ្រាចខេត្តព្រៃវែង ហើយជនសង្ស័យបានមកលេងផ្ទះពូនៅឃុំជីរោទិ៍ទី២ បានពុំដល់១០ថ្ងៃ ក៏ស្រាប់តែមានហេតុការណ៍បែបនេះកើតឡើងតែម្ដង ។ ហើយតាមរយៈការធ្វើតេស្តទឹកនោមពុំបានឃើញសារធាតុញៀ.ននោះទេ ។ ជនសង្ស័យដូចជា មានវិបត្តិផ្លូវចិត្តពេលណាធ្វើទុក្ខ ។ ក៏កើតរឿងបែបនេះលុះពេលផុតក៏ស្រាប់តែមានអារម្មណ៍ធម្មតាវិញ ៕
ចែករំលែកព័តមាននេះ